DATU MITA IMITÁNEA 14
14
Kinopatoian in adí i Yerobeam
1Kon dodai intua adí ḷoḷaki i Yerobeam inta tangoinea ki Abia notakit. 2Noguman in ki Yerobeam kon i buḷoinea, “Posadiadon sin mayá in Silo kon baḷoi in Nabi Ahia inta koḻipod noguman kon akuoi in mobaḻí datu in Israel. Táe tumon intau ibanea sinbá diá kotaauan in intau mongo ki ine in iko. 3Podiaaidon in sia kon roti mopuḷú, kukis topiḻik bo biluk tobotoḷ. Ḻibódon kon inia onu in mobaḻí kon i Abia, adí naton. Potaaubí in nabi tatua kon inimu.”
4Dá minayádon in ki buḷoi i Yerobeam kon baḷoi i Nabi Ahia kon Silo. Ki Nabi tatua in diádon mokoontong sin nogoguyangdon totok. 5Táe ki Tuhan in nopotaaudon kon inia kon ki buḷoi i Yerobeam in nion namangoi sin moḻibó kon takit i adínea. Bo pinotaau domandon i Tuhan kon i Nabi Ahia onu in musti pogumannea.
Naonda in ki buḷoi Yerobeam noiyaput intua, sia in kimia-miamai naonda bo intau ibanea. 6Táe naonda in dinongog i Nabi Ahia in ḷangkad in sioḷnea kon ngara, noguman in sia, “Igai tumuot, kinotaauankubí kon iko in ki buḷoi i Yerobeam. Dikadon ki ubo-uboḷmai. Oyúon in habar diá mopia kon inimu. 7Pobuidon bo potaaudon kon i Yerobeam kon naa in pinoguman i Tuhan, Allah in Israel, ‘Iko in piniḻí-Kudon kon sigad in rayat bo ain binaḻí-Ku pongawasa kon umat-ku Israel. 8Iko in inogoian-Kudon in dodatuan inta ginamá-Ku nongkon buí i Daud. Táe iko in diá ná mogogundoi-Ku ki Daud. Sia in totuu mosatia kon i-Nakó bo motoindudui kon parenta-Ku. Tongábí onda inta koibog-Ku tua in aidannea. 9Táe iko in nogaidon kon inta moraat noiḻiu kon inta inaidan monia inta nomarenta noiuna kon inimu. Iko in nonaḷámai kon i-Nakó bo nopomuká in torú-Ku sin nomia kon berhala bo patong mita nongkon logam sin sumbáan. 10#Dat.1. 15:29 Tuamai in popoangoi-Kubí in bodito kon motoḷuadímu. Bayongan in buímu inta ḷoḷaki, onukabí in iḻitúannea yo ḻimodon-Kubí. Yopúon-Kubí in motoḷuadímu, notongkai ná intau nongait kon yoyatan kinodarit. 11Motoḷuadímu inta matoi kon kotá in kaanonbí in ungkú, bo inta matoi kon ḷuai in kotá in kaanon in ḷagapan. Torop, Akuoi in nosingog, ki Tuhan!’ ”
12Noiduduimai kon tua ki Nabi Ahia in noguman kon i buḷoi Yerobeam, “Yo, pobuidon in tanaa! Kon dodai in iko tumuotdon kon kotá, adímu tatua in matoidon. 13Bayongan in rayat Israel in mononogumatoidon bo moḷobong kon inia. Tongábí sia tua in motoḷuadí i Yerobeam inta ḷobongon horomaton, sin tongábí sia in kinoibog in gina i Tuhan, Allah in Israel. 14Israel in ogoianbí i Tuhan in datu tobatú inta mogimpaḷut kon ḷoḻitúan in buí i Yerobeam saḷaku datu. Noiangoidon in singgainea! Pinangkoidon tanaa 15ki Tuhan in mohukumbí kon Israel dá modandúdon ná tampiring kon bonu in tubig. Ki Tuhan in morabutbí kon rayat in Israel bo nongkon butá inta mopia tanaa inta inogoi-Nea kon mogoguyang monia. Sia in moporaritbí kon i monia kon ḷoḷan in Ongkag in Eprat, sin mosia in nopomukádon in torú-Nea sin nomia kon patong mita i dewi Asyera. 16Ki Tuhan in monaḷábímai kon Israel sin ki Yerobeam in binaradosa bo nokopopisídon kon intau in Israel binaradosa domandon.”
