KORINTUS 2 3
3
Mogogaid mita kon oaidan i Allah kon dodandian mobagu
1Degá koontongan kon kami naa in naonda bo dumuípa tontaní? Andeka degá moparaḷubí in kami kon surat dodayow kon i monimu ande nongkon i monimu, ná inta kinoibog in intau mita ibanea? 2Moikobí nion in nobaḻí surat dodayow nami, inta noipais kon bonu in gina nami bo inta ain kinotaauan bo poḷat kinobacaan in bayongan intau. 3#Iḷn. 24:12; Yer. 31:33; Yeh. 11:19, 36:26 Mosia tontaní in nokoontongbí kon moiko in suratbí inta ain pinais i Kristus, inta pinoki dia kon i nami. Surat tatua in deemanbí pinais in tinta, táe Rohobí i Allah inta nobiag; bo deemanbí doman pinais kon buk, táe kon bonubí in gina in intau.
4Natua in singog nami sin popisí in pirisaya nami kon i Allah inta pinongin i Kristus. 5Diábí in dodoyonan singog nami in mosingog kon kami in mokosanggupbí mogaid kon oaidan tanaa, sin tongábí ki Allah in nobogoi komampuan tanaa kon i nami. 6#Yer. 31:31 Bo Siabí doman tua in nobogoi in komampuan kon inami nobaḻí mogogaid mita kon oaidan i Allah kon tobatú dodandian nobagu; dodandian inta noyotogot in Roho i Allah, táe deemanbí kon hukum inta pinais. Sin hukum inta pinais tua in modiabí kon popatoi, táe aka Roho i Allah yo mobogoibí in kobiagan.
7 #
Iḷn. 34:29
Kon wakutu in dodandian inta modia kon popatoi tua inaidan bo pinais sinompiamai kon tudu in batu pomomaisan, sindar i Allah nonimbayag totok motarang kon pogot i Musa. Sindarnea tatua in mokotuḷow totok, sahingga intau mita in Israel diádon mokosanggup moindoi kon pogot i Musa tatua, umpaka wakutu intua sindar kon pogotnea tua mulaidon mokudow. Dá aka pinogaidan kon dodandian inta mokopatoi tatua bo sinimbayagan námai tua, 8yo tantú moiḻiubí kon tua in bayag kon wakutu in pinogaidan kon dodandian inta inogoi in Roho i Allah. 9Sin aka dodandian inta mobogoi in hukuman kon intau bo totok in mobayag, yo tantú moiḻiubí totok kon tua in bayag mopia kon dodandian inta monompia bui kon hubungan in intau bo i Allah. 10Motaaubí tangoion kon onu inta nobayag tungkuḷ intua, diá bidon ná kinobobayag in masa inta naa. 11Dá intapa in dunia naa sinimbayagan námai tua, apapa doman bo inta mononoi tua.
12Lantaran natua in harapan nami, dá mobarani in kami mosingog kon natua. 13#Iḷn. 34:33 Kami in deemanbí ná ki Musa inta nogoḻingoi kon pogotnea sinbá diá ontongon in intau Israel koinggamáan in bayag inta tongá samantara tatua. 14Manangka intua diá nobuká in raian monia. Umaai in masa in tanaa raian monia tua in tantúpabí kino koḷoban in koḷubung tatua aka mobaca kon dodandian inta muna tatua. Koḷubung tatua in moinggamábí aka mosia in motobatúdon i Kristus. 15Umaaipabí masa in tanaa, aka mobaca in mosia kon buk mita i Musa, yo koḷubung tatua in tantúpabí moiḷamboi mako kon raian monia. 16Táe aka intau tatua bo mamangoidon kon i Tuhan, yo koḷubung tatua inggamáan bidon nongkon inia.#3:16: Tontagá 16 motaau terjemahan: Táe koḷubungnea tatua in motaaubí inggamáan nongkon inia, ná doman inta pinais kon bonu in Alkitab soaḷ ki Musa: “Koḷubungnea ininggamáan kon inia kon dodai in sia namangoi kon tayowon i Tuhan.” 17Sin ki Tuhan tua in Rohobí; bo kon onda oyúon in Roho i Tuhan, yo kon tua oyúon in kabebasan. 18Tongá tanaa mako, pogot naton naa in diá bidon kinokoḷubungan, bo moposindar bidon in bayag i Tuhan Yesus. Tuamai tantú baḷuian ná Sia in kita; koonggot-koonggot, yo kobayag-kobayag domandon in kita. Bayag tatua in nongkon Roho, bo Roho tatua in ki Tuhanbí.
Currently Selected:
KORINTUS 2 3: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
