Luka 17
17
Wĩyia
(Mat 18.6-7,21-22; Mar 9.42)
1Jesũ nĩ erire arutwa bae atĩrĩ, “No nkinya maũntũ ma gũtũma muntũ eyie moneke; ĩndĩ ũinanũ kĩrĩ ũrĩa ũtũmaga moneka! 2O na kaaba muntũ ta ũu oeretwe ĩiga rĩa kĩthĩi nkingo na akagerwa ĩriani nkũrũki ya gũtũma kamwe ga twana tũtũ twĩyie. 3Menyagĩĩrani jiĩko jienu.
“Mũruanyũkwe angĩgwĩtĩria mũkanie, na ankĩĩrira mũrekere. 4Akeja gũgwĩtĩria maita mũgwanja ntukũ o ĩrĩa ĩmwe, ĩndĩ o aagwĩtĩria akeja agakwĩra, ‘Ndekera,’ no nkinya ũmũrekere.”
Wĩtĩkio
5Nabo atũmwa bakĩĩra Mwathani, “Twongere wĩtĩkio bwetũ.”
6Nawe Mwathani akĩbacokeria akĩbeera atĩrĩ, “Kethĩrwa no bũgĩe wĩtĩkio bwĩgana ta gapĩndĩ ka mũthandũkũ, bũnkĩĩra mũtĩ ũũ wa mũfigi, ‘Gũka ũthĩ wĩande ĩrĩani,’ na ũkabwathĩkĩra.”
Wĩra bwa ntungata
7“Ũmwe wa jienu ankĩthĩrwa arĩ na ntungata ya kũrĩma kana ya kũrĩthia ng'ondu, anga rĩrĩa yakinya yumĩte wĩrani no amĩĩre ‘Njũ na mpũĩ wĩkare ndĩ ũrĩe irio?’ 8Anga tĩka akamĩĩra, ‘Ĩbange ũndugĩre irio, ũndetere ndĩe na nyue, ndarĩkia nagwe ũcoke ũrĩe na ũnyue?’ 9Anga no acokerie ntungata ĩu nkatho nĩũntũ ĩkũrũtha bũrĩa amĩathĩte ĩrũthe? 10Kwogu o nabwi rĩrĩa bwarũtha bũrĩa bunde bwathĩrĩtwe ugagani atĩrĩ, ‘Twi tũrĩ o ntungata; twarũtha o bũrĩa tũbatiĩ kũrũtha.’ ”
Jesũ kũragithia antũ ĩkũmi
11Na rĩ, Jesũ arĩ rũgendoni athiĩte Jerusalemu nĩ akũrũkanĩrĩrie mĩakani ya Samaria na Galili. 12Na rĩrĩa atonyaga ntũũrani ĩmwe agĩtũngana na antũ ĩkũmi barwarĩte mũrimũ wa mũtigiri. Antũ bau bakĩrũngama gataaria, 13bakiugĩrĩria bakiugaga, “Jesũ, Mwathani, twĩguĩre kĩao!”
14Rĩrĩa Jesũ abonire akĩbeera, “Thini bũkeonanie kĩrĩ athĩnjĩri Ngai.”#17.14 Nĩ mũthĩnjĩri Ngai akĩ aarĩ na wathani bwa kuuga muntũ nĩ aragĩĩtie mũtigiri.
Na rĩrĩa baarĩ njĩrani bathiĩte bakĩtherua. 15Rĩrĩa ũmwe wao onire akũragĩthua nĩ agarũkire agĩcoka, agĩkumagia Ngai na mũgambo mũnene. 16Akĩĩgwĩthia magũrũni ma Jesũ na akĩmũcokeria nkatho. Muntũ ũu aarĩ Mũsamaria. 17Jesũ akĩmũũria, “Anga ntĩtheririe antũ ĩkũmi? Bau bangĩ kenda barĩ kũ? 18Gũtĩ ũngĩ ũracoka gũcokeria Ngai nkatho o tiga mũgeni ũũ?” 19Jesũ agĩcoka akĩĩra muntũ ũu atĩrĩ, “Ũkĩra wĩthiĩre; wĩtĩkio bwaku nĩbu bwakũragithia.”