17Nopaḷut mako kon tua nobuatdon in ki buḷoi i Yerobeam kon Tirza. Kon dodai in sia sinumuot kon baḷoinea, ki adínea in minatoi. 18Rayat in Israel nonogumatoi bodongka noḷobong kon inia ná inta pinotaau i Tuhan pinongin i Nabi Ahia, bobantung-Nea.
Ki Yerobeam in minatoi
19Ouman ibanea soaḷ ki Datu Yerobeam, pinomarentaannea bo tongganutnea noparang, ain pinais kon bonu in buk Ouman kon onu inta nobaḻí kon Datu mita in Israel. 20Doyowa nopuḷú bo doyowa notaong in koonggotnea in ki Yerobeam in nomarenta nobaḻí datu, onda intua minatoi in sia bo iḷobong. Ki adínea inta ki Nadab in tangoinea nomaḷui kon inia nobaḻí datu.
Ki Datu Rehabeam nongkon Yohuda
(Taw.2. 11:5–12:15)
21Kon tungkuḷ in ki Rehabeam, adí i Salomo, nobaḻí datu in Yohuda, umurnea in opatdon nopuḷú notaong. Sia in nomarenta mopuḷú bo pitu notaong in koonggotnea kon Yerusalem. Nongkon bayongan Israel kotá tatua aindon sinondí i Tuhan nobaḻí tampat pososumbaan kon i-Nia. Ki iná i Yerobeam in ki Naama nongkon bangusa in Amon.
22Bangusa in Yohuda nomia kon inta moraat kon mata i Tuhan. Oaid monia nokodugang kon torú i Tuhan nongkon bayongan oaid in mogoguyang monia. 23#Dat.2. 17:9-10 Kon tudu mita in buḷud bo kon siungon in pangkoi mita in kayu inta moḷoben, noposindog in mosia kon tampat mita pososumbaan kon berhala, bo noposindog in tugu mita bo patong mita i dewi Asyera sin sumbáan. 24#Pin. 23:17 Kon tampat mita tatua mosia sumundaḷ sin mosumba kon dewa. Nodapot in ḷoḷaki mita mopobayá doman in oaidan nobaḻí sundaḷ. Intau in Yohuda nomia kon bayongan oaidan inta moromú inta pinomia in bangusa mita inta ain pinoguntun i Tuhan kon dodai in intau in Israel tumuotdon kon butá tatua.
25 #
Taw.2. 12:2-8
Kon taong noginḻima kon pinomarentaan i Rehabeam, Sisak, datu in Mesir nonubu kon Yerusalem. 26#Dat.1. 10:16-17; Taw.2. 9:15-16 Sia in nogagow kon bayongan pakakat mita inta koboḻi inta oyúon kon Baḷoi i Tuhan bo kon komaḻig i datu, bo kaḻeaw doman mita inta buḷawan inta pinomia i Salomo. 27Dá nobaḻí toḻiunea ki Datu Rehabeam nomia kon kaḻeaw mita bitú bo inogoi kon porwira mita inta noḷukad kon bonawang in komaḻig in datu. 28Pomuḷoi in datu mamangoi in Baḷoi Tuhan, moḷoḷukad mita tatua modia kon kaḻeaw mita tatua, onda intua pobuion bui kon gopot poḷoḷukadan.
29Ouman ibanea soaḷ ki Datu Rehabeam in pinaisdon kon bonu in buk Ouman in datu mita in Yohuda. 30Kon dodai in ki Rehabeam nomarenta, umuran oyúon in parang kon sigad i Rehabeam bo i Yerobeam. 31Onda intua ki Rehabeam in minatoi bo iḷobong kon poḷoḷobongan kon datu mita kon kotá i Daud. Ki Abiam, ki adínea ḷoḷaki, nomaḷui kon inia nobaḻí datu.
Currently Selected:
DATU MITA IMITÁNEA 14: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
