DATU MITA IMITÁNEA 15
15
Ki Abiam, datu in Yohuda
(Taw.2. 13:1–14:1)
1Kon taong impuḷú bo waḷu kon pinomarentaan i Datu Yerobeam kon Israel, ki Abiam in nobaḻí datu kon Yohuda 2bo nomarenta kon Yerusalem toḷu notaong in koonggotnea. Ki inánea in ki Maakha, ki adí i Abisalom. 3Ki Abiam nogaid kon dosa mita ná ki amánea. Diá noḻimbatú in ginanea in mosatia kon i Tuhan, Allahnea, noyoposi i Daud, ki ḷakinea. 4#Dat.1. 11:36 Táe, popisí in nonorop kon i Daud, dá ki Tuhan, Allah inta sinumba i Daud, ain nobogoi kon i Abiam in adí tobatú sin monoḻiu kon inia momarenta kon Yerusalem bo moḷukad kon kotá tatua. 5#Sam.2. 11:1-27 Tua inaidan i Tuhan sin ki Daud in noposanangdon in gina-Nea. Ki Daud in diábí kon dodai onda in nonaḷámai kon parenta mita i Tuhan, koḻikudbí in soaḷ pelekara kon i Uria intau in Het tatua. 6#Taw.2. 13:3-21 Parang kon sigad i Rehabeam bo i Yerobeam inta pinangkoi kon tungkuḷpa i Rehabeam in umuranpa doman nobaḻí kon bonu in pinomarentaan i Abiam. 7Ouman ibanea inta nongonguman kon i Abiam in pinaisdon kon bonu in buk Ouman kon inta nobaḻí kon datu mita. 8Ki Abiam in minatoi bo iḷobong kon kotá i Daud. Ki Asa ki adínea in nobaḻí datu nomaḷui kon inia.
Ki Asa datu in Yohuda
(Taw.2. 15:6–16:6)
9Kon taong indoyowa nopuḷú kon pinomarentaan i Datu Yerobeam kon Israel, ki Asa in nobaḻí datu kon Yohuda. 10Sia in nomarenta kon Yerusalem opat nopuḷú bomitá notaong in koonggotnea. Ki baainea in ki Maakha adí i Abisalom. 11Ná ki Daud mogoguyangnea, ki Asa nokosanang kon gina i Tuhan. 12#Taw.2. 15:8-15 Bayongan in intau sundaḷ inta nogaid kon oaidan monia kon tampat mita pososumbaan nodaitnea inuntun, bo bayongan in berhala inta pinosindog in datu mita inta nomarenta noiuna kon inia nodaitnea iyompat kon butá tatua. 13Ki baainea, ki Maakha in pinogogainea nongkon ḷoḻitúannea nobaḻí iná in datu sin sia in nomiadon kon patong berhala inta moraat sin mosumba kon i Asyera, dewi inta mokoḷumbá. Inumpag i Asa in berhala tatua bo poḷat sinubá kon Ḷopá in Kidron. 14Umpaka diá nodait irimumud i Asa in tampat pososumbaan kon berhala, táe umuranbí in sia mosatia kon i Tuhan kon dodai in nobiagpa. 15Bayongan in buḷawan bo saḷaka inta ain pinosumba i amánea kon i Tuhan, dinianea kon Baḷoi Tuhan, ná doman tua in buḷawan bo saḷaka inta sosumbanea tontaní.
16Kon tungkuḷ in pinomarentaan i Datu Asa inta nongkon Yohuda bo Datu Baesa nongkon Israel umuranbí mobaḻí in parang kon sigad in datu doyowa tatua. 17Ki Baesa in nonubu kon Yohuda moginrigon kon kotá in Rama sin moḷamboi kon daḷan tuotan bo ḷuaian kon Yohuda. 18Tuamai in ki Datu Asa nogamá kon bayongan in buḷawan bo saḷaka inta kon bonupa in Baḷoi Tuhan bo kon komaḻig in datu bo pinoki dianea kon Damsyik kon i Benhadad datu in Siria, adí i Tabrimon, inta ki ompu i Hesion. Pakakat mita tatua in pinoki dia pinongin tongonumai in intau moḷoben kon komaḻig, takin koyow nanaa, 19“Koḻigai in kita motogot kon yoyobayatan ná inta ain pinomia in guyanga naton. Pinotakin kon naa akuoi in nokidia in buḷawan bo saḷaka nobaḻí tombuinag, bo monongganut kon i Tuang momontowdon kon yoyobayatan takin i Baesa datu in Israel, sinbá buidon gamáannea in tontaranea nongkon butá dodatuan ku.” 20Noibog in ki Benhadad kon tongganut tatua bo nopotabá in porwiranea mita noyotakin in tontara mita monia minayá nonubu kon kotá mita in Israel. Mosia in nonaḷow kon Iyon, Dan, Abel-Bet-Maakha bo Kinerot kon diug in Danow Galilea bo bayongan in butá in Naptali. 21Naonda in kinodongogan i Baesa intua, nogogaidon in sia noginrigon kon Rama. Minayá in sia in Tirza bo nogogaipa notoyong in noparang.
