Tekang Kbuten 43

Bud kesfulék le ebè Idyip yó kem twogu Jusif, mung kul Bindyamin

1Deng tey sidek ne yóm kbel bitil bong bè Kanan. 2Timbow deng gotu yóm halay tehe nwit le gu bè Idyip yó kem ngà Jakub, yó udél Jakub ebélê le, monen, “Bud ye semfulék kut ebè Idyip na ye e bemli kut mò ken tekuy.”

3Yó mon Juda mò ke maen, “Deng tehe hol monen mò kum yóm tau tehe gónó me bemli ken, hol bê me abay hton béléen ke là na me hol nwit du yóm twoli me. 4Ke hmungem kum yóm twoli me, bud me lemwót na me e bemli ken béléem. 5Okóm ke là hmungem du kum, là kô me mógów abay se deng monen mò kum yóm tau tu, hol bê me abay hton béléen ke là mungen kum yóm twoli me.”

6Mon Jakub se, “Moen du ke alì hnayam ye ou, mom tulón ye yóm tau tu wen twoli ye?”

7Yó balà le du yó kem ngaen, mon le, “Sónmoen hemsokol smólók kum se yóm tau tu, snólóken yó kem fes lówó me, monen, ‘Tolo mowil he kô mà ye? Wen he kô dumu twoli ye logi?’ Là gbek me du ke là bnalà me du yóm sólóken kum. Mò ketngón me du se ke hfangayen yóm twoli me?”

8Yó bud mon Juda mò ke maen, “Hwitem dou ne yóm twoli me anì géhél me lemwót anì laen dù bélê tekuy matay lemnus, hol néen kem ngà tekuy. 9Tódô blayu klowilu béléen nim twolihu ni, ou gónóm smalig du. Ke wen gfaen ne ke là bud nwitu du ebéléem, ou dnuónem. 10Ke là tlek kum ganggà, deng lewu dulék me ne bud gu ditu.”

11Ne mon mà le se mò kul, “Ke lómón se yó kmoen, lemwót ye sen. Bede mit ye yó kem hyu bélê tekuy bè ni mò basa ye tum gubérnor tu. Mit ye béléen yóm litok koyu alì tilob boohen ne wen tneben ne wen yó kem dê kay som ne wen kem bungu koyu ken lemen lemwót bè yó kem koyu pistasyu ne koyu almun. 12Ne yóm filak bud nit ye ni, bud temnù du yóm filak tehe gwit ye gu ditu. Déke salà yóm tehe kmò le du. 13Yó ne, nwit ye yóm twoli ye, ne géhél ye bud mulék ebè tum tau tu. 14Yóm Dwata laen dù là gbeken du hol mung kuy anì wen koduhen kuy tum tau tu, anì yó bud huléken ebélê ye Bindyamin ne yóm dumu ye setwoli deng tebel ditu. Ke béléu dou, ke lana béléu se yó kem ngau, laen kem bud kmonu du ne.”

15Tahu se, tódô lemwót yó kem tau setwoli yó mógów le ebè Idyip, mung kul Bindyamin. Wen basa nwit le ne deng gomong nwit le yóm filak tehe nô lem sakù le. Yóm kkól le bè Idyip, tódô le hlós ebè Jusif. 16Timbow ton Jusif deng mung kul Bindyamin, yó monen mò yóm tau gel dóken gel snaligen bè gónóen, “Nitem lu ebè gónô ni kem tau ni, mung le mken béléu kedeng kemdaw ni. Hétéi sotu ógóf mò utón me.” 17Tahu se, tódô nmò yóm tau yó yóm hmò Jusif du, nwiten ebè gónô Jusif yó kem tau setwoli yó.

18Bè yóm igoen mit kul yó, ya tey klikò le. Yó mon nawa le, “Déke yó gónó le mit kum edini lemwót bè yóm filak tehe hulék le lem sakù me bè yóm tanay kógów me. Ne ni déke kendel kenfô le mi ne nwa le yó kem kudà me ne henbaling le mi kem tau mò hesek yóm tau tu.”

