MATIUS 8

I Yesus nompa'alin anu ko panyakit kilit anu o kabuhuk

(Mrk. 1:40-45, Luk. 5:12-16)

1I Yesus nintatau' mae lengkat i bungkutnyo, ka' da'isan na mian anu nombatuki Ia. 2Tempo'nyo aitu tinoka na samian anu ko panyakit kilit anu o kabuhuk. Ia tinolodupu i ahop i Yesus, lantas notatae, “Kita Tuuma, de kita Tuuma mongka'oho', kita Tuuma timbali mompa'alin aku.”

3I Yesus nongkanyang mian aijo' ka' notatae, “Aku mongka'oho'. Pa'alinmo!” Tempo'nyo aitu panyakitnyo na'alinmo. 4#Im. 14:1-32 Lantas koonyo i Yesus hi ia, “O inau'! Boli monsisik mau mule' pa' hi he. Panyo lako' hi imam ka' opoita na ia da montantukan beleyum na'alinmo. Lapas aijo' sombahkon na koloban anu pinalentahkon i Musa, bau bukuti' hi to mia-mian saba' beleyum totu-totu'u na'alinmo!”

I Yesus nompa'alin samian na posaihon nu suludadu Roma

(Luk. 7:1-10)

5Tempo'nyo i Yesus ninsoop i Kapernaum, samian na suludadu nu Roma tinokamo nonsingkaboti mae Ia, ka' nomoita tulung hi Ia. 6“Kita Tuuma,” koonyo nu suludadu aijo', “Posaihonku masakit kiijo' i laigan. Ia male-male' i lupemo kiijo' male-male' talalo masakit hondo.”

7Koonyo i Yesus, “Aku mambaje mompa'alin ia.”

8“Boli pilenje Kita Tuuma,” tukoonyo nu suludadu aijo': “Aku madi' pantas montalima Kita Tuuma i laiganku. Ola ahi' o palentah nu Kita Tuuma. Pokauhonku aijo' ma'alin. 9Kalana aku mule' tionyo mohongo i palentah nu Kapala, ka' i aluku daagi' mule' ko sulu-suludadu anu ku palentah, anu tionyo mohongo palentangku. De aku mompalentah samian na suludadu i alukku, ‘Lako'!’ ia suele mamba. Aku montaloakon hi anu sangga'at, ‘Imbo' aiya!’ ia mule' toka; ka' de aku mompalentah posaihonku, ‘Obau na aiya!’ ia mule' mombau.”

10Salatan i Yesus nohongo apaa na anu tinaloakon nu suludadu aijo', Ia binangang hondo. Lantas Ia notatae hi to mia-mian anu hau-haunyo mombatuki Ia, “Palias na mian aiya. Hi mian nu Israel ma'isa pe'e toho' Aku nongkabot kinodaka'nyo nu palesaya aiya! 11#Luk. 13:29 Totu'u! Manjoo' na mian anu tokaje lengkat mae i kabete'an tiba kinsoban da balame-lame' hingga-hinggat tiba i Abraham, i Ishak, ka' i Yakub, i uno nu Dunia Bu'ou nu Tumpu.

12 # Mat. 22:13, 25:30, Luk. 13:28 Padahan to mia-mian anu sabenannyo timbali mian anu palesayamo hi Tumpu, o alin i kapintungan anu i sambiha'nyo. I kiijo' aha humaang ka' mongoa'i sansala.” 13Lantas i Yesus notatae hi suludadu aijo', “Pinsusule'mo, apaa na anu nu palesaya aijo' tionyo timbali.”

Ka' tempo'nyo aitu mule' posaihonnyo aijo' na'alinmo.

I Yesus nompa'alin mian da'isan

(Mrk. 1:29-34, Luk. 4:38-41)

14I Yesus namba i laigan i Petrus. I kiijo' Ia nontoa tina nu bengkele' i Petrus hau-haunyo nu sihabi i tampat kahoyotan. 15I Yesus nongkanyang limanyo, lantas sakit anu nonsihabi na'alinmo. Ia nobula ka' nontoa apaa na anu palalu obee' hi Yesus.

