Luka 18
18
Ngerekano ya Mũka ntigwa na Mũgambithania
1Jesũ agĩcoka akĩa arutwa bae ngerekano ya kũbonia nĩbabatiĩ kũrombaga rĩonde batĩkũũrwa nĩ inya. 2Akĩbeera, “Tauni nene na nĩ kwarĩ mũgambithania ũmwe ũtakĩrĩte Ngai kana atĩĩa muntũ. 3Na o kũu ntũũrani ĩu nĩ kwarĩ na mũka ntigwa aatũũrĩte athijaga kwa mũgambithania ũu kũmwĩra, ‘Ndũĩrĩĩra ngwate gĩoto kĩrĩ mũnthũ wakwa.’ 4Ntukũ nyingĩ nĩjiathirire mũgambithania aregete gũtethia mũka ũu ntigwa, ĩndĩ ntukũ ĩmwe mũgambithania akĩĩra na nkoro atĩrĩ, ‘Nĩ ma ntĩkĩrĩte Ngai kana ntĩa muntũ, 5ĩndĩ nĩ kaaba ndũĩrĩĩre mũka ũũ atige kũndĩnia. Nĩũntũ rĩ, nkarega kũmũĩngĩria bũrĩa akwenda akanogia mũno nĩ kwĩjaga o rĩonde.’”
6Mwathani akiuga atĩrĩ, “Bũkwĩgua bũrĩa mũgambithania ũtĩ gĩoto augire. 7Anga Ngai no arege kũrũĩrĩra athure bae, na barĩa bamũkaagĩra mũthenya na ũtukũ? No aturuure kũbatetheria? 8Ndabwĩra akabatetheeria na mpũĩ mũno. Ĩndĩ rĩ, Mwana wa Muntũ akethĩra antũ bamwĩtĩkĩtie gũkũ ndĩ rĩrĩa akeeja?”
Ngerekano ya Mũfarisai na Mũrutithia goti
9Jesũ agĩcoka akĩejana ngerekano ĩno kĩrĩ antũ barĩa beĩtĩkĩtie atĩ nĩ bo aagĩru na bakaũthia antũ barĩa bangĩ: 10“Ĩndĩ ĩmwe antũ baĩrĩ nĩbaitirie Hekarũni kũromba. Ũmwe aarĩ Mũfarisai, na ũu ũngĩ mũrutithia goti. 11Mũfarisai nĩ arũngamire antũ ae wenka akĩromba atĩrĩ, ‘Ngai nĩngũgũcokeria nkatho nĩũntũ niũ ntĩkari ta antũ barĩa bangĩ bakari; barĩa batũmagĩra mawara gũtunyana, antũ baganu, athũngĩĩri, o na kana ta mũrutithia goti ũũ. 12Nĩndĩimaga kũrĩa maita maĩrĩ gwa kiumia na nkaruta gĩcuncĩ gĩa ĩkũmi kĩa gĩntũ o kionde ndũgũmĩte.’ 13Ĩndĩ we mũrutithia goti arũngamire o gataaria, na o na ataũmbire kũraitha ĩgũrũ; enyiirie, akĩĩnĩka metho ndĩ akĩromba akiugaga, ‘Ngai mbĩguĩra kĩao, niũ muntũ mwĩyia!’ 14Ndabwĩra atĩrĩ, mũrutithia goti ũu nĩ enũkire kwae eguithanĩtie na Ngai nkũrũki ya Mũfarisai. Nĩkwĩthĩrwa muntũ o wonde wĩneneagia akanyiua, nawe ũrĩa wĩnyiagia akaneneua.”
Jesũ kũtharima twana
(Mat 19.13-15; Mar 10.13-16)
15Antũ bakĩmũretera twana o natu, atwigĩĩra njara; na arutwa bakwona ũgu bakĩbakania. 16Ĩndĩ Jesũ agĩĩta twana tũu akiuga, “Ĩtĩkĩĩriani twana twĩje kĩrĩ ni. Tigani gũtũgiria, nĩkwĩthĩrwa Ũnene bwa Ngai nĩ bwa barĩa batari ta tu. 17Ndabwĩra na ma atĩrĩ, muntũ ũrĩa ũtĩgetĩkĩĩria Ũnene bwa Ngai ta kaana atĩkarotonya ku.”
Mũthaka warĩ mũtongu
(Mat 19.16-30; Mar 10.17-31)
18Mũtongoria ũmwe akĩũria Jesũ, “Mũrutani mwega, nĩ atĩa nkarũtha nĩkenda mbone mwoyo wa tene na tene?”
19Jesũ akĩmũũria, “Nĩmbi ĩgũtũma ũmbĩta mwega? Gũtĩ muntũ mwega o tiga Ngai wenka. 20Gwe nĩ wijĩ bũrĩa mathani maugĩte; ‘Ũtĩkathũngĩĩre, Ũtĩkaũragane, Ũtĩkaie, Ũtĩkarute ũira bwa ũrongo, Tĩaga abagu na nyũkwe.’”
