MATIUS 7

Mompisala'i mian

(Luk. 6:37-38,41-42)

1“Boli mompisala'i mian sangga'at, da komiu suele boli nu pisala'i nu Tumpu. 2#Mrk. 4:24 Kalana sumo komiu mompisala'i mian sangga'at, sumo aitu mule' na Tumpu mompisala'i komiu. Ka' sukat anu o pake miu hi mian sangga'at, tionyo o pake suele nu Tumpu hi komiu.

3Kadaka' komiu montoa sangkunyit na kau' i uno nu mata nu utusum, sadangkan pangkot i uno nu posi mataum madi' o palahatikan miu? 4Mosia na komiu timbali montaloakon hi utusum, ‘Imbo' da ku alinakon na kau' sangkunyit atina' hi mataum,’ sadangkan i uno nu posi mataum daagi' ko pangkot? 5Ee baleko'! Alinakon pe'e na pangkot i posi mataum, timbalije beleyum montoa totu-totu'u, ka' timbali mongalinakon sangkunyit na kau' i mata nu utusum.

6Boli o bee' na han anu susi' hi dedeng, da dedeng aijo' boli mobalik ka' mololo' beleyum. Ka' boli mombee' mutiara i bau', da bau' aijo' boli mompeja-peja' mutiara aijo'.”

Momoita, molio, ka' mongkutetek

(Luk. 11:9-13)

7“Poita, da komiu montalima. Lio, da komiu mohumpak. Kutetek, da tumban o tuhea'akon bau pinsoopannum. 8Kalana mian anu momoita tionyo montalima; mian anu molio tionyo mohumpak; ka' mian anu mongkutetek tionyo o tuhea'akon na pontumban. 9Pa' daagi' ko anu hi komiu, Tuuma mombee' batu hi anaknyo, de ia momoita roti? 10Kabai mombee' ulo, de ia momoita ikan? 11Mau mule' komiu ma'idek, komiu suele mombee' anu ma'ima' hi to ana-anakum. Apaa mule' Tuumaum i suluga'! Ia lebe mule' mombee' anu ma'ima' hi mian anu momoita hi Ia.

12 # Luk. 6:31 O bau na mian sangga'at sumo apaa na anu oka'ima'i nu bau nu aha hi komiu. Aijo'mo na batunyo nu atulan i Musa, ka' pangajalan nu to nabi-nabi.”

Sabatan anu soki

(Luk. 13:24)

13“Pinsoopmo montulu sabatan anu soki, kalana sabatan ka' jalan anu mompanjolongi nalaka daka' ka' bolaa, ka' da'isan na mian anu molowo'. 14Panyo soki ka' susa' na sabatan ka' jalan anu momboa mian i kantumuu'an. Ka' ola sangkiding na mian anu mongkabot.”

Kau' ka' bua'nyo

(Luk. 6:43-44)

15“Opoko piani na mongahopi to nabi-nabi anu madi' totu'u. Aha toka hi komiu mimbalu-balu' domba, panyo aha sabenannyo sumo pojek anu baani. 16Komiu monsumbu'je aha i palabuatan nu aha. Kuhat anu ko hii'nyo madi' mimbua' bua' nu anggur, ka' hemput anu ko hii'nyo madi' mohasinakon bua' nu ara. 17Kau' anu molumba' o humpak na bua'nyo anu ma'ima', ka' kau' anu madi' molumba', bua'nyo ma'idek. 18Kau' anu molumba', madi' mohasinakon bua' anu ma'idek, ka' kau' anu madi' molumba' madi' mohasinakon bua' anu ma'ima'. 19#Mat. 3:10, Luk. 3:9 Batu-batu kau' anu madi' mohasinakon bua' anu ma'ima' o taa' ka' o papui. 20#Mat. 12:33 Sumo aitu mule' na to nabi-nabi anu madi' totu'u. Komiu monsumbu' aha i hasin nu palabuatannyo.”

Palabuatan misa' potatae

(Luk. 13:25-27)

21“Madi' iwi-iwi' na mian anu molaga Aku, ‘Tumpu, Tumpu,’ anu moko ala timbali mian anu palesayamo hi Tumpu, panyo ola to mia-mian anu mombau kahanda' nu Tuumang-Ku anu i suluga'. 22I Sinaa Kakiamatan da'isan na mian motatae hi belengku, ‘Tumpu, Tumpu, te misa' sanggonto na o pake mami mompotoka potuunon nu Tumpu? Ka' te misa' sanggo nu Tumpu suele, kami mule' nola'mo to roh-roh anu ma'idek, ka' nombau manjoo' na anu okabangangi?’ 23#Mzm. 6:9 Panyo Ku taamije, ‘Aku madi' toho' nonsumbu' komiu! Lako'mo, na komiu anu mombau ka'idekan!’ ”

Mian pande na mompotinjo laigan kabai mian ponga' na anu mompotinjo laigan

(Luk. 6:47-49)

24“Yoh, mian anu mohongo potataeng-Ku aiya, ka' montuluti, pokakana sumo mian pande anu mompotinjo laigannyo i bawo nu batu. 25Tempo'nyo ujan tudun, ka' iaba' toka tiba mombun makansang montintip laigan aijo', laigan aijo' madi' motua' kalana pinotinjomo i bawo nu batu.

26Ka' mian anu mohongo potataeng-Ku aiya, panyo madi' montuluti, ia pokakana sumo mian ponga' anu mompotinjo laigannyo i bawo nu bone'. 27Tempo'nyo ujan tudun, ka' iaba' toka tiba mombun makansang montintip laigan aijo', laigan aijo' motua'. Ka' ka'idekannyo talalo hondo!”

Kuasa i Yesus

28 # Mrk. 1:22, Luk. 4:32 Ahennyo i Yesus lapasmo na nongajan, ka' to mia-mian i kiijo' binangangmo hondo na nohongo pangajalan-Nyo. 29Kalana Ia mongajan nu kuasa, misa' sumo to gulu-gulu' nu agama nu aha.

Currently Selected:

MATIUS 7: LAILOE

Highlight

Copy