MATIUS 9

Yesus-nen kambung puk tak woraidnak nap ki rak pid wene

9:1-8

(Mk 2:1-12; Lk 5:17-26)

1Iri kwatlug-e, Yesus na-ge e koma arem ngguruk, yi koma eyak ele bem ndil lagarik, at ambik ama wok yij-o. 2Wok yosoloma-ge, ap erep-nen-e kambung puk tak woraso nap mbi nene yoso ondoro mbinggirik worasola, ondoro min kud turuk Yesus eram ibil lobok yiga-o. Ibil lobok yogolikma-ge, Yesus-nen it ap iri na inndi angin tubu yidnak na kasoluk-nen kambung puk tak woraso nap iri yak tosolar-e: ”Nambara wa-e. Kwiye kasu meyog-o. Kat meya yidnak iri-ge namberam tak pigi-o” luk yak tij-o. 3Iri yak tosoloma-ge, it imiri mbarak pidnak wene enaru nap erep na-nen peragolar-e: ”At yu-ge Mbal Pem Nagawan obok pusu-o” luk peraiga-o. 4Nde, Yesus-e it inndi-n peraidnak iri na aru luk-nen it yak ondosolar-e: ”Kir-e noluk-nen meya iri nggal iri yebet kali-o? 5’Kat meya yidnak iri-ge namberam tak pigo-o’ luk yak turag-e angin, lak? Are, ’Kar-e men luk mbiri-o’ luk yak turak nde angin-a? 6Alat nde, nggweyak ma yu me-nen ap meya yidnak amberam tak purag-e Ap Ambara inggem pidnak worasu-o luk yenggerak kabog-o” luk yak indij-o. Yak unduruk-nen kambung puk tak woraso nap iri na yak tosolar-e: ”Kar-e men luk, nene yoso kondoro kud turuk, kama mbiri-o” luk yak tij-o. 7Yak tosoloma-ge, ap iri na men luk yarik, ama mbirij-o. 8Iri kwarosola karuk, ap kwarat na-nen kwiye luk, Mbal Pem Nagawan-nen amawi nggulok iri at wok tidnak ala karuk, Mbal Pem Nagawan erembel waniga-o.

Yesus-nen Matius na wene mbo bid wene

9:9-13

(Mk 2:13-17; Lk 5:27-32)

9Iri luk, Yesus-nen o iri na me keya buruk mborosoma-ge, pemerinta enmanggim tol ndok woroso nap unu-ge Matius iri na-ge at tol ndok woroso o ma koreyak worasoma kagaij-o. Karuk yarig-e, at-nen ap iri na yak tosolar-e: ”An nimin ni-o” luk yak tosoloma-ge, Matius iri na men lug-e, Yesus imin mbirij-o.

10Iri luk, Yesus na ap iri ama-nen nunggwi mende nasoma-ge, tol ndok wurugwi nap min meya nak kwarugwi nap min lobok yigarik, Yesus owosirak inmin kore luk, totno ningga-o. 11Nonggolat woragola, Parisi nap-nen eneyarug-e, it-nen Yesus owosirak yak ondogolar-e: ”Nggomo Ondoso Nap iri-ge noluk-nen tol ndok wurugwi nap min meya nak kwarugwi nap min iri na inmin totno nasolat worasu-o?” luk yak indiga-o. 12Yak ondogoloma, Yesus na wene iri kuluruk yarik, at-nen yosolar-e: ”Ap ki-nen-e ndoktet ukwe-ge lag-o. Are, kugi worak nap-nen perak nde ndoktet ukwe-o. 13Mburugupndig-e, Mbal Pem Nagawan engga mbarak pem-nen yosolar-e: ’Wam wosa namanggim pugwi iri-ge an nindingen-e lag-o. Are, ap enabuwa kagwi iri perak nde nindingen-o’ luk yid iri-ge kwara kenaru mer-o. Nde, an-nen-e luk tak nak kwarugwi nap na wene mbo enpeyekluk lobok yigi-ge lag-o. Are, meya kwarugwi nab-et wene mbo enpeyekluk lobok yukmu-o” luk yij-o.

