MATIUS 8
8
Yesus-nen ndigiril laso mbijap ebem mbidnak nap misik ambut tak pid wene
8:1-4
(Mk 1:40-45; Lk 5:12-16)
1Yesus-e ndobo bem mbuwasola-ge, ap kwarat at imbirik mbuwaiga-o. 2Iri tarem-e ndigiril laso mbijap ebem mbidnak nap misig-e at eram lobok yarik, at eralu tud luk-nen yak tosolar-e: ”Nap wa-e. Kat-nen nde an ud yu ambut tak nuburak kindingen ala-ge, ambut tak nibi-o” luk yak tij-o. 3Yak tosoloma-ge, Yesus na at inggi-ge ap iri na ebem puruk-nen yosolar-e: ”Iri kwat kuburak nindingen-o. Ambut min-o” luk yosoloma, ereya nanet at ebem mbidnak ndigiril laso mbijap iri na ambut yij-o. 4Alama-ge, Yesus-nen at yak tosolar-e: ”Kat kwat kibidnak yu-ge ap mondok yak undurak pug-o. Are, tepan ombo eram mburugundik, ambut tak kibidnak iri nuk kasola-ge, ap pidsa-nen ’Ndemeret ki yamu-o’ yuwakluk, Musa-nen yidnak yidnak kwarosolar-e, Mbal Pem Nagawan amanggim pugwi mende irit pi-o” luk yak tij-o.
Yesus-nen Oroma nap san winde ndegel oboso nap ki rak pid wene
8:5-13
(Lk 7:1-10; Yo 4:46-53)
5Nde, Yesus na-ge o Kaperenaum iri me nggosoma, Oroma nap san winde misig-e at imin lid pid luk-nen at emengen mbarosolar-e: 6”Nab-o. An ndegel noboso nap misig-e an nama-nen nene yoso ondoro iri na me nak mbinggirik nak worasolar-e, at inggi ijok kambung puksa woralar-e, andi-nen yane wat tenak worasu-o” luk yij-o. 7Yosoloma-ge, Yesus-nen yosolar-e: ”Iri ala-ge,an lobok yimindig-e, ki rak ibimin-o” luk yij-o. 8Yosoloma-ge, at san winde-nen yosolar-e: ”Meyog-o, nab-o. Kat-nen an nggal nama nggurag-e meya-o. Are, kat kene nak-nen yi-o. Kene nak yugun iri-net an ndegel noboso nap iri-ge ki ma-o. 9An-e an nagawan urugom nap-nen yusu-o. Nde, an nurugom na san winde na woralir-o. Nde, an-nen ap misik yak tosolar-e: ’Mbiri-o’ luk yak tosola-ge, ar-e mborosor-o. Nde, misik yak tosolar-e: ’Yu me lobok yi-o’ luk yak tosola, ar-e lobog-et yoso-o. Nde, an ndegel noboso nap yak tosolar-e: ’Yu kwari-o’ luk yak tosola-ge, ar-e iri na-t kwaroso-o” luk yij-o. 10Iri yosoloma, Yesus-nen wene iri kolosoluk, wi luk, at imbirik nili nap yu na yak ondosolar-e: ”An-nen yak kendeyeg-o: Isarael nap ennggendumu-nen-e indi angin tubu yidnak nap misik mbi yu nggal an-e kaso bug-o. 11An-nen yak kendeyeg-o: Ap kwarat, mo luwaso sa-nen na, mo mboso sa-nen na, lobok yuwarik, Mbal Pem Nagawan-nen tenagaidnak wi iri me mburu nokluk, Abaram min Isak min Yakub min inmin kore yuwa-t nde, 12Mbal Pem Nagawan-nen tenagaidnak wi na winde nab-et nde, mondok ndamuk arem iri me mbo unpuwama, yip langgu mbarogolat, eneyak nggirit marogolat wolma-o” luk yij-o. 13Iri yuruk, Yesus-nen san winde na yak tosolar-e: ”Kar-e kama mbiri-o. Kat kindi angin tubu yigen iri-ge luj-et ma-o” luk yij-o. Nde, wene iri na yosola ereya na-net ndegel oboso nap iri na-ge ki yij-o.
Yesus-nen ap kwarat ki rak inpid wene
8:14-17
(Mk 1:29-34; Lk 4:38-41)
14Iri luk, Yesus na-ge Peterus ama nggwidnggal-e, Peterus owan na-ge kugi embem wuloksa wiridnak me, mbinggirik worasola, kagaij-o. 15Karuk, at-nen kwe na inggi tenabosola, embem wuloksa wiridnak na lak yosola, kwe na men yosolar-e, Yesus ndegel ibij-o.
16Iri luk, o keyama nggwe-ge kugi enarem nggwidnak nap kwarar-e Yesus eram inpil lobok yogola-ge, Yesus-e at ene nak-nen kugi kwarat iri na wirik posolat, kugi indidnak nap oboksa na ki rak onposolat yij-o. 17Iri kwarid iri-ge Mbal Pem Nagawan ene lomboksa yoso nap Yesaya-nen yosolar-e: ”Nit-nen andi bandi kagwi at nak-nen kud tosolat, ki rak nonposolat yij-o” luk yid iri na ndak tak posolat-nen yij-o.
