EKSODUS 17

Danum bara batu hai

(Num. 20:1-13)

1 # Num. 20:2-13 Palus salepah ungkup Israel malihi padang pasir Sin tuntang bindah bara ije eka akan eka beken tumon je irentah awi Tuhan. Hong sinde katika ewen mampendeng kemahe intu Rapidim, tapi intu hete jaton danum, 2palus ewen bakotok dengan Moses hayak hamauh, “Tenga akan ikei danum ihop.” Moses tombah, “Mbuhen keton bakotok tuntang maningkes Tuhan?”

3Tapi kare oloh te paham teah belaie toto tuntang ewen te magon bakotok dengan Moses. Koan ewen, “Mbuhen ikau mimbit ikei balua bara Misir? Mangat ikei, kare anak ikei tuntang meto ain ikei matei awi teah belaie?”

4Te Moses balakudoa intu Tuhan koae, “Narai je patut iawiku akan kare oloh toh? Item, ewen handak mamanting aku hapan batu.”

5Koan Tuhan dengan Moses, “Tehau pire-pire pamimpin, tanjong haya-hayak dengan ewen helo bara bangsa toh. Imbit kea sukah je ihapam mamukul Nil. 6Aku kareh mendeng intu hila baum hong hunjun batu hai intu Bukit Sinai. Hewes batu te, palus danume kareh balua sampai kare oloh te tau mihop.” Moses malaluse tumon auhe taharep matan kare pamimpin oloh Israel.

7Eka te inampa arae Masa#17:7: Masa: Riman aran toh huang basa Ibrani iete “maningkes”. awi intu hete oloh Israel jari maningkes Tuhan metoh ewen misek, “En Tuhan aton mampahayak itah atawa dia?” Eka te inampa arae kea Meriba#17:7: Meriba: Riman aran toh huang basa Ibrani iete “bakotok”. awi intu hete oloh Israel bakotok.

Kalahi dengan oloh Amalek

8Oloh Amalek dumah tuntang mawi oloh Israel intu Rapidim. 9Koan Moses dengan Yosua, “Intih pire-pire oloh mangat malawan oloh Amalek. Jewu aku mendeng intu hunjun bukit, mimbing sukah je nyoho Tuhan aku mimbite.” 10Yosua malalus taloh je irentah akae. Ie haguet malawan oloh Amalek. Hemben te kea Moses, Aron tuntang Hur mandai akan hunjun tantan bukit. 11Katahin Moses manggatang lengee, oloh Israel manang. Tapi amon Moses mampamohon lengee, oloh Amalek je manang. 12Metoh Moses heka, Aron tuntang Hur manduan ije batu mangat Moses tau mondok; Aron tuntang Hur mendeng intu hila sambil tuntang gantaun Moses hapan manyangga lengee mangat tetep hagatang sampai matanandau belep. 13Kajariae oloh Amalek impakalah awi Yosua.

14 # Deu. 25:17-19; 1 Sam. 15:2-9 Koan Tuhan dengan Moses, “Surat tahiu kamanang toh mangat tetep ingenang. Sanan akan Yosua, je aku kareh mampalomos oloh Amalek.” 15Palus Moses mampendeng ije mesbeh tuntang manampa arae “Tuhan te Banderangku.” 16Koan Moses, “Imbing ganto-gantong banderan Tuhan!#17:16: Imbing … Tuhan: Hai kemungkinan jetoh riman auh te. Tuhan hakalahi malawan oloh Amalek sampai katatahie!”

Currently Selected:

EKSODUS 17: NIJ

Highlight

Copy