Mburu ninggit lak, we wolmomtag-e yu nggal-o yidnak wene

9:14-17

(Mk 2:18-22; Lk 5:33-39)

14Iri luk, Yoanes imin nugwi nap iri-ge Yesus eram lobok luk-nen at kin wok pogolar-e: ”Nit min Parisi nap min-e pelin na pelin na mburu ninggit lak, we woragwi-t nde, kat kowosirak-nen perak nde mburu keya bili buk yu-ge noluk-nen iri kwatli-o?” luk kin wok ibiga-o. 15Kin wok obogolikma-ge, Yesus-nen it yak ondosolar-e: ”Kwe wanurak nap iri na anggamirak-nen-e kwe wanurak nap na it inmin worasola-ge, inndi puru pera yugwi-a? Mondok lag-o! Alat nde, kwe wanurak nap na it ennggendumu-nen wok uburak tarem wok yosola-n perak nde mburu ninggit lak, we wolma-o.

16Ap-nen-e sum umbuk ndelep yidnak iri na panggarogolar-e, sum ngget min panggarugwi bug-o. Sum ngget iri min panggaruwarig-e, sum ngget iri amawi-nen-e sum umbuk ndelep yidnak na ebem lud terak mena ndelep yuwa-o. 17Nde, anggut engen amburu nggeret mbela pidnak iri-ge wam aboro-nen konidnak yimbe taro arem na wonangasa pil nggugwi bug-o. Iri kwasa pil nggogola-ge, wam aboro yimbe taro iri na tugwak yosolar-e anggut engen amburu na nggilara mbosolat, wam aboro yimbe na meya yosolat ma-o. Alat nde, anggut engen amburu nggeret mbela pidnak iri-ge wam aboro-nen konidnak yimbe ngget arem-et wonanggasa pil nggugwi-o. Pil nggosoma-ge, engen amburu min yimbe min-e opirit wolmar-o” luk yij-o.

Yawuri nap tepan yugwi ma winde ara wene min Yesus usum tenagaid kwe wene min

9:18-26

(Mk 5:21-43; Lk 8:40-56)

18Nde, Yesus-nen wene iri yak ondosoma ereya na-net Yawuri nap tepan yugwi ma winde misig-e at eram lobok yarik, at urugom tud luk-nen at yak tosolar-e: ”An nara-ge yanem-et wat yij-et nde, kat mburugundik, kinggi-nen at tena posola, urug-et ma-o,” luk yak tij-o. 19Iri yak tosoloma, Yesus na men luk yarik, ap iri na imbirik mborosola-ge, at owosirak-nen at imin mbiriga-o.

20Mburukmu-ge kwe misik, olengen duabelas woralar-e, eyabi mborosolat nak woraso kwe iri-nen at ombol nggwe wok yosolar-e, at usum erep iri na ebem inggi pij-o. 21Kwe na-ge at ondomok indi arem-nen yebet kasolar-e: ”An-e at usum erep nak ebem ninggi pimindig-e, ki-t timin-o” luk yebet kagaij-o. 22Alat nde, Yesus na nden karuk, kwe iri na karuk-nen at yak tosolar-e: ”Nara wa-e. Kindi tugup lak wolmin-o. Kat kindi angin tubu yigen iri-net ki yaga wok kirij-o” luk yak tosoloma ereya na-net kwe iri na ki yij-o.

