KORINTUS 2 9

Totuḷung kon jamaat inta kon Yerusalem

1Sabanarnea in diá bidon paraḷuku paison bui kon i monimu in soaḷ sumbangan monimu kon umat i Allah inta kon Yudea. 2Sin kotaauanku bidon kon moiko in moibogbí motuḷung, bo moiko in umurankubí dinui-duí kon yua-yuak in intau in Makedonia. Pinogumankudon kon i monia kon nongkon taongpabí inta nopaḷut naa in tai utat mita kon Akhaya ain nobasadia mobogoi in sumbangan. Bo lantaran totok domandon in gina monimu, dá intau ibanea in totok domandon noibog. 3Bo tanaa in akuoi nopotabá kon i Titus bo kon i utat naton taya dua in mamangoi kon i monimu, sinbá onu inta dinui-duí nami soaḷ moiko, deeman tongá ouman inta diá totuu. Dá moiko in mustibí mobasadia, sin ain pinogumanku kon i monia kon moiko ain domandon nobasadia. 4Sin moḻia-ḻiaw in ginaku, dikabo oyúon in intau mita in Makedonia mamangoi moyotakinku kon wakutu in mopoangoi kon i monimu. Bo aka mouḻí magí monia in moiko bo diápa nobasadia, yo mooyá totok in kami kon i monimu! Ná doman tua, moiko doman in mooyá. 5Manangka intua, iraikumai yo maní potabákudon muna mamangoi kon i monimu in mosia, sinbá motaau monouḷut muna kon onu inta ogoi monimu podudui in dandi monimu tungkuḷ intua. Aka natua yo moniatadon kon onu in inogoi monimu nion inogoibí takin nosanang in gina bo deemanbí tongá pakisa.

6Torop kopira in singogku naa! Intau inta nomuḷa kon topiḻik, topiḻik doman in mouḻínea, táe intau inta nomuḷa kon nobayong, yo mobayong doman in mouḻínea. 7Táe poigumonku mako moiko mobogoibí takin pia in gina, diá tongá pakisa, sin intaubí inta mobogoi takin pia in gina in kotabi i Allah. 8Sin ki Allah in mokawasabí mobogoi in barakat kon i monimu, sinbá tantú oyúon in pakéon monimu; bo bá tantú oyúon in pogaid monimu kon inta mopia bo potuḷung kon intau. 9#Mzm. 112:9 Ná inta ain pinais kon Buk Motusi nanaa,

“Ki Tuhan nobogoi magí-mako kon intau mita mobogá;

kopopia in gina-Nea tantú mononoi dapot in kopaḷutannea.”

10 # Yes. 55:10 Sinadia-Neadon bibit kon intau inta mogogambor bo kaanon kon i naton. Siabí doman inta moposadia in bibit inambor monimu tatua, sinbá bungai in kopopia in gina monimu moguntu-guntuḷ domandon. 11Aka natua yo moiko in mobaḻí bidon mooyúon kon bayongan in yagi-yagi, sahingga moiko tantú mobogoi takin pia in gina. Bo onu inta inogoi monimu inta sinila-silaidon mako nami tua, nobaḻí dodoyonan kon mobayong totok intau in mopoyaput in sukur moantó kon i Allah. 12Sin oaid mopia inta inaidan monimu naa in deemanbí tongá modugang kon onda inta nogaatpa kon umat mita i Allah, táe nobaḻíbí doman dodoyonan nodapot in nobayong intau mopoyaput in sukur kon i Allah. 13Bo nongkon oaid mopia inta ain pinoontong monimu tua, mobayong intau in Keresten kon Yudea modayow kon i Allah popisí ontongon monia in kototoindudui monimu kon Habar Mopia soaḷ ki Kristus inta duduiandonmai monimu tua. Bo modayow doman in mosia kon i Allah, sin popisí in kopopia in gina monimu moibog mosila-silai mako kon i monia bo kon intau mita ibanea, onu in oyúon kon inimu. 14Dá tantú monia sambayangan in moiko takin tabi modaḷom lantaran pia in gina i Allah kon inimu. 15Posukurdon kon i Allah sin diá in poḻiu kon barakat inogoi-Nea.

Currently Selected:

KORINTUS 2 9: INOMOG

Highlight

Copy