21Mũtongoria ũu akiuga, “Ntwĩre mpingagia mau monde kuuma ndĩ mwĩthĩ.”
22Rĩrĩa Jesũ egwire ũgu akĩmwĩra atĩrĩ, “Kũrĩ na ũntũ bũmwe ũtigarĩtie. Thi wendie into jiaku jionde, ũgaĩre nkĩa mbeca iu ũkona, na ũkagĩa na ũtonga ĩgũrũ. Ũcoke wĩje ũndingate.” 23Mũtongoria ũu nĩ arĩtũĩrwe nĩ nkoro mũno akwĩgua ũgu, nĩũntũ aarĩ mũtongu mũno.
24Jesũ akwona bũrĩa muntũ ũu aritũĩrwa nĩ nkoro akiuga, “Kũrĩ na inya atĩa antũ barĩa batongu gũtonya Ũneneni bwa Ngai! 25Tontũ nĩ ũntũ bũthũ nkamĩra gũtonyeera gatũrĩni ga cindano#18.25 gatũrĩni ga cindano: Gapingiro ga kajĩra ka withũ kũu Jerusalemu. Nĩ mũnene wa kũu na ekaria bae akĩ bakaijĩ. nkũrũki ya gĩtonga gũtonya Ũneneni bwa Ngai.”
26Antũ barĩa beguire ũgu bakĩũria Jesũ, “Nũũ ĩndĩ ũmba kwonoka?”
27Jesũ akĩbeera, “Maũntũ marĩa maremaga antũ matĩremaga Ngai.”
28Petero akiuga atĩrĩ, “Twiũ nĩ tũtigĩĩte mĩjiĩ yetũ twakũthingata.”
29Jesũ akĩbeera atĩrĩ, “Ndĩbwĩra na ma atĩ, gũtĩ muntũ ũtigĩte mũjiĩ kana mũka wae, kana ba mũruagina na ba mwarwagina, kana ajiari, kana jiana jiae nĩũntũ bwa gũtungata Ũnene bwa Ngai, 30ũtĩkagwata maita maĩngĩ ma iu atigĩte kagiitani gaka, na mũthiani agwate mwoyo wa tene na tene.”
Jesũ kwaria ĩita rĩa mathatũ maũntũ megiĩ gũkua kwae
(Mat 20.17-19; Mar 10.32-34)
31Jesũ nĩ etire arutwa bae nkirebe akĩbeera, “Ka ndĩbwĩre, tũthiĩte gwitia tũkinye Jerusalemu, na bũrĩa bunde bwandĩkirwe nĩ iroria bwĩgiĩ Mwana wa Muntũ no mwanka bũinge. 32Nĩkwĩthĩrwa akanenkanĩrwa kĩrĩ antũ batĩ Ayahudi; nabo bakamũmaria, bamũcenge na bamũtuĩre mata. 33Bakamũria na iboko, bacoke bamũrage, na ntukũ ya ithatũ akariũka.”
34Ĩndĩ arutwa batataũkĩrwa nĩ bũrĩa aberaga. Nĩ baithĩtwe bũrĩa Jesũ endaga kuga, na kwogu batamenya bũrĩa augaga.
Jesũ kũragithia Mũtumuumu
(Mat 20.29-34; Mar 10.46-52)
35Na rĩrĩa Jesũ akuagĩĩria Jeriko, nĩ kwarĩ na muntũ mũtumuumu wekarĩte rũteere rwa njĩra, akĩrombaga ũtethio. 36Rĩrĩa mũtumuumu ũu eguire gĩtutu gĩa antũ bakũrũkĩte akĩũria bau baarĩ akuĩ nawe, “Ĩ nĩmbi ĩkũthi na mbere?”
37Nabo bakĩmwĩra, “Nĩ Jesũ wa Nazarethi akũrũkĩte.”
38Nawe muntũ ũu akĩambĩĩria kugĩĩria, “Jesũ Mwana wa Daudi, mbĩguĩra kĩao!”
39Antũ barĩa baarĩ au mbere ya Jesũ bakĩmũgũkia, bakĩmwĩra akire. Ĩndĩ mũtumuumu ũu akĩugĩĩria nkũrũki agĩĩtanaga, “Mwana wa Daudi, mbĩguĩra kĩao!”
40Jesũ akĩrũngama, akiuga mũtumuumu ũu aretwe kĩrĩ we. Akũretwa akuĩ Jesũ akĩmũũria, 41“Nĩ atĩa ũkwenda nkũrũthĩra?” Mũtumuumu akiuga, “Mwathani, ndĩrĩenda ncoke kwona kaĩrĩ.”
42Jesũ akĩmwĩra atĩrĩ, “Coka kwona; wĩtĩkio bwaku nĩbu bwakũragithia.”
43O rĩmwe mũtumuumu akĩambĩria kwona, na akĩthingata Jesũ agĩkumagia Ngai. Na rĩrĩa antũ bonire ũgu, o nabo bagĩkumia Ngai.
Currently Selected:
Luka 18: LUKA
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2021
