MATIUS 10

Sampulu' ka' ohua' na rasul

(Mrk. 3:13-19, Luk. 6:12-16)

1Daagi' ko sansinaan i Yesus nolaga sampulu' ka' ohua' na mian anu saja' mombatuki Ia da sinilimu'. Lantas Ia nombee'i kuasa hi aha da molaa' to roh-roh ma'idek, ka' mompa'alin iwi-iwi' na panyakit, ka' iwi-iwi' na butong anu madi' sampa'. 2Sanggo nu sampulu' ka' ohua' na rasul aijo' atina'mo: momonanyo i Simon (anu osa sanggohi Petrus) tiba utusnyo i Andreas, lantas i Yakobus tiba utusnyo i Yohanes, aijo'mo to ana-anak i Zebedeus. 3Ilapas aijo' i Filipus ka i Bartolomeus tiba i Tomas ka' i Matius, topo tagi hasin tiba i Yakobus anak i Alfeus, ka' i Tadeus; 4lantas imihinyo i Simon, si Patriot ka' i Yudas Iskariot anu nongkabisa'i Yesus.

Kalaja nu to rasul-rasul

(Mrk. 6:7-13, Luk. 9:1-6)

5Sampu-sampulu' ka' ohua' na rasul aijo' pinokaumo Yesus ka' pinokinde'anmo sumo uuka, “Boli mamba i tano' nu to mia-mian misa' Yahudi. Boli mule' mamba i to kota-kota' nu Samaria. 6Panyo lako'mo hi to mia-mian Israel, lebe-lebe mule' hi aha anu sinala'mo na jalan. 7#Luk. 10:4-12 Sisikakon hi aha saba' Tumpu tokamo lia-lia' mompalentah sumo Tomundo'. 8Opa'alin na to mia-mian anu masakit; opo tumuu' na to mia-mian anu sinilakamo; opa'alin na to mia-mian anu ko panyakit kilit anu okabuhuk, ka' olaa' na to roh-roh ma'idek. Komiu nontalimamo iwi-iwi' aijo' ola ihalala akon. Jadi, mombee'i suele ola ohalala akon. 9Boli momboa doi mosoni', doi salaka, kabai pe'e doi tambaga. 10#1Kor. 9:14, 1Tim. 5:18 Boli mule' momboa botutu nu sadaka', kabai ohua' na paan na pakean bau kapalaluan nu lumambanannum, kabai sapatu, kabai tokon. Sabab mian anu mokalaja kakonannyomo na mohumpak tambo de ia palalumo.

11De komiu toka i kota kabai i kampung, olio samian na anu mongka'oho' montalima komiu. Jojoong tiba ia sampe komiu mamba mule'. 12Salatan komiu ninsoopmo i laigan, otaloakon, ‘O' amalakon da Tumpu mombalakati komiu.’ 13De to mia-mian i laigan aijo' montalima komiu, bakas da salan do'a miu tataap hi aha. Panyo de aha madi' montalima komiu, po'ule' o ala na salan do'a miu aijo'. 14#Kis. 13:51 De ko laigan kabai kota' anu madi' mongka'oho' montalima komiu kabai madi' mongka'oho' mohongo komiu, pala'i na tampat aijo', ka' sapuakon na abu' nu pala nu tengkeum. 15#Mat. 11:24, Kej. 19:24-28 O inau'! I Sinaa Kakiamatan, to mia-mian nu Kota' Sodom ka' Gomora lebe dengke na o ampuni nu Tumpu, ka' de mule' to mia-mian nu kota' aijo'!”

Ponsansalaan anu tokaje mae

(Mrk. 13:9-13, Luk. 21:12-17)

16 # Luk. 10:3 “Palahatikan na aiya: Aku monsai komiu sumo domba anu madi' moko ala mokiijo' i totonga' nu pojek anu buhingison. Komiu tionyo balajaga-jaga sumo ulo ka' hodi' na kinyonyoa sumo tomonsi' malapati'. 17#Mrk. 13:9-11, Luk. 12:11-12, 21:12-15 Balajaga-jaga kalana komiu o hakop ka' opopangadap hi to Mia-mian Kopian. Komiu tionyo o sakisa i to lai-laigan pogalejaan. 18Komiu tionyo oboa i ahop nu anu batu-batu ko kuasa ka' to tomu-tomundo', kalana komiu anu saja' mombatuki Aku. Ka' aijo' na kasampatan hi komiu da mombee' katalangan mongkona aku hi aha, ka' hi to mia-mian anu madi' monsumbu' Tumpu. 19Panyo de komiu oboa da o putusi, boli bata-bata apaa na anu tionyo otaloakon miu aijo', kabai na anu tionyo o sisik miu toka i tempo'nyo. 20Kalana anu motatae tempo'nyo aijo' misa' komiu, panyo Roh nu Tuuma i suluga' na montaloakon hi komiu.

