KORINTUS 2 4

Kaoyúonan nongkon soroga kon bonu in kuyon butá

1Kami nogaid kon oaidan tanaa popisíbí in totabi i Allah. Tuamai in diábí moḻia-ḻiaw in gina nami. 2Kami in doíbí tongá umuni-uni sin mokooyábí in natua. Bo kami in doíbí mogaid takin gina inta diá motuḻid bo poḷat doman mopotaḷá in singog i Allah. Kami in nogaid kon oaidan i Allah takinbí gina motuḻid ná inta kinoibog-Nea. Tuamai in harapon mako tua, kopiaan in monilai kon i nami. 3Aka Habar Mopia inta pinoyaput nami tua bo diápa doman komangaḻean, yo dongka bidon intau mita inta tantú mongin daḷan popatoi in diá momangaḻe kon tua. 4Sin ilah moraat inta mongawasa kon dunia naa in tantú mogoḻingoi kon raian in intau mita inta diá mopirisaya. Siabí tua in tantú mogoḻingoi kon i monia sinbá diá mokoontong kon bayag in Habar Mopia soaḷ kawasa i Kristus inta moḷoben, inta nobaḻí oḻinow i Allah. 5Sin habar inta pinoyaput nami tua in deemanbí habar soaḷ oaidan nami tontaní. Táe habarbí soaḷ ki Yesus Kristus inta Tuhan; bo kami naa in tongábí simpaḷmu mita popisí in ibog i Tuhan. 6#Kḻn. 1:3 Sin ki Allah in nogumandon nanaa, “Nongkon sindip momukádon in bayag.” Bo ki Allah doman tatua inta nopomuká in bayag-Nea kon bonu in gina naton, sinbá mobayag domandon in raian naton bo monotaau kon kototarang in bayag i Allah inta nonindar kon pogot i Kristus.

7Táe kaoyúonan inta mopia nongkon soroga tua in ná bí kon bonu in awak nami inta inaidan nongkon butá ḷamentong, sinbá moniatadon kon ropot moḷoben kon inami naa in nongkon i Allahbí, deemanbí nongkon inami tontaní. 8Kami totok in irupa-rupamai monia, táe naapabí doman mako in kami. Kinodaitanbí doman akaḷ in kami, táe harapan nami in tantúbí oyúon. 9Umpakabí kami pinogutú, táe diápabí dodai onda in sinaḷáan tongádon kami tontaní. Bo umpakabí umuran monia bongkugon nodapot in pomobak kon butá, táe diápabí doman minatoi in kami. 10Tantúdon kinorasaan nami in popatoi inta kinorasaan i Yesus, sinbá kobobiag-Nea moniatadon doman kon awak nami. 11Kon wakutu in mobiagpa, kami in umuran noyogintayow in popatoi sin nopotaau in habar soaḷ ki Yesus Kristus, sinbá kobobiag i Yesus moniata doman kon awak inta diá mononoi naa. 12Naa in mangaḻenea kon kawasa in popatoi umuranbí diá monaḷámai kon i nami, táe mopiabí in gina nami sin tantú moyotakin monimu.

13 # Mzm. 116:10 Kon Buk Motusi in pinais nanaa, “Akuoi in mopirisaya, tuamai akuoi in mosingog.” Dá pirisayabí tatua in nobaḻí dodoyonan nami mosingog. 14Kami in mopirisayabí kon ki Allah inta nomiag bui kon i Tuhan Yesus, in momiag doman kon i monimu takin i Yesus, bo modia kon i monimu bo kon inami kon tayowon-Nea. 15Tua komintan in lantaranbí kopontingan monimu. Sin aka mobayong in intau monotaau kon totabi i Allah, yo mobayong doman in mopoyaput in sukur kon i Allah; dá ki Allah in dayowon totok.

Mobiag takin mopirisaya

16Manangka intua diábí moḻia-ḻiaw in gina nami. Umpaka kosikisa-sikisadon, táe gina nami in tantúbí toimbaguon pomuḷoi in singgai. 17Sin yoyiga inta diá mobogat totok naa, inta tantú korasaan nami tanaa in mobogoibí in kopiaan mononoi, moiḻiu kon rupa-rupa roriga inta kinorasaan nami tontaní. 18Kami in diábí monarukiramai kon onu inta koontongan. Sin inta koontongan tua in diábí mononoi, táe aka inta diá koontongan yo tuabí in mononoi.

Currently Selected:

KORINTUS 2 4: INOMOG

Highlight

Copy