EKSODUS 5
5
Moses tuntang Aron manaharep raja Misir
1Limbah te Moses tuntang Aron haguet manaharep raja Misir tuntang hamauh, “Kalotoh parentah Tuhan, Hatallan Israel, ‘Soho bangsa ayung-Ku haguet mangat ewen tau manyembah Aku intu padang pasir.’ ”
2“Eweh Tuhan te?” raja misek. “Mbuhen aku musti paduli auh Ayue tuntang manyoho bangsa Israel haguet? Aku dia kasene Tuhan te, tuntang Aku dia manyoho oloh Israel haguet.”
3Moses tuntang Aron hamauh, “Hatallan oloh Ibrani jari mamparahan Arepe akan ikei. Soho ikei haguet akan padang pasir kakejau tanjong telo andau mangat maluput parapah akan Tuhan, Hatallan ikei. Amon ikei dia malalus te, ikei kareh impatei hapan penyakit atawa parang.”
4Koan raja dengan Moses tuntang Aron, “Mbuhen keton mawi oloh te laya bara gawin ewen? Soho kare jipen te bagawi! 5Kare oloh te jari lalau karee. Toh keton handak uka ewen tende bagawi!”
6Andau te kea kare pamimpin bangsa Misir tuntang kare mandor bangsa Israel mandino parentah bara raja, 7“Ela tinai manenga tampilai akan bangsa te hapae mawi batu bata. Nauh ewen haguet manggaue kabuat. 8Tapi soho ewen mawi batu bata dia kurang karee bara je jadi-jadi. Ewen handak mado kakulase ih, tagal te ewen harajur bakotok mangat inyoho maluput parapah akan Hatallan ewen? 9Maksa kare oloh te bagawi labih karas tinai, mangat ewen deroh awi gawi, tuntang jaton katikae mahining kare sarita tanjaro.”
10Kare pamimpin oloh Misir tuntang kare mandor bara oloh Israel te balua, palus hamauh dengan kare oloh Israel “Raja mampalua parentah mangat keton dia tinai inenga tampilai. 11Keton musti manggau kabuat hong kueh bewei. Tapi ingat, batu bata je inampa keton dia tau kurang bara je jadi-jadi.” 12Palus oloh Israel haguet mangumbang hapus tanah Misir uka mamumpong tampilai. 13Kare pamimpin harajur mamaksa mangat genep andau ewen tetep manampa batu bata je sama karee kilau metoh ewen inenga tampilai. 14Kare pamimpin te mamukul kare mandor je bara oloh Israel je inyoho manantuani gawi. Ewen misek, “Mbuhen metoh toh bangsa ayum dia olih manampa batu bata je sama karee kilau bihin?”
15Palus kare mandor oloh Israel haguet manaharep raja tuntang mungoh, “Mbuhen raja mawi ikei tumon toh? 16Ikei dia inenga tampilai, tapi imaksa mawi batu bata! Toh ikei imukul, padahal oloh ain raja je sala!”
17Raja tombah, “Keton puna kadian tuntang dia maku bagawi. Jete sababe keton balaku dengangku mangat haguet maluput parapah akan Tuhan keton. 18Haguet bagawi tinai. Tampilai dia tau inenga akan keton, tapi keton tetep mawi batu bata je sama karee kilau helo.” 19Kare mandor te katawan je ewen te buah kapehe metoh inasanan je kare oloh Israel musti manampa batu je tetep sama karee kilau je jadi-jadi.
20Metoh ewen balua bara istana, ewen hasondau dengan Moses tuntang Aron je kanjerae mentai ewen. 21Koan kare mandor te, “Tuhan katawan gawim! Ie kareh mahukum keton! Keton je mawi sabab ikei inyingi awi raja tuntang kare oloh ayue, sampai ewen handak mampatei ikei.”
Moses mungoh intu taharep Tuhan
22Palus Moses manaharep Tuhan tinai tuntang hamauh, “Tuhan, bangsa Israel iawim kalote kapapa? Mbuhen ikau manyoho aku akan hetoh? 23Bara metoh aku manaharep raja tuntang hakotak hapan Aram, ie nampara mangapehe bangsa toh. Tuntang Ikau dia mawi en-en hapa mandohop ewen.”
24Palus Tuhan hamauh dengan Moses, “Toh ikau kareh mite kilen ampie Aku mawi raja. Ie kareh imaksa-Ku malapas bangsa ayung-Ku. Toto, ie kareh imaksa-Ku maharak ewen bara tanah toh.”
Currently Selected:
EKSODUS 5: NIJ
Highlight
Share
Copy
Want to have your highlights saved across all your devices? Sign up or sign in
