ZAKHARIYA 5
5
Pangaton parkara dalubang gulungan se ngabber
1Sengko' ngabassagi pole, pas nangale'e badha ketab gulungan se ngabber e bang-abang. 2Malaekat jareya mareksane apa se etangale'e sengko'. Sengko' nyaot, “Ketab gulungan se ngabber e bang-abang. Lanjangngepon sangang meter, lebarrepon pa' meter satengnga.”
3Malaekat jareya pas adhabu, “E ketab gulungan jareya badha tolesan parkara babaston ka nagara reya. E bagiyan se settong nyebbuttagi ja' saneyap maleng epakalowara dhari nagara reya. Ban e bagiyan laenna badha tolesan se nyebbuttagi ja' saneyap oreng se asompa palsu bakal epakalowara keya. 4PANGERAN Se Mahakobasa adhabu ja' babaston jareya eteba'agiya ka bengkona saneyap maleng ban bengkona saneyap oreng se asompa palsu. Ko-bengko jareya bakal terrosa katebanan babaston jareya sampe' daddi jur-gujuran.”
Pangaton parkara babine' e dhalem karanjang
5Malaekat jareya rabu pole pas adhabu, “Abassagi! Badha se dhateng pole!”
6“Ponapa ka'dhissa'?” ca'na sengko'.
Saodda, “Karanjang. Jareya parsemmonna dusana saantero nagara reya.”
7Karanjang jareya badha kodhungnga dhari tema. Teppa'na eabassagi bi' sengko', kodhungnga karanjang jareya abukka' dibi', e dhalemmanna badha oreng babine' teppa'na toju'.
8Malaekat jareya adhabu, “Babine' jareya parsemmonna kajahadan.” Babine' jareya pas esothok pole ka dhalem karanjang ban karanjangnga laju ekodhunge pole. 9Sengko' adhanga, laju nangale'e badha babine' kadhuwa ngabber ka tang kennengngan. Kalembangnga koko akantha kalembangnga dalko'. Karanjang gella' laju ekala' bi' babine' se kadhuwa jareya, pas egiba ngabber.
10Sengko' atanya ka malaekat jareya, “Ebakta ka ka'dhimma karanjang ka'dhissa'?”
11Saodda, “Ka Babil, e dhissa' karanjang jareya egabayyagiya kowel. Mon kowella la mare, karanjangnga esaba'a e jadhiya esemba'a.”
Currently Selected:
ZAKHARIYA 5: MAD
Highlight
Share
Copy
Want to have your highlights saved across all your devices? Sign up or sign in
