EKSODUS 10
10
Calaka je kahanya: Agas sangkalap
1 Tuhan hamauh dengan Moses, “Lius manaharep raja. Aku jari mawi ie tuntang kare pagawai ayue badungil, mangat Aku tau malalus kare taloh heran intu bentok ewen, 2tuntang mangat ikau tau manyarita akan kare anak esom kilen ampie Aku mureh oloh Misir hapan kare taloh heran te. Te uras keton kareh katawan je Aku toh Tuhan.”
3Palus Moses tuntang Aron haguet manaharep raja tuntang hamauh dengae, “Tuhan, Hatallan oloh Ibrani, hamauh, ‘Sampai hamparea ikau dia maku mamenda Aku? Keleh soho ungkup-Ku haguet, mangat ewen tau sombayang manyembah Aku. 4Amon ikau magon kea mangahana, maka jewu impadumah-Ku sangkalap akan lewum. 5Hapus petak kareh ingalambo samasinde awi sangkalap je are toto te. Uras tisan pambulan, sampai kare batang-kayu je dia imbinasa awi ujan es, kareh impalepah awi sangkalap te. 6Istanam, kare human pagawai aim tuntang human rayat kareh kontep sangkalap. Calaka toh kareh labih paham bara taloh je puji ingkeme awi tato hiang keton.’ ” Limbah te Moses mules tuntang haguet.
7Palus kare pagawai hamauh dengan raja, “Sampai hamparea oloh te harajur manyusah itah? Nalua ih kakare oloh Ibrani te haguet mangat manyembah Tuhan, Hatallan ewen. Item lewun itah toh jari hancor!”
8Moses dengan Aron intehau haluli manaharep raja. Koan raja dengan ewen, “Keton tau haguet mangat manyembah Tuhan, Hatallan keton. Tapi eweh bara keton je handak haguet?”
9Tombah Moses, “Uras ikei, bakas tabela. Ikei mimbit uras anak ikei, uras sapi, tabiri, tuntang kambing ayun ikei. Awi ikei musti mawi pesta hai hapan mahormat Tuhan.”
10Koan raja, “Dia baka aku manyoho keton mimbit kare oloh bawi tuntang kare anak keton! Je ilaku keton te sama ih dengan maharap aku balaku Tuhan mamberkat keton. Jadi tarang akangku je keton aton kahandak je papa. 11Dia! Baya oloh hatue bewei je tau haguet manyembah Tuhan, amon keton puna handak sombayang bewei!” Hapan auh te Moses tuntang Aron iharak bara istana.
12Palus Tuhan hamauh dengan Moses, “Tajok lengem akan hunjun tanah Misir, kare sangkalap kareh dumah tuntang kuman kare taloh imbul je batisa limbah ujan es.” 13Moses manggatang sukahe tuntang Tuhan mawi riwut timor manampur lewu te hapus andau tuntang hapus alem. Tokep hanjewu riwut te mimbit kare sangkalap je dia lue-luen karee, 14#Pang. 9:2-3 sampai kontep hapus lewu. Hindai puji oloh mite sangkalap je kalote karee. Taloh kalote dia akan manjadi tinai. 15Hapus petak ingalambo sangkalap sampai babilem ampie. Ewen kuman en bewei je dia impalomos awi ujan es te, tamput kare bua intu upoe. Hapus tanah Misir jaton je bahijau je batisa intu kare batang-kayu atawa pambulan.
16Raja bajeleng mantehau Moses tuntang Aron palus hamauh, “Aku jari badosa intu taharep Tuhan, Hatallan keton tuntang intu taharep keton. 17Ampun dosangku sinde toh. Keleh balakudoa intu Tuhan, Hatallan keton, mangat Ie manduan bara Aku hukuman je mampatei toh.” 18Moses malihi raja tuntang balakudoa manintu Tuhan. 19Palus Tuhan mobah tintun riwut jadi riwut barat je paham toto, kare sangkalap te inampur riwut tuntang imbit akan Tasik Raruju. #10:19: Tasik Raruju: Mungkin kea je inyewut hetoh iete: 1. Kare danau tuntang napu je aton intu helang Telok Sues dengan Tasik Bentok. Intu hete are oru ije tumbo tuntang belom intu danum. Oloh are maanggap eka toh kilau eka kare taloh je manjadi kilau je inyewut huang surat Eksodus bagi 13. 2. Telok Sues. 3. Telok Akaba 4. Tasik Raruju je sabujure je warnae bahandang. Ije mahin jaton je tapalihi intu tanah Misir. 20Tapi Tuhan mawi raja badungil, tuntang ie dia manalua oloh Israel haguet.
Calaka je kajalitien: Misir buah taloh kaput pijem
21 Tuhan hamauh dengan Moses, “Tajok lengem, maka tanah Misir kareh buah taloh kaput pijem.” 22#Mas. 105:28; Pang. 16:10 Moses mantajok lengee akan hunjun, palus katahin telo andau hapus tanah Misir buah taloh kaput pijem. 23Oloh Misir dia tau mite en-en tuntang katahin te jaton ije oloh je tau mananjong akan hete-hete. Tapi intu kare human oloh Israel tetep balawa.
24Palus raja mantehau Moses tuntang hamauh, “Keton tau haguet manyembah Tuhan keton. Kare oloh bawi tuntang kare anak oloh tau omba. Tapi sapi, tabiri tuntang kambing keton dia tau iimbit.”
25“Amon kalote Tuangku musti manenga akan ikei meto je tau akan indu parapah je ingehu akan Tuhan, Hatallan ikei. 26Uras meto ain ikei patut ikei mimbite; ije kongan mahin dia ikei malihie. Bara meto te ikei mintih je kueh je tau iluput akan indu parapah akan Tuhan, Hatallan ikei. Harue intu kanih ikei kareh katawan meto kueh je handak iluput awi ikei.”
27 Tuhan mawi raja badungil, sampai ie dia maku manyoho bangsa Israel haguet. 28Koan raja dengan Moses, “Lius haguet bara taharepku! Ela sampai ikau gitangku tinai! Amon sampai gitangku tinai baum, ikau kareh matei!”
29“Kilau koan Tuangku,” koan Moses. “Tuangku batantu dia mite aku tinai.”
Currently Selected:
EKSODUS 10: NIJ
Highlight
Share
Copy
Want to have your highlights saved across all your devices? Sign up or sign in