Yesus imbirik nurak wene
8:18-22
(Lk 9:57-62)
18Nde, Yesus-nen at lop lop tiga nap kwarat iri na eneyarug-e, ”Yi koma eyak ele bem ndil log-o” luk yij-o. 19Nde, imiri mbarak pidnak wene aru nap misig-e Yesus eram lobok yosolat-nen yosolar-e: ”Mul Nondoso Nap wa-e. Kat mburugun sa iri-ge an-nen na kimin-et mbirimin-o” luk yij-o.
20Iri yosoloma, Yesus-nen yak tosolar-e: ”Ndakngge nene yoso ondoro kerep eyanggo worasu-o. Nde, towe na nene yoso sa uwi na worasu-t nde, Ap Ambara mbinggirik woraso ondoro-ge lag-o” luk yij-o.
21Yosoloma-ge, Yesus imin noso misik-nen yosolar-e: ”Nagawan Indo wa-e. An-e neid nanduk yapma pil mbereyek-nen eyo yak niri-o” luk yak tij-o. 22Yosoloma-ge, Yesus-nen wene erep nggarosolar-e: ”An nimin ni-o. Ap wat yidnak iri-ge wat yidnak nap-nen yapma puwag-o” luk yij-o.
Yesus-nen obube kwarat ndong tak pid wene
8:23-27
(Mk 4:35-41; Lk 8:22-25)
23Iri luk, Yesus na-ge e koma arem nggosola, at owosirak na at imin nggwiga-o. 24Nggwigarik mburukmu, mimo ereya na-net obube kwarat yi koma iri na puk kasolar-e, yi nggweyerep nggweyerep lobok yosolar-e, e koma na arem-e yi-nen yebet yij-o. Alat nde, Yesus na-ge komo nene yij-o. 25Nene yosola-ge, at owosirak na at eram lobok yigarik, at uruk tak puruk-nen yak togolar-e: ”Nagawan Indo wa-e. Ninmiri yi-o! Nir-e yi mbili-o,” luk yak tiga-o.
26Yak togolikma-ge, Yesus-nen it yak ondosolar-e: ”Kwara kinndi angin tubu yugwi buk nap wa-e. Kir-e noluk-nen kwiye kali-o?” luk yak indij-o. Yak ondosoluk, at na men luk yarik, obube min yi min na ”Kondok min-o” yosoloma-ge, obube min yi min na kondok yij-o.
27Iri kwarosoloma-ge, ap iri na wi luk-nen yogolar-e: ”Ap yu-ge no nap kali-o? Obube min yi koma min-et nde at-nen yidnak wene kuluruk, at-nen yidnak yidnak nak kwarij-o!” luk yiga-o.
Yesus-nen kugi enarem nggwidnak nap mberen na ki rak inpid wene
8:28-34
(Mk 5:1-20; Lk 8:26-39)
28Iri luk, Yesus-nen eyak ele bem Nggarara nap enma wok yosoma-ge, ap yapma inpidnak sa-nen lobok yidnak nap mberen inmin lid pid yij-o. It iri na-ge kugi enarem nggwidnak nap me, it insilepma kwarat ala-nen it enaye ab-e iri nggwe mburugwi tula keya biga-o. 29It enmberek enne nggulok pem-nen yogolar-e: ”Mbal Pem Nagawan Ambara wa-e. Kar-e nit ninmin-e no kwareyeklug-o? Nenpem wene mbarurak tarem awo worala kagit, andi bandi rak nenpeyekluk lobok yusu-a?” luk yiga-o. 30It iri worali sa we koroga nggal-e wam kwarat mungga nasolat woragaij-o. 31Nde, kugi iri-nen Yesus emengen mbarogolar-e: ”Kat-nen wirik nunpurak ala-ge, wam iri na arem ngguwok-nen wirik ninpi-o” luk yiga-o. 32Yogolikma-ge, Yesus-nen it yak ondosolar-e: ”Mberer-o” luk yak ondosoloma-ge, it na keya unpuruk mborogolar-e, wam ereba na arem nggwiga-o. Iri ala-ge, wam kwarat iri na oboksa puburak mberebak nggwe mbosolar-e yi koma arem pip yonggok ndonggok wat yij-o.
33Wam iri na yik karok woragwi nab-e pong pang mbirigarik, o silmu wok luk, iri kwaridnak wene na ndindera yak ondogolat, kugi enarem nggwidnak nap kwat inpidnak wene na min-et yak indiga-o. 34Yak ondogolikma-ge, o iri me woragwi nap oboksa-ge Yesus imin lid pid yuwokluk mbirigarik, at imin lid pid luk, it enma iri me wolma naru, iri me keya buruk mburuwakluk, at emengen mbariga-o.
Currently Selected:
MATIUS 8: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