21 # Mrk. 13:12, Luk. 21:16 Saidi' mae timbalije saba' mian posi utusnyo mombee' da o patei. Ka' aitu mule' na saidi' mae timbali hi tuumanyo tiba anaknyo. To ana-anak tionyo mongewa tina ka' tuumanyo, ka' mombee' aha da o patei. 22#Mat. 24:9, 13, Mrk. 13:13, Luk. 21:17 Iwi-iwi' na mian mongka'ideki komiu, kalana komiu mombatuki Aku. Panyo mian anu batahan toka i mihinyo, oposalamat. 23De komiu osansala i sala'sa'angu' na kota, popadeka' mamba i kota sangga'at. Ku poto'i hi beleyum: Ma'isa pe'e komiu moko lambani iwi-iwi' na to kota-kota Israel, Anak nu Mian tokamo.

24 # Luk. 6:40, Yoh. 13:16, 15:20 Mulit madi' lebe daka' molingkudui gulu'nyo, ka' posaihon madi' lebe daka' molingkudui tuannyo. 25#Mat. 9:34, 12:24, Mrk. 3:22, Luk. 11:15 Sukupmo de samian na mulit timbali sumo gulu'nyo, ka' samian na posaihon sumo tuannyo. De kapala nu auwan osanggohimo Beelzebul, sumo aitu mule' iwi-iwi' na isi nu salaigan. Aha tionyo obee'i sanggo anu lebe ma'idek mule'!”

Okabuhuk na Tumpu

(Luk. 12:2-7)

26 # Mrk. 4:22, Luk. 8:17 “Boli mabuhuk hi mian. Madi' ko anu sulu-suluk lantas madi' kantoan, ka' madi' ko anu pinohowini lantas madi' o hongo. 27Apaa na Kutaloakon hi beleyum i uno nu pintung tionyo o ulit miu ijingka de sinaamo. Ka' apaa na anu o oyongakon i bihingum, o sisikakon hi mian da'isan aijo' mana-manasa! 28Boli mabuhuk hi aha anu mompatei butong, panyo madi' ko kuasa mompatei santuu'. Pabuhuk hi Tumpu anu ko kuasa monsilakai mau mule' butong mau mule' santuu' i uno naraka. 29Ohua' na tomonsi' peheet timbali o oli nu samata na doi anu talalo ise'. Mau mule' sumo aitu madi' ko sa'angu' pe'e manabu' i tano' de madi' kalana pongka'oho' nu Tuumaum. 30Konjoo' nu hambahan nu ubak i ubakum pe'e binilangmo iwi-iwi'. 31Kalana aijo' boli mabuhuk! Komiu lebe ko angga'nyo molingkudui to tomo-tomonsi' peheet!”

Mongakui Yesus i ahop nu mian da'isan

(Luk. 12:8-9)

32“De ihe na mongakui Aku i ahop nu mian da'isan tukoonyo ia anu mombatuki Aku, Aku suele tionyo mongakui ia i ahop nu Tuumang-Ku i suluga'. 33#2Tim. 2:12 Panyo de ihe na madi' mongakui Aku i ahop nu mian da'isan, tukoonyo ia misa' anu mombatuki Aku, Aku suele madi' mongakui Ia, i ahop nu Tuumang-Ku i suluga'.”

Misa' paladamean panyo ola mongewa

(Luk. 12:51-53, 14:26-27)

34“Boli montaha'imani saba' aku momboa paladamean i dunia aiya. Aku madi' momboa paladamean, panyo mongewa. 35#Mi. 7:6 Aku toka monsaduakon anak mo'ane mongewa tuumanyo, anak boune mongewa tinanyo, ka' monian boune mongewa tina nu monian boune. 36Memang, anu timbali sampobali' hondo-hondo aijo'mo mian i posi sa'a-sa'angu'na auwan.

37Mian anu mongkalibosi tumanyo kabai tinanyo molingkudui Aku, madi' pantas timbali anu mombatuki Aku. Sumo aitu mule' na mian anu mongkalibosi anaknyo mo'ane kabai boune, molingkudui Aku. 38#Mat. 16:24, Mrk. 8:34, Luk. 9:23 Ka' mian anu madi' mongka'oho' monsimbu salibnyo, ka' mombatuki Aku madi' pantas timbali anu mombatuki Aku. 39#Mat. 16:25, Mrk. 8:35, Luk. 9:24, 17:33, Yoh. 12:25 Mian anu mompagala mompotumuu' kantumuu'annyo tionyo mingkot na kantumuu'annyo, panyo mian anu mingkot na kantumuu'annyo kalana tulut hi beleng-Ku, tionyo mohumpak kantumuu'annyo.”

Tamboo inu palabuatan anu ma'ima'

(Mrk. 9:41)

40 # Mrk. 9:37, Luk. 9:48, 10:16, Yoh. 13:20 “Mian anu montalima komiu, montalima Aku. Ka' mian anu montalima Aku, montalima Ia anu nonsai Aku. 41Mian anu montalima nabi, kalana ia nabi, tionyo mohumpak tamboo hi samian na nabi. Ka' ihe na montalima samian anu ma'ima' kalana ia ma'ima', tionyo mohumpak tamboo hi samian anu ma'ima'. 42De ihe na mompo'inumi, mau mule' ola uee lop hi sala'samian to mia-mian anu madi' ko angga'nyo, kalana ia anu saja' mombatuki Aku, palesayamo ia tantu montalima tamboonyo!”

Currently Selected:

MATIUS 10: LAILOE

Highlight

Copy