EKSODUS 4
4
Hatalla manenga Moses kuasa mawi taloh heran
1Palus Moses tombah auh Tuhan, “Tapi kilen ampie amon kare oloh Israel dia maku percaya tuntang dia paduli kare auhku? Narai je patut iawiku amon ewen hamauh je Tuhan dia mamparahan arep akangku?”
2 Tuhan misek Moses, “Narai je intu lengem?” Tombah Moses, “Sukah”
3Koan Tuhan, “Jakah te akan petak.” Moses manjakahe, balalu sukah te hobah jadi handipe tuntang Moses hadari mangejau arepe bara handipe te. 4Balalu Tuhan hamauh dengan Moses, “Nokep handipe te, tuntang imbing ikohe.” Moses manokepe tuntang manyingkap handipe te je salenga hobah haluli jadi sukah intu lengen Moses. 5Koan Tuhan, “Awi tumon te mangat kare oloh Israel percaya, je Aku toh Tuhan, Hatallan tato hiang ewen, Hatallan Abraham, Isaak, Yakob, jari mamparahan Arep akam.”
6 Tuhan hamauh tinai dengan Moses, “Namean lengem akan huang bajum.” Moses manumon. Metoh ie mampalua lengee, lengee te paham baputi awi buah panyakit kulit je bakaike-ikeh. 7Palus Tuhan hamauh, “Namean lengem haluli akan huang bajum.” Moses malalus te; metoh ie mampaluae tinai, lengee te jari keleh. 8Koan Tuhan, “Amon ewen dia maku percaya dengam, atawa dia percaya limbah mite taloh heran je solake, maka taloh heran toh kareh mawi ewen percaya. 9Amon ewen mahin hindai handak percaya dengam, aloh jari mite due-due taloh heran toh, tuntang ewen dia maku paduli kare auhm, duan isut danum bara Sungei Nil tuntang tusoh akan petak. Danum te kareh hobah jadi daha.”
10Tapi Moses hamauh, “O Tuhan aku toh oloh ije dia pintar hakotak, aloh bihin aloh wayah toh, limbah Tuhan hakotak dengangku. Aku gaga, hakotak rangkah, tuntang dia lancar.”
11 Tuhan hamauh dengae, “Eweh je menenga nyame akan olon? Eweh je mawi ie bisu atawa badengen? Eweh je mawi ie mite atawa babute? En Aku dia Tuhan? 12Toh, keleh haguet, Aku kareh mandohop ikau hakotak tuntang majar taloh je patut insanam.”
13Tapi Moses tombah, “Aku balaku, ela ah manyoho aku, o Tuhan, soho oloh beken.”
14Palus Tuhan balait dengan Moses tuntang hamauh, “En Aron te dia paharim? Tawang-Ku ie pintar hakotak. Ije katotoe ie kanjerae haguet akan hetoh, ie kareh sanang hasondau dengam. 15Keleh hakotak dengae, tuntang sanan akae taloh je patut ingotake. Aku kareh mandohop keton due tuntang majar en taloh je musti insanan tuntang ilalus awi keton. 16Ie je hakotak akan gantim intu baun rayat. Ie kareh jadi oloh je hakotak akam. Ikau akae kilau Hatalla je mansanan en je akan ingotake. 17Imbit sukah toh, ikau kareh mawi kare taloh heran hapan jete.”
Moses haluli akan Misir
18Limbah te Moses buli akan human Yetro, empoe, tuntang hamauh dengae, “Soho aku haluli akan Misir mite kare paharingku tuntang mite en ewen magon belom.” Yetro hamauh dengan Moses, “Keleh haguet dengan salamat.”
19Metoh Moses magon intu tanah Midian, Tuhan hamauh dengae, “Buli akan Misir, uras oloh je handak mampatei ikau jari matei.” 20Palus Moses mimbit sawae tuntang kare anake tuntang mampalumpat ewen akan hunjun kalidai balalu haguet dengan ewen akan Misir. Awi parentah Tuhan, Moses kea mimbit sukahe.
21 Tuhan hamauh dengan Moses, “Aku jari manenga kuasa akam hapa mawi taloh heran. Maka amon ikau jari haluli intu Misir kareh, lalus kare taloh heran te intu taharep raja Misir. Tapi aku kareh mawi ie manekang ateie, sampai ie dia maku manyoho bangsa te haguet. 22Sanan akan raja te je Aku, Tuhan, mameteh tumon toh: ‘Israel iete anak-Ku je bakas 23#Eks. 12:29 ikau jari irentah-Ku uka manyoho anak-Ku haguet mangat ie tau manyembah Aku, tapi ikau dia maku manyoho anak-Ku haguet. Toh Aku handak mampatei anakm je bakas.’ ”
24Intu ije eka mampendeng kemah hong jalanan te, Tuhan dumah manalih Moses tuntang handak mampateie. 25Sipora, sawae, manduan ije batu banyihi tuntang manetek kulop anake, palus injulite intu pain #4:25: pain: Aton oloh je manirok je inyewut “pai” iete kahawen oloh hatue. Moses. Koan Sipora, “Ikau banangku tagal daha akangku.” 26Taloh te insanae tagal gawi sunat. Te Tuhan balang mampatei Moses.
27Metoh te Tuhan hakotak dengan Aron, “Lius akan padang pasir mangat manyondau Moses.” Aron haguet palus hasondau dengan andie intu bukit barasih, tuntang manyium ie. 28Moses manyarita akan Aron uras kare taloh je jari insanan Tuhan akae metoh ie inyoho haluli akan Misir, tuntang kea tahiu kakare taloh heran je akan ilalus awie. 29Limbah te Moses tuntang Aron haguet akan Misir, tuntang mamumpong uras pamimpin oloh Israel. 30Aron manyampai akan ewen kare taloh handiai je jari insanan awi Tuhan akan Moses. Moses mawi kakare taloh heran intu taharep kare oloh te. 31Ewen balalu percaya, tuntang metoh ewen mahining je Tuhan jari manantuani bangsa Israel tuntang mite kare kapehen ewen, ewen sontop manyembah.
Currently Selected:
EKSODUS 4: NIJ
Highlight
Share
Copy
Want to have your highlights saved across all your devices? Sign up or sign in