Kwĩja kwa Ũnene bwa Ngai
(Mat 24.23-28,37-41)
20Na rĩ, Afarisai bamwe nĩbaũririe Jesũ rĩrĩa Ũnene bwa Ngai bũkeja, nawe akĩbacokeria akĩbeera, “Ũnene bwa Ngai bũtĩkeja na imenyithia ikwoneka. 21Na bũtĩũka bũrĩa muntũ ankĩũmba kuga, ‘Eneni, nĩu ũũ!’ kana ‘Nĩu ũrĩa!’ Nĩ tontũ rĩ, Ũnene bwa Ngai bũrĩ gatagatĩni kenu#17.21 Ũnene bwa Ngai bũrĩ gatagatĩni kenu: Kana: “...ũrĩ ndani yenu.” .”
22Agĩcoka akĩĩra arutwa bae atĩrĩ, “Kũrĩ kagiita gagakinya bwĩrirĩrie kwona ĩmwe ya ntukũ jia Mwana wa Muntũ, ĩndĩ bũtĩkamĩona. 23Antũ bakabwĩraga, ‘Eneni, arĩ aarĩa!’ kana ‘Eneni arĩ aa!’ Menyani bũthi kĩrĩ bo, na bũtĩkabathingate. 24Nĩũntũ rĩ, o ta bũrĩa rweni rwenagia rũkamũrĩka matũni kuuma mwena ũmwe nkinya ũrĩa ũngĩ, no ta bu Mwana wa Muntũ akethĩrwa akari ntukũ ĩu yae yakinya. 25Ĩndĩ no mwanka ambe athĩnĩke mũno na aregwe nĩ rũjiaro rũrũ. 26O ta bũrĩa gwakari kagiitani ka Noa no bu gũkethĩrwa gũkari ntukũni jia Mwana wa Muntũ. 27Kagiita kau antũ nĩbarĩjaga na bakanyua, bakagũrana na bakagũrũa, nkinya ntukũ ĩrĩa Noa atonyire thabinani, mbura ĩkiura gũkĩgĩa kĩguũ, gĩkĩbathiria bonde. 28O na ĩgiita rĩa Loti nobu gwakari; antũ nĩbaarĩjaga, bakanyua, bakagũra, bakendia, bakaanda na bagaaka nyomba. 29Ĩndĩ ntukũ ĩrĩa Loti aumire Sodomu, Ngai aurithirie mbura ya mwanki na ũbiriti kuuma ĩgũrũ ĩkĩbathiria bonde. 30Ũgu nĩbu gũgekara ntukũ ĩrĩa Mwana wa Muntũ akonanua.
31“Ntukũ ĩu muntũ ũrĩa ũkethĩrwa arĩ ĩgũrũgũrũ rĩa nyomba atĩgakinye ndĩ athi kũjũkia into jiae irĩa irĩ nyomba ndani. Na ũrĩa ũkethĩrwa arĩ mũgũndani atĩgacoke mũjiĩ. 32Ta ririkanani mũka wa Loti! 33Muntũ ũrĩa ũgeragia kwonokia mwoyo wae akaũrwa nĩu, na ũrĩa ũtejaga mwoyo wae akawonokia. 34Ndabwĩra atĩrĩ, ũtukũ bũu antũ baĩrĩ bakethĩrwa bamami gĩtandani kĩmwe; ũmwe akajũkua, ũu ũngĩ atigwe. 35Aka baĩrĩ bakethĩrwa bagĩkiĩra amwe; ũmwe ajũkue, ũu ũngĩ atigwe. 36[Antũ baĩrĩ bakethĩrwa barĩ amwe mũgũndani; ũmwe ajũkue, ũu ũngĩ atigwe.”]
37Arutwa bae bakĩmũũria atĩrĩ, “Mwathani, nĩ kũ maũntũ mama magekarĩkĩra?”
Nawe akĩbacokeria akĩbeera atĩrĩ, “Arĩa kimba kĩrĩ rĩ, nĩ o nderi jiĩthĩranaga.”
Currently Selected:
Luka 17: LUKA
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2021