22Nopaḷut mako kon tua, bayongan in intau kon Yohuda diá in sinaḻiban pinarenta i Datu Asa sin mobuat kon batu bo kayu inta pinaké i Baesa kon Rama sin pakéon poginrigon kon kotá tatua. Pakakat mita tatua pinaké i Asa sin moginrigon kon kotá in Mizpa bo Geba, kotá tobatú kon butá in Benyamin.
23Ouman ibanea inta nongonguman kon i Asa, soaḷ kobobaraninea bo kotá mita inta inirigonannea, aindon pinais kon bonu in buk Ouman in datu mita in Yohuda. Kon tungkuḷ in nogoguyangdon, ki Asa kinotugatan in takit kon sioḷnea doyowa nosimpaḷ. 24Minatoi in sia bo iḷobong kon pinoḷobongan kon datu mita kon kotá i Daud. Ki Yosapat ki adínea ḷoḷaki in nobaḻí datu nomaḷui kon inia.
Ki Nadab, Datu in Israel
25Kon taong nogindua kon pinomarentaan i Datu Asa kon Yohuda, ki Nadab adí i Yerobeam in nobaḻí datu kon Israel bo nomarenta doyowa notaong in koonggotnea. 26Notongkai ná ki amánea inta nomarenta noiuna kon inia, nomia doman in sia kon moraat kon tayowon i Tuhan dá nokopopisídon kon intau in Israel nogaid kon dosa.
27Ki Baesa adí i Ahia, nongkon suku in Isakhar noyopopog noḷawang kon i Nadab, bo noḻimod kon inia. Kon dodai intua ki Nadab bo tontaranea mita noḻipungdon kon kotá in Gibeton kon butá in Pilistin. 28Tua in nobaḻí kon taong nogintoḷu kon pinomarentaan i Datu Asa kon Yohuda. Natuata in ki Baesa in nobaḻí datu in Israel nomaḷui kon i Nadab. 29#Dat.1. 14:10 Naonda in ki Baesa nobaḻídon datu ḷagidon in sia noḻimod kon bayongan in motoḷuadí i Yerobeam. Podudui kon onu inta ain pinoguman i Tuhan pinongin mogogundoinea ki nabi Ahia nongkon Silo, dá bayongan in motoḷuadí i Yerobeam kinoḻimodan, diá tobatúmai in nokoḷagui. 30Ki Yerobeam in binaradosa bo nokopopisí kon intau in Israel binaradosa domandon. Pinongin natua ki Yerobeam nokopomuká kon torú i Tuhan, Allah inta sinumba in intau in Israel.
31Ouman ibanea inta nongonguman kon i Nadab in pinaisdon kon bonu in buk Ouman in Datu mita. 32Kon bonu in pinomarentaan i Datu Baesa inta nongkon Israel, parang tantúpa doman nobaḻí kon sigad i Baesa bo i Datu Asa nongkon Yohuda.
Ki Baesa datu in Israel
33Kon taong nogintoḷu kon pinomarentaan i Datu Asa kon Yohuda, ki Baesa ki adí i Ahia in nobaḻí datu kon bayongan in Israel. Nomarenta i sia kon Tirza doyowa nopuḷú bo opat notaong in koonggotnea. 34Notongkai ná ki Datu Yerobeam inta nomarenta noiuna kon inia, ki Datu Baesa in binaradosa doman kon i Tuhan bo nokopopisí kon intau in Israel nogaid doman kon dosa.
Currently Selected:
DATU MITA IMITÁNEA 15: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
