EKSODUS 9

Calaka je kalime: Panyakit mawi meto

1 Tuhan hamauh dengan Moses, “Lius manaharep raja, sanan akae je Tuhan, Hatallan oloh Ibrani, hamauh: ‘Ela mangahana ungkup-Ku haguet mangat ewen tau manyembah Aku. 2Amon ikau dia maku malapas ewen, 3Aku kareh mampadumah panyakit je paham akan kakare meto, kuda, kalidai, onta, sapi tabiri tuntang kambing ayum. 4Aku kareh mangabeken meto ain oloh Israel bara meto ain oloh Misir. Bara meto ain oloh Israel ije kongan mahin jaton je matei. 5Aku, Tuhan, manukas andau jewu handak malalus taloh te.’ ”

6Andau jewue Tuhan malalus kilau je jari insanan Awie. Uras meto ain oloh bangsa Misir matei, tapi meto ain bangsa Israel ije kongan mahin jaton je matei. 7Raja misek en taloh je manjadi. Palus inyarita akae je kare meto ain oloh Israel ije mahin jeton je matei. Tapi raja badungil hayak dia maku malapas oloh Israel te haguet.

Calaka je kajahawen: Panyakit baluyong

8 Tuhan hamauh dengan Moses tuntang Aron, “Duan pire-pire karakup kawo bara dapur. Intu taharep raja, Moses balalu manawor kawo te akan hunjun. 9Palus kawo te kareh tayap intu hapus tanah Misir. Intu olon tuntang meto kawo te kareh mampalembut kare baluyong je pusit jadi buhit je hanana.” 10#Pang. 16:2 Balalu Moses tuntang Aron manduan kawo, tuntang manaharep raja. Moses manawor kawo te akan hunjun. Intu olon tuntang meto palus lembut kare baluyong je mamusit jadi buhit hanana. 11Kare tukang seher dia tau manaharep Moses awi hapus biti bereng ewen kontep baluyong sama kilau kare oloh Misir je beken. 12Tapi Tuhan mawi raja badungil. Kilau je jari insanan Tuhan, raja dia paduli auh Moses tuntang Aron.

Calaka je kauju: Ujan es

13 Tuhan hamauh dengan Moses, “Lius susong hanjewu jewu manaharep raja. Nyampai akae je Tuhan, Hatallan oloh Ibrani hamauh, ‘Lapas ungkup-Ku mangat ewen tau haguet manyembah Aku. 14Sinde toh Aku handak mawi calaka dia baya akan kare pagawai tuntang rayat, tapi akam kea, mangat ikau katawan je jaton tanding-Ku hong hapus kalunen. 15Amon Aku handak mahukum ikau tuntang rayatm hapan panyakit, tantu ikau jari binasa samasinde. 16#Rm. 9:17 Tapi ikau nalua-Ku belom, mangat aku tau mamparahan kuasang-Ku akam, sampai arang-Ku basewut intu salepah petak. 17Aloh kalote, ikau magon kea gantong atei tuntang dia maku manyoho ungkup-Ku haguet. 18Hanjewu jewue, kilau toh, Aku mampadumah ujan es je paham, je hindai puji manjadi intu Misir bara bihin sampai toh. 19Keleh irentah mangat uras meto tuntang kare ramom je aton intu luar imbit akan eka kalindong. Uras olon tuntang meto je aton intu luar je dia tau bakalindong kareh matei intakan ujan es.’ ” 20Pire-pire bara kare pagawai mikeh dengan auh Tuhan. Ewen mimbit kare jipen tuntang meto ain ewen tame akan huang huma mangat ingalindong. 21Tapi oloh awang beken dia paduli pampingat te hayak malihi kare jipen tuntang meto ain ewen intu padang oru.

22Palus Tuhan hamauh dengan Moses, “Tajok lengem akan hunjun tuntang ujan es te kareh mohon intu hapus tanah Misir. Ujan te kareh mantakan olon, meto tuntang kare taloh imbul hong tana.” 23Moses mantajok sokahe akan hunjun, palus Tuhan mampamohon nyaho tuntang ujan es, tuntang kilat manyambar akan petak. 24#Pang. 8:7, 16:21 Tuhan mampadumah ujan es je paham impahayak awi nyaho kilat. Jete ujan es je paham toto tumon saritan oloh hong tanah Misir. 25Hong hapus lewu ujan es te mampatei taloh samandiai intu tana, tamput kea olon tuntang meto. Uras pambulan rusak tuntang kare batang-kayu balihang. 26Baya tanah Gosen, eka melai oloh Israel, dia buah ujan es.

27Palus raja mantehau Moses tuntang Aron hayak hamauh, “Aku jari badosa. Tuhan te je bujur, aku tuntang rayatku jari basala. 28Keleh balakudoa intu Tuhan; ikei jari sukop kapehe awi nyaho tuntang ujan es toh. Aku handak malapas keton haguet keton dia usah melai hetoh tinai.”

29Koan Moses dengan raja, “Sana aku sampai intu luar lewu, aku kareh manggatang lengengku balakudoa intu Tuhan. Nyaho kareh tende tuntang ujan es kareh malayan, mangat Tuangku katawan je kalunen toh ayun Tuhan. 30Tapi aku katawan je Tuangku tuntang kare pagawai hindai kea mikeh dengan Tuhan, Hatalla.”

31Kare batang-kayu, batang rami tuntang jelei lepah luyut, awi rami kanjerae mangambang, tuntang jelei kanjerae habawak. 32Tapi gandom tuntang bawak paung taloh imbul dia rusak awi hindai haduring.

33Palus Moses malihi raja tuntang haguet akan luar lewu. Hete ie manggatang lengee balakudoa manintu Tuhan. Hemben te kea nyaho, ujan, tuntang ujan es balalu terai. 34Metoh raja mite taloh je manjadi, ie badosa tinai. Ie tuntang kare pagawai ayue tetep badungil. 35Kilau je jari insanan Tuhan mahalau Moses, raja dia maku manyoho oloh Israel haguet.

Currently Selected:

EKSODUS 9: NIJ

Highlight

Copy