MATIUS 7
7
Ap enpem wene mbarurak wene
7:1-6
(Lk 6:37-38,41-42)
1”Mbal Pem Nagawan-nen kenpem wene mbaruwa naru, kit-nen na ap enpem wene mbarurak pug-o. 2Nde, kit-nen ap enpem wene mbarugup iri na bem-net Mbal Pem Nagawan-nen kit kenpem wene mbaruwa-o. Nde, kit-nen ap ndak wat unpugup iri na bem-net Mbal Pem Nagawan-nen kit ndak wat kunpuwa-o. 3Kir-e noluk-nen kenggam erengen arem worasu kopkap marik iri na kali-t nde, kit kondomok kenlengen arem worasu e ebis nggugurik iri na kali bug-o? 4Nde, kit kondomok kenlengen arem e ebis nggugurik iri na worala-t nde, kir-e kennggam iri na yak togolar-e: ’Kat kerengen arem worasu kopkap iri wabeyeg-o’ luk noluk-nen jak tili-o? 5Ken ambik konmbol pem lagwi nap wa-e. Kit kondomok kenlengen arem worasu e ebis nggugurik iri nanduk waber-o. Kit kenlengen op-net kit kennggam erengen arem worasu kopkap iri konag-et wabobok-nen.
6Marak kopkap lak mende iri-ge yengge wok turak pug-o. Nde, kit kenarengge onggo nggulok pugwi kerep iri-ge wam mbo wok turak pug-o. Wam iri ujok-nen lul lul wosa keya buruk, nden karuk lobok yosolar-e, mbal kunpuwa-o.”
Tepan yurak wene
7:7-12
(Lk 11:9-13)
7”Nggi yer-o. Nggi yogola-ge, wok kunduwa-o. Kore yer-o. Kore yogola-ge, kagub-o. Tu lel lel ker-o. Lel lel kagola-ge, tu kuwarak kunpuwa-o. 8Nde, nggi yuwa nab-e wanuwar-o. Nde, kore yuwa nab-e kujwar-o. Nde, tu lel lel kujwa nab-e tu kuwarak ubuwa-o. 9Nde, kit kennggendumu ap misik ambara-nen: ’Mburu wok niri-o’ yosola-ge, eid-nen kerep nde wok tuwa-a? 10Are, ambara-nen: ’Keyane wok niri-o’ yosola-ge, waro nde wok tuwa-a? 11Iri ala-ge, kir-e meya yugwi nab-et nde, konak mende nak kinlirak wok undugwi kenaru me, Kineid aid arem woraso-nen-e at ebem nggi yuwa nap iri na konak mende wok unduwa irir-o!
12Ap-nen kwat kunpurak perali iri nggal-et kit-nen na irit kwat enper-o. Iri kwarogolar-e, imiri mbarak pidnak wene-nen yidnak yidnak min Mbal Pem Nagawan ene lomboksa yugwi nap-nen yidnak yidnak min ndak ndak tak pugwi irir-o.”
Tula mboronggo wene
7:13-14
(Lk 13:24)
13”Tumende mboronggo iri nggwe nggwer-o. Nde, lak tak unpurak tumende iri-ge nggok, nde, tula na owak la-nen yusu-o. Nde, ap mondok kwarat-nen tula iri nggwe mbitli-o. 14Nde, unluk nak wolmomtak tumende iri-ge mboronggo, nde, tula na marik me, tumende iri nggwe-ge ap wonarak nak-nen nggwili-o.”
Engen pidnak pem-net e yenggerak pugwi wene
7:15-20
(Lk 6:43-44)
15”Enesiget wene owak ngara yugwi nap iri enabiyem-o luk kwil kwalsa wolmer-o. It iri na kit kendamlobok yogolar-e, enpage-ge lomba wam abage nggal lobok yuwa-t nde, it enarem-e ndemeret isilepma worak ndakngge-net yili-o. 16It iri na-nen engen pidnak pem-net yenggerak unpugub-o. Isile worak e pirim-nen engen-e tona nde poso bug-o. Nde, kere isile worak momnid-nen engen-e tomate nde poso bug-o. 17Iri nggal-et e konak-net engen-e konak poso-o. Nde, e meya-nen na engen meya-t poso-o. 18E konak-nen-e engen meya-ge poso bug-o. Nde, e meya-nen na engen konak poso bug-o. 19Nde, e-nen engen konak yigit lak ala-ge, e na-ge ndara kan pugwi-o. 20Iri bem-e engen puwa iri bem-nen yenggerak eneyagub-o.”
Ininggi-nen kwarugwi iri-ge enne-nen nak yugwi nggal-e lag-o
7:21-23
(Lk 13:25-27)
21”An nimin-e: ’Nagawan Indo wa-e. Nagawan Indo wa-e’ yugwi nap oboksa-nen-e Mbal Pem Nagawan-nen tenagaidnak wi ngguwa bug-o. Are, an Neid aid arem woraso na indi-n pidnak nak kwarugwi nap it nak-nen ngguwa-o. 22Worok tak puwa tarem-e ap kwarat-nen an yak norogolar-e: ’Nagawan Indo wa-e. Nagawan Indo wa-e. Nir-e kat kunu bem-et aid wene ap yak ondogolat, kat kunu bem-et kugi wirik pogolat, kat kunu bem-et kwiye worak mende kwarat kwarige na-t nde-o!’ luk yuwa-o. 23Iri yogola-ge, an-nen nam-et it yak ondosolar-e: ’Kir-e an naru bug-o. Kit meya nak kwat tenak woragwi nap wa-e. An neram-nen mberer-o’ ” luk yak indi-min-o.
Mberen nap-nen o wiridnak wene
7:24-27
(Lk 6:47-49)
24”Iri ala-ge, an-nen yidnak wene kuluruk, kulidnak iri ndak ndak kwaruwa nab-e, ap indi nggat nggat worak-nen at uwi worosolar-e, kerep pem wirid nap iri na nggal-nen yili-o. 25Talme mbosolat, yi ebe wasolat, obube puk kasolar-e, o iri na wat kagaij-et nde, o iri-ge kerep pem wiridnak me, landera tud yigit lak yij-o. 26Nde, an-nen yidnak wene kulurug-et nde, kulidnak iri na kwarigit lak yili nab-e, at indi lak nap-nen at uwi worosolar-e, yi sisiri bem wirid nap iri na nggal-nen yili-o. 27Talme mbosolat, yi ebe wasolat, obube puk kasolar-e, o iri na wat kagaidnggal-e, o iri na landera tud yij-o. O iri na tud yosolar-e, mondok yigerep yagarepsa tud yij-o!” luk yij-o.
Yesus amawi min-et yoso wene
7:28-29
28Yesus-nen wene iri na ndegera lak tak posola-ge, ap kwarat iri na-ge at-nen mul ondoso wene na bem wi langgu mbariga-o. 29At iri na-ge it mul undugwi engga enaru nap-nen yugwi nggal-e lag-o. Are, at na-ge ene amawi worak irit mul indij-o.
Currently Selected:
MATIUS 7: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
