EKSODUS 3

Hatalla mantehau Moses

1Metoh te Moses manyakatik kare tabiri tuntang kambing ain Yetro, empoe, imam intu tanah Midian. Metoh ie kanjerae mimbit meto te akan dipah padang pasir, ie sampai intu Bukit Sinai, bukit je barasih. 2#Gaw. Ras. 7:30-34 Intu hete malekat Tuhan mamparahan arepe akae huang nyalan apui je balua bara bentok rowut. Moses mite rowut te banyala, tapi dia bakehu. 3“Taloh heran” koan tiroke. “Rowut te dia bakehu! Keleh aku mitee bara tokep.”

4 Tuhan mite Moses manokep eka te. Ie palus mantehau bara bentok rowut te, “Moses! Moses!”

“Toh aku,” tombah Moses.

5Hatalla hamauh, “Ela manokep tinai. Engkak sandalm, awi ekam mendeng toh petak barasih. 6Aku toh Hatallan tato hiangm, Hatallan Abraham, Isaak tuntang Yakob.” Palus Moses manutup baue, awi ie mikeh mite Hatalla.

7 Tuhan hamauh, “Aku jari mite kasusah ungkup-Ku intu Misir, tuntang jari mahining ewen mangkariak balaku ilapas bara kare oloh je mangapehe ewen. Toto aku uras katawan kapehen ewen. 8Awi te Aku mohon handak malapas ewen bara lengen oloh Misir tuntang mimbit ewen balua bara lewu te manintu ije tanah je lombah. Tanah jete tatau tuntang basiwoh, je metoh toh ielai awi bangsa Kanaan, Het, Amori, Peris, Hewi tuntang Yebusi. 9Tangis bangsa Israel jari hining-Ku. Gitang-Ku kea ampin katulas oloh Misir mawi ewen. 10Toh ikau inyoho-Ku manaharep raja Misir mangat ikau tau mimbit bangsa aing-Ku balua bara tanah te.”

11Tapi Moses hamauh dengan Hatalla, “Eweh aku toh, sampai olih naharep raja tuntang mimbit oloh Israel balua bara Misir?”

12 Tuhan tombah, “Aku kareh mandohop ikau. Amon ikau jari mimbit bangsa te balua bara Misir, ikau kareh manyembah Aku intu bukit toh. Jete buktie je Aku manyoho ikau.”

13 # Eks. 6:2-3 Moses tombah, “Tapi amon aku manyondau kare oloh Israel tuntang hamauh dengan ewen: ‘Hatallan tato hiang keton manyoho aku manalih keton,’ Ewen batantu misek, ‘Eweh arae?’ Palus en auh je patut hapaku manombah auh ewen te?”

14 # Pang. 1:4, 8 Koan Hatalla, “AKU TOH AKU JE ATON.#3:14: AKU JE ATON: Auh sewute sama kilau kotak Ibrani “Yahwe” amon inyalinan rimae “Tuhan”. Toh ie taloh je musti insanam akan bangsa Israel, Ie je inyewut AKU TOH AKU JE ATON, jari manyoho manalih keton. 15Suman kea akan ewen je Aku, Tuhan, Hatallan tato hiang ewen, Hatallan Abraham, Isaak, Yakob, manyoho ikau manalih ewen. Aku toh Tuhan je arang-Ku palus katatahie. Jete galar-Ku akan kakare bangsa girir-manggirir. 16Keleh haguet tuntang mamumpong kakare pamimpin oloh Israel. Sanan akan ewen je aku Tuhan, Hatallan tato hiang ewen, Hatallan Abraham, Isaak, Yakob, jari mamparahan arep-Ku akam. Sanan akan ewen je Aku jari manalih ewen tuntang mite kilen ampie oloh Misir mawi ewen. 17Aku jari manukas handak mimbit ewen balua bara Misir, eka ewen buah katulas, tuntang magah ewen akan ije lewu je tatau tuntang basiwoh, lewu bangsa Kanaan, Het, Amori, Peris, Hewi tuntang Yebusi.

18Ungkup-Ku kareh manyeneh auhm. Limbah te ikau dengan kare pamimpin oloh Israel haguet manaharep raja Misir tuntang mansanan akae: ‘Tuhan, Hatallan oloh Ibrani jari dumah mamparahan arepe intu padang pasir akan ikei. Toh soho ikei haguet katahin tanjong katelo andau intu padang pasir mangat maluput parapah akan Tuhan, Hatallan ikei.’ ” 19Limbah te Hatalla hamauh tinai, “Aku katawan raja Misir dia baka malapas keton haguet, amon ie dia imaksa. 20Tapi Aku kareh mahapan kuasang-Ku. Aku mahukum Misir hapan kare calaka hai je iawi-Ku intu kanih. Limbah te, ie kareh manyoho keton haguet.

21 # Eks. 12:35-36 Aku kareh mawi oloh Misir bahalap ateie dengan keton, sampai katika ungkup-Ku haguet keton dia haguet baya mimbit tunjok sapuluh. 22Genep bawin oloh Israel kareh balaku bara oloh Misir je melai hakatokep tuntang je ije kahuma dengae, pakaian tuntang hiasan perak tuntang amas. Keton kareh mamasang jete intu kare anak keton. Hapan cara te keton kareh marampas ramon oloh Misir.”

Currently Selected:

EKSODUS 3: NIJ

Highlight

Copy