MATIUS 9

I Yesus nompa'alin samian anu lupe

(Mrk. 2:1-12, Luk. 5:17-26)

1I Yesus sinumake' i duangan, lantas notaap i dowiwi, ninsusule'mo i kampung kinahampean-Nyo. 2I kiijo' mian nomboa hi Ia samian anu lupe, pinomale' i ampas. Tempo'nyo i Yesus nontoa kinodaka'nyo na palesaya nu to mia-mian haha aijo', Ia notatae hi mian lupe aijo', “Sabaan, anak-Ku! Dosa-dosa'um ingampunanmo.”

3To pia-piangkuka na gulu' agama anu daagi' i kiijo' notataemo i uno nu kinyonyoa, “Mian aiya mompopo'ise' Tumpu Allah!”

4Sinumbu' i Yesus na pikilan nu aha, jadi Ia notatae, “Kadaka' na pikilan miu kino ideknyo sumo itina'? 5Iya na lebe dengke: montaloakon, ‘Dosa'um ingampunanmo’, kabai montaloakon, ‘Bulaamo ka' lajangmo?’ 6Panyo uuka Aku mompobukuti'je hi beleyum saba' i bawo nu dunia aiya Anak nu Mian ko kuasa mongampuni dosa'.” Lantas i Yesus notatae hi mian lupe aijo', “Bula, hangkat na ampasum ka' pinsusule'mo!”

7Mian lupe aijo' nobula ka' ninsusule' nokiijo' i laigannyo. 8Tempo'nyo to mia-mian nontoamo anu tinimbali aijo', aha sinawe'mo nu buhuk ka' nompuji' Tumpu, kalana Tumpu nombee'mo kuasa anu daka' hondo hi mian.

Yesus nolaga i Matius

(Mrk. 2:13-17, Luk. 5:27-32)

9Lapas aijo' i Yesus nompala'imo tampat aijo'. Hau-haunyo i lumajang, Ia nontoa samian topo tagi hasin, sanggonyo i Matius, hau-haunyo suha-suhang i kanton nu anu montage hasin. I Yesus notatae hi ia, “Imbo' batuk mae na Aku!”

I Matius tinuminjo ka' nombatuki Yesus.

10 # Luk. 15:1-2 Tempo'nyo i Yesus hau-haunyo nongkaan i laigan i Matius, da'isan na topo tagi hasin tinoka ka' to mia-mian anu o sanggohi madi' ma'ima' nu mian da'isan, nongkaanmo hingga-hinggat tiba i Yesus ka' anu saja' mombatuki. 11Daagi' ko to mia-mian Farisi anu nontoa han aijo'. Ka' aha nompokilawamo hi anu saja' mombatuki Yesus, “Apaa na sababnyo gulu'um mongkaan hingga-hinggat tiba topo tagi hasin, ka' to mia-mian anu madi' ma'ima'?”

12I hongo i Yesus na aha nompokilawa lantas nontaami, “Mian anu mahoson madi' mompalalui dokoten, ola mian anu masakit. 13#Mat. 12:7, Hos. 6:6 Soba selidiki' apaa na alati'nyo ayat nu Kitab nu Tumpu Allah: ‘Aku mongkahanda'i pongkalibosi ka' misa' koloban binatang’. Kalana Aku toka misa' da molaga mian anu monsanggo butongnyo ma'ima'mo, panyo mian anu o sangka madi' talakana'.”

Mompo'ileeki puasa'

(Mrk. 2:18-22, Luk. 5:33-39)

14Ilapas aijo' anu saja' mombatuki Yohanes anu Mompalamandikan tinoka hi Yesus. Lantas aha nompokilawa, “Kadaka' kami tiba to mia-mian nu Farisi bapuasa', yo aitu anu saja' mombatuki Kita Tuuma i madi'?”

15I Yesus nontaami, “Mosiamo na pongka'oho' miu? Timbali na to mia-mian anu o laga i bau-bauon po'osoan mongoa'i susa' na kinyonyoa de boting mo'ane daagi' hingga-hinggat aha? Tantu i madi'! Panyo tokaje na tempo'nyo boting mo'ane aijo' o alamo hi aha. Tempo'je aitu yo aha bapuasa'mo.

16Madi' ko mian anu montamban baju' anu mahudemo tiba sambeak na hude anu daagi' bu'ou. Kalana hude pontamban aijo' tionyo mokakas ka' mobeak, sahingga mongahenakon beaknyo anu lebe daka'. 17Sumo aitu mule', madi' ko mian anu molana' anggur bu'ou i uno nu botutu kilit anu motu'amo. Kalana botutu aijo' tionyo mobeak ka' ma'idek, lantas anggurnyo mobubus. Anggur bu'ou tionyo o lana' i uno nu botutu anu bu'ou suele, da ohu-ohua' tataap ma'ima'.”