19Bè yóm kkól le bè bak dól yóm gónô, yó mon le bè yóm tau snalig Jusif, 20“Ó Sér, deng tehe sulék me mógów edini na me e bemli ken. 21Timbow me kól bè yóm gónó me kól kifu bè yóm kulék me, gotu ntó me yó kem sakù me ne tódô ton me yóm ket kum ne sotu yó kem filak tehe bli me ken bud nô lem sakù me, balù udì ke wen mtón du. Ne ni bud nit me mulék ebéléem. 22Ne bud wen se nwit me filak mò bud bli me ken. Yóm filak tehe bli me yó, là kô tngón me du ke tau du bud hemsù du lem sakù me.”

23Yó monen mò kul yóm tau snalig Jusif, “Béen tafa nawa ye. Bê ye abay hlikò. Kaem kuy Dwata yóm Dwata mà ye bud dô hemsù du lem sakù ye yóm filak yó. Igoen deng kól béléu yóm filak tehe bli ye.” Kogolen bè yó, ominen mit ke Simyun ebélê le.

24Ominen hfusek kul elem gónô. Benlayen lu él mò olob ti le ne bud henkenen se yó kem kudà asnu le. 25Lemwót yó kem tau setwoli yó, eles hentifes le yóm mò basa le ke Jusif bè yóm kkólen bè yó kemdaw, abay se deng eles tulónen kul yóm tau snalig Jusif yóm kmung le mken bè Jusif.

26Timbow kól Jusif, omin le ma yó kem mò basa le du ne nit le ebéléen lem gónóen, gotu le hegdufok ebè tonok bè soluhen. 27Ne snólók Jusif bélê le yóm kul kmò klowil ne monen mò kul, “Deng tehe tulón ye dou yóm deng tey ktuha mà ye. Deng kmoen se kun du ni kmoen ni? Tolo mowil he kô ne hyu klówóhen?”

28Bnalà le se, mon le, “Gò se, tolo mowil he ne hyu klówóhen.” Omin le yó bud hegdufok ebè tonok bè soluhen, mò lan le madat du. 29Timbow ton Jusif Bindyamin yóm twolihen, yó monen mò kul, “Ni kô yóm mon ye són imot bélê ye?” Ne ominen mon du mò ke Bindyamin, “Dwata he hol tmóbóng kóm.” 30Bè yóm kmonen du yóm yó, tódô kendel lemwót abay se là gehbalahen du yóm kkiken, bà mon tey sidek klayuk nawan yóm twolihen. Yó gónón tódô husek elem dfélen ne ditu gónón mkik. 31Timbow deng mkó kkiken, ominen mouf ne bud hewà, bede henbalahen nawahen. Ominen mdók yó kem tóbóng lówóhen anì kay le bè yó yóm ken.

32Henken le bè sotu lemisa kun ke Jusif ne fen tólóng lemisa gónó le hemken yó kem twoguhen. Yó kem tau Idyip gel mken bè yó, bud tólóng lemisa se kul gónó mken abay se bè kul adat kenhisik le ke slomong le mken bè yó kem tau Hibru. 33Bè yóm kehyón le kul bè lemisa yó kem twogu Jusif, sentodol hyón le lu smolu ebè Jusif lenwóten bè yóm hol twogu efet kól bè yóm hol twoli. Timbow ton le yóm kmò kehyón le kul, tey ketnga le, gotu le setngel. 34Yóm kkay le kul ken, sal lemwót bè kun lemisa Jusif. Botong limu dulék le mkay ken ebè Bindyamin kun senta yó kem dumun. Tey kken le ne tey kinum le bè yóm kmung le mken bè Jusif yó.

Currently Selected:

Tekang Kbuten 43: tbl

Highlight

Copy