EKSODUS 18

Yetro maja Moses

1Yetro, empo Moses, imam intu Midian, mahining tahiu kare taloh je iawi Hatalla akan Moses tuntang bangsa Israel, metoh ie mimbit ewen balua bara Misir. 2#Eks. 2:21-22 Yetro palus haguet maja Moses, mimbit Sipora, sawan Moses je metoh te melai intu Midian, 3#Gaw. Ras. 7:29 dengan Gersom#18:3: Gersom: ite 2:22. tuntang Elieser, due-due anake hatue. Anake je bakas arae Gersom awi koan Moses “Aku ije biti tamuei intu lewun oloh.” 4Anake je kaduee arae Elieser#18:4: Elieser: Aran toh auh sewute sama kilau kotak Ibrani je rimae “Hatalla mandohop aku”. awi koan Moses, “Hatalla je inyembah tato hiangku jari mandohop tuntang manyalamat aku sampai aku dia impatei awi raja Misir.” 5Yetro dumah dengan sawan Moses tuntang due-due anake akan padang pasir eka Moses mampendeng kemahe tokep bukit je barasih. 6Akan Moses ingabar je ewen te jari dumah, 7ie palus balua manambang ewen. Ie sontop intu taharep baun Yetro tuntang manyiume. Ewen hisek karigas genep biti, palus tame akan huang kemah Moses. 8Moses manyarita akan empoe kare taloh je ilalus Tuhan dengan raja tuntang bangsa Misir hapan manyalamat oloh Israel. Ie manyarita kea akae tahiu kare kasusah je inaharep bangsa Israel intu benteng jalan, tuntang kilen ampie Tuhan manyalamat ewen. 9Mahining taloh handiai te Yetro paham hanjak 10tuntang hamauh, “Tara akan Tuhan je manyalamat keton bara lengen raja tuntang bangsa Misir! Tara akan Tuhan je malapas bangsa Israel bara kahajipen! 11Toh aku katawan je Tuhan labih hai bara kare dewa, awi kakare taloh te ilalus Awie metoh oloh Misir paham bajoho dengan oloh Israel.” 12Limbah te Yetro mimbit pire-pire parapah je ingehu tuntang parapah je inyambalih kilau parapah akan Hatalla. Aron tuntang kakare pamimpin bangsa Israel dumah tuntang kuman haya-hayak dengan Yetro intu taharep Hatalla.

Moses mangkat kare hakim

(Deu. 1:9-18)

13Andau jewue tinai Moses mamutus kare perkara je aton marak oloh Israel. Gawi te bara hanjewu sampai hamalem. 14Metoh Yetro mite taloh handiai je iawi Moses, ie misek, “Narai bewei je patut iawim akan bangsa toh? En musti taloh handiai toh ilalus awim kabuat, sampai baya awi balaku tirok bewei, kare oloh toh mendeng intu hetoh bara hanjewu sampai hamalem?”

15Tombah Moses, “Kare oloh toh dumah talih aku handak mangatawan kahandak Hatalla. 16Amon ewen hakapaut, ewen manaharep aku mangat perkaran ewen imutus awiku, tuntang aku mansanan akan ewen kare atoran tuntang kare parentah Hatalla.”

17Koan Yetro, “Dia bahalap kalote. 18Ikau mampaheka arepm, tuntang kare oloh te kea. 19Hining auh tirokku, palus Hatalla kareh mandohop ikau. Puna bahalap je ikau indu wakil bangsa toh intu taharep Hatalla, tuntang mimbit perkaran ewen Akae. 20Ikau patut majar ewen kare parentah Hatalla tuntang manarang cara belom je bahalap tuntang en taloh je patut ilalus ewen. 21Tapi beken bara te ikau patut mintih pire-pire oloh hatue je pintar harati. Nukas ewen te je jadi pamimpin hunjun sakoyan biti, saratus biti, lime puluh biti, tuntang sapuluh biti. Ewen te oloh je harajur mikeh tuntang manumon auh Tuhan, tau iharap tuntang dia manarima duit suap. 22Soho ewen bagawi kilau hakim bangsa toh, gagenep bitie mahunjun kare oloh je penda ie. Gawi te harajur ilalus ewen mahapan atoran. Baya kare taloh je mambatang ih je tau ewen mimbite akam. Tapi kapaut je korik ewen tau mamutuse kabuat. Taloh te kareh mandohop ikau, awi ewen omba mananggong gawi. 23Amon ikau malaluse tumon te, tuntang taloh te inyoho Hatalla, ikau kareh olih malalus taloh gawim. Uras oloh kareh buli dengan kahanjak awi perkaran ewen golong jadi.”

24Moses manumon auh tirok Yetro, 25tuntang mintih kare oloh je pintar harati marak bangsa Israel. Ie mangkat ewen jadi pamimpin hunjun sakoyan biti, saratus biti, lime puluh biti tuntang sapuluh biti. 26Gawi kilau hakim ilalus ewen hunjun bangsa Israel. Taloh je mambatang imbit ewen akan Moses, tapi je kori-korik imutus awi ewen kabuat. 27Limbah te Moses malapas Yetro buli akan lewue.

Currently Selected:

EKSODUS 18: NIJ

Highlight

Copy