23Iri luk, Yesus na-ge Yawuri nap tepan yugwi ma winde iri na ama wok yidnggal-e, poba ene yugwi nap min ap kwarat iri na enne sa nggwa mbukmu eneyaruk yarik, 24at-nen yosolar-e: ”Kit pidsa mbepme wumer-o. La kwe iri-ge wat yij-e lag-o. Nene yusu-o” luk yosoloma-ge, it iri-nen-e Yesus na nda wat ibiga-o. 25Alat nde, ap iri na mbepme langgara inpil warug-e, Yesus na-ge la kwe iri worasu sa nggosolar-e, la kwe na inggi tena posoloma, la kwe na-ge men yij-o. 26Alama-ge, iri kwarid wene na obog-e o iri me oboksa wigak yil mbirij-o.

Yesus-nen enlengen ngguru nap mberen enlengen kuwarak pid wene

9:27-31

27Iri luk, Yesus na o iri me-nen mborosola-ge, enlengen ngguru nap mberen iri-ge at imbirik mborogolat-nen enne ngguloksa yogolar-e: ”Ndaud Ambara wa-e. Nenabuwa ki-o!” luk yil yil mbiriga-o. 28Iri yogola, Yesus na o mbi me nggwarik worasoma-ge, it enlengen ngguru nap ereya na at eram lobok yogola, at-nen it yak ondosolar-e: ”At-nen ki rak nunpurag-e ndak-nen yusu-o luk kit kinndi angin tubu yili, lak?” luk yak ondosoloma-ge, it-nen yogolar-e ”Nab-o. Ye, ninndi angin tubu yili-o!” luk yiga-o. 29Yogolikma-ge, Yesus na it enlengen pem at inggi puruk-nen yak ondosolar-e: ”Kit kinndi angin tubu yigep iri nggal-et kwat mag-o” luk yak ondosoloma-ge, 30it enlengen-e kuwak yij-o. Iri ala-ge, Yesus-nen at ene amawi min yak ondosolar-e: ”Wene yu-ge mondok ap yak undurak puk na-e!” luk yak indij-et nde, 31it iri na mborogolar-e, Yesus obog-e o iri me oboksa wigak tak pil mbiriga-o.

Yesus-nen ene lak nap ki rak pid wene

9:32-34

32Mberen nap iri na mborogola ereya na-net at arem-e kugi worasola me, ene lak tak pidnak nap misig-e Yesus eram wok uburuk lobok yiga-o. 33Nde, kugi iri na wirik posoloma ereya na-net ap iri na-nen ene yosola-ge, ap kwarat iri-nen yogolar-e: ”Yu nggal yu-ge Isarael nap enma yu menen-e mondok kagwi bug-o” luk wi langgu mbariga-o. 34Yogolikma-ge, Parisi nap-nen yogolar-e: ”Kugi nagawan-nen amawi wok tidnak pem-nen kugi wirik pusu-o” luk yiga-o.

Yesus-nen ap kwarat enabuwa kagaid wene

9:35-38

35Iri luk, Yesus na-ge o siri nggulok me wok, o siri marik me wok, oboksa waring kasolar-e, Mbal Pem Nagawan uwi worak ma-nen Mbal Pem Nagawan-nen tenagaidnak wi wene aid wene na yak ondosolat, yi kugi ndi kugi enpem mbidnak nap min andi bandi enpem mbidnak nap min ki rak inpil waring kagaij-o. 36Iri kwarosolat-nen ap kwarat iri na eneyagaidnggal-e, it iri na-ge ndeyak-nen lomba wam ombo lak me, mbilarak woraso lomba wam nggal ala karuk, it enabuwa kwarat kagaij-o. 37Karuk, at owosirak iri na at-nen yak ondosolar-e: ”Ogore yidnak kwarat worasu-t nde, ndagurak nab-e marig-et nag-o. 38Iri bem-e, ogore yidnak iri winde nap iri na emengen mbarogolar-e: ’Ogore yidnak iri ndagil mburuwakluk, ndagurak nap wirik inpi-o’ luk at emengen mbarer-o” luk yak indij-o.

Currently Selected:

MATIUS 9: inondx

Highlight

Copy