Anak nu anu monjagai laigan pogalejaan

Boune anu montiik i Yesus

(Mrk. 5:21-43, Luk. 8:40-56)

18Hau-haunyo i Yesus notatae hi anu saja' mombatuki Yohanes anu Mompalamandikan, tinokamo na samian anu monjagai laigan pogalejaan. Ia tinolodadupu i ahop hi Yesus ka' notatae, “Anakku boune sala'je sinilaka. Panyo de timbali toka mae kanyangakon, da ia po'ule' tumuu'.”

19I Yesus tinuminjo ka' nojajalan anu saja' mombatuki namba tiba mian aijo'.

20-21I totonga' nu jalan samian na boune anu sampulu'mo ohua' na taun na kopinnyo masakit binuntulanmo nu home, ola nimpu'u tinokamo na bagi nu to bou-boune, tinoka nongohani Yesus lengkat i hiku. Ia binapikin, “Mau ola ku tiik na juba'-Nyo, aku tionyo ma'alin.” Lantas tiniiknyo na puus nu juba' i Yesus.

22Tempo' aitu i Yesus nosiloi ka' nontoa boune aijo' balo notatae hi ia, “Posabaan anak-Ku! Kalana beleyum palesaya hi beleng-Ku, beleyum ma'alinmo!” Tempo'nyo aitu mule' i na'alinmo na boune aijo'.

23Lapas aijo' i Yesus tinoka i laigan nu anu monjagai laigan pogalejaan aijo'. Salatan Ia nontoa anak mahaik musiik, pomusiiki de ko anu silaka, ka' da'isan na mian hengge', 24Ia notatae hi aha, “Posabat na komiu iwi-iwi'! Anak aiya madi' sinilaka; ia ola ahi' hoyot.”

Aha iwi-iwi' nongkokojoi Yesus. 25Salatan mian haha aijo' nosabatmo, i Yesus ninsoop i uno nu salipi' nu anak aijo' ka' nontoongi limanyo. Lantas nobulamo na anak boune aijo'. 26Lele aitu tinolelemo i songko-songko na tano' aijo'.

I Yesus nompa'alin ua'aha na mian mapisok

27I Yesus namba lengkat i kiijo', ka' i totonga' nu jalan ua'aha na mian mapisok nombatukimo Ia. Aha noloboo', “O Anak i Daud, kalibosi mae na kami!”

28Tempo'nyo i Yesus ninsoopmo i uno nu laigan, ua'aha na mian mapisok aijo' tinoka hi Ia. I Yesus nompokilawa hi aha, “Opalesaya miu saba' Aku timbali mompa'alin komiu?”

“Palesaya hi Kita Tuuma!” tukoonyo nu aha.

29Lantas i Yesus nongkanyang mata nu aha ka' notatae, “Kalana komiu palesaya, anu otaha'imani miu timbalimo.” 30Sahingga aha timbali nontoa. Pinoto'i Yesus hi aha totu-totu'u, da boli mompoto'i han aijo' mau pe'e pa' hi he.

31Panyo aha i namba ka' nompolele, lele mongkona i Yesus, i songko-songko na tano' aijo'.

I Yesus nompa'alin mian anu momo'

32Tempo'nyo ua-ua'aha na mian aijo' namba, samian na anu momo' anu kinuasanmo nu roh ma'idek, binoa hi Yesus. 33I Yesus nolaa' roh ma'idek aijo', ka' tempo' aitu mule' mian aijo' binangangmo ka' notatae, “Ma'isa toho' kami nontoa anu tinimbali sumo aiya i Israel!”

34 # Mat. 10:25, 12:24, Mrk. 3:22, Luk. 11:15 Panyo to mia-mian Farisi notatae, “Kapala nu roh ma'idek aijo' na nombee'i Ia kuasa da molaa' to roh-roh ma'idek aijo'.”

I Yesus nolibosmo nontoa mian da'isan

35 # Mat. 4:23, Mrk. 1:39, Luk. 4:44 Sumo aijo' na i Yesus namba nonsongkohi sa'angu' na kota, namba i kota sangga'at, ka' lengkat mae i sa'angu' na kampung namba i kampung sangga'at. Ia nongajan i to lai-laigan pogalejaan, ka' noleleakon Lele Ma'ima' mongkona mosia na Tumpu Allah mompalentah sumo Tomundo'. Ia nompa'alin to mia-mian anu mongepe iwi-iwi' na ngahan nu panyakit, ka' anu madi' sampa' na butongnyo. 36#Bil. 27:17, 1Raj. 22:17, 2Taw. 18:16, Yeh. 34:5, Za. 10:2, Mrk. 6:34 Tempo'nyo i Yesus nontoa mian da'isan aijo', ia nolibosmo hi aha, kalana aha ilingumo ka' madi'mo moko ala sumo domba anu madi'mo ko polaya'nyo. 37#Luk. 10:2 Lantas i Yesus notatae hi anu saja' mombatuki Ia, “Anu o padak manjoo', panyo anu mompadak ola sangkiding. 38Kalana aijo' poita hi tumpu nu ale' aijo', da ia monsai mae anu mompadak padakonnyo.”

Currently Selected:

MATIUS 9: LAILOE

Highlight

Copy