16Tempo'nyo mamalom, mian nomboa hi Yesus da'isan na mian anu sinoku'onmo nu roh ma'idek. Ka' ola santaa' na potatae, i Yesus nolaa' to roh-roh ma'idek aijo' ka' nompa'alin mule' iwi-iwi' na mian anu masakit. 17#Yes. 53:4 I Yesus nombaumo iwi-iwi' aijo', ka' tiba jalan aijo' tinimbalimo apaa na anu tinaloakon i Nabi Yesaya, aijo'mo, “Ia montanggung kasala'anto ka' mompa'alin panyakito.”

To mia-mian anu mongka'oho' mombatuki Yesus

(Luk. 9:57-62)

18Manjoo' hondo na mian anu montikubi Yesus. Salatan i Yesus nontoamo aha iwi-iwi', Ia nompokaumo anu saja' mombatuki motaapmo i dowiwi. 19Lantas samian na gulu' agama tinoka hi Ia ka' notatae, “Kita Tuumangku Gulu', aku kahanda' mombatuki Kita Tuuma mau mule' pa'moya!”

20I Yesus nontaami, “Pojek ko liangnyo, ka' tomonsi' ko petaanyo, panyo Anak nu Mian madi' ko kamale'an.”

21Lantas samian na anu saja' mombatuki sangga'at notatae, “Kita Tuuma, poloas pe'e na aku minsusule' molamun Tuumangku.”

22Panyo i Yesus nontaami, “Batuki na Aku, ka' pojohokmo na mian anu sinilakamo molamun miannyo anu sinilakamo.”

I Yesus nompobelenti baleba' makansang

(Mrk. 4:35-41, Luk. 8:22-25)

23I Yesus sinumake' i duangan tiba anu saja' mombatuki hingga-hinggat tiba Ia. 24Monti-montiik baleba' makansang anu talalo hondo nontintipmo dowiwi, sahingga duangan aijo' sinambuanganmo nu bokon. Tempo'nyo aitu i Yesus hau-haunyo hoyot. 25Lantas anu saja' mombatuki nambamo hi Ia ka' nombulakon Ia. “Kita Tuuma! Tulungi! Silakamo na kita!” Loboo' nu aha.

26“Kadaka' komiu mabuhuk?” Tukoonyo i Yesus. “Komiu madi' talalo palesaya hi belengku!” Lapas aijo' i Yesus tinuminjo ka' nonsegai mombun tiba dowiwi aijo'. Lantas dowiwi aijo' nolinomo hondo.

27Anu saja' mombatuki Yesus binangang. Aha notatae, “Mian apaa na Ia aiya, sampe mombun ka' bokon mohongo palentah-Nyo!”

I Yesus nompa'alinakon ohua' na mian anu sinoku'on nu roh ma'idek

(Mrk. 5:1-20, Luk. 8:26-39)

28I Yesus tinoka i santoa nu dowiwi i tano' nu Gadara. I kiijo' mae ua'aha na mian anu pininsoopan nu roh ma'idek tinokamo hi Ia. Ua-ua'aha aijo' baani hondo, sahingga madi' ko samian pe'e baani motulu i kiijo'. 29Aha nosabat lengkat mae i bolo' nu kubulan, ka' ko kihi-kihis, “Anak nu Tumpu, nu posiamo na kami? Te Belento kahanda'mo monsakisa kami mau mule' ma'isa pe'e tempo'nyo?”

30Madi' majo'on lengkat i kiijo', daagi' ko bau' manjoo' hondo hau-haunyo molio mongkaan. 31To roh-roh ma'idek aijo' nongkakasemo hi Yesus, “De Belento monsai kami mosabat, saimo na kami minsoop i uno nu bau-bau' haha aijo'.”

32“Lako'mo!” Koonyo i Yesus. To roh-roh ma'idek aijo' namba nompala'i mian ua'aha aijo', lantas ninsoop i uno nu to bau-bau' aijo'. Ka' bau' haha aijo' mule' nalaimo, ka' ningkanabu' i biwi nu tungebe nokaiyong i uno nu dowiwi, lantas nolomosmo.

33Anu monjagai bau' aijo' nopadeka'mo namba i kota, ka' nonsisik iwi-iwi' anu tinimbalimo aijo', sumo aitu mule' apaa na anu tinimbali tiba mian ua'aha anu sinoku'on nu roh ma'idek aijo'. 34Lantas iwi-iwi' na mian nu kota aijo' namba nolabotakon i Yesus. Tempo'nyo aha nontoamo i Yesus, pinoitamo nu aha da sabole-boleh Ia mompala'i tano' nu aha.

Currently Selected:

MATIUS 8: LAILOE

Highlight

Copy