LUKAS 20

Anu mompokilawa mongkona hak i Yesus

(Mat. 21:23-27, Mrk. 11:27-33)

1Daagi' kino sansinaan, i Yesus hau-haunyo mompogulu' ka' mompolele Lele Ma'ima' lengkat hi Tumpu, hi to mia-mian i uno nu Laigan nu Tumpu. Kapala nu to ima-imam, gulu-gulu' agama tiba to pola-polaya' nu Yahudi, tinokamo 2ka' notatae hi Yesus, “Soba poto'i mae hi kami, mosia ka' Beleyum mombau iwi-iwi' aiya? Ihe na nombee'i hak aijo' hi Beleyum?”

3I Yesus nontaami, “Aku kahanda' mompokilawa. Soba poto'i mae hi beleng-Ku, 4I Yohanes mompalamandikan ihe na mombee'i hak? Tumpu kabai mian?”

5Saba' aha nontampu'unimo binasale', “De otaloakonto, ‘Tumpu Allah na nombee'i hak,’ tantu Nutaloakon, ‘Desumo aitu ka' kadaka' komiu madi' palesaya hi Ia?’ 6Panyo de otaloakonto, ‘Mian na nombee'i hak,’ iwi-iwi' na mian mompahambunu'akon mae nu batu kita, kalana nu palesaya nu aha na i Yohanes samian na nabi.” 7Jadi, tinaaman nu aha, “Madi' osumbu' mami.”

8Jadi i Yesus notataemo hi aha, “Desumo aitu Aku mule' madi' mompoto'i hi komiu, nolengkat mae hi he na hak-Ku, nombau iwi-iwi' aiya.”

Kantuang mongkona anu mokalaja ale' nu anggur

(Mat. 21:33-46, Mrk. 12:1-12)

9 # Yes. 5:1 I Yesus nonsisikakon hi mian haha aijo', kantuangan aiya, “Daagi' ko samian anu nonsu'ani santake na ale' nu anggur. Tinamboakonnyo na ale' aijo' hi aha to pia-piangkuka anu mombauakon ale', lantas i namba i lipu' sangga'at, ka' jinojoong pinin kiijo' mae. 10Salatan tempo'mo nu pontipuan bua'nyo nu anggur, tumpu nu ale' aijo' nonsaimo posaihonnyo namba hi anu nombau ale' aijo', da montalima bagiannyo. Panyo anu nombauakon ale' aijo' nondoke posaihonnyo aijo' ka' nompokau ia minsusule' tiba madi' ko apa-apaa anu binoanyo. 11Saba' tumpu nu ale' aijo' nonsai mule' samian na posaihon sangga'at; panyo posaihon aijo' suele dinoke ka' pinopo'ambang nu anu nombau ale' haha aijo', ka' sinai minsusule' tiba madi' ko apa-apaa anu binoanyo. 12Lapas aijo' tumpu nu ale' nonsai mule' posaihon ko totolu'nyo. Panyo posaihon aijo' dinoke suele nu anu nombau ale' aijo', ka' ingalin i sambiha' nu ale' aitu. 13Ahennyo tumpu nu ale' aijo' notatae, ‘Apaa mule' na tionyo kubau? Kusaije na posi anakku anu kuku kalibosi. Tantu iaje na nu adati nu aha!’ 14Panyo salatan tinoa nu anu nombau ale' haha aijo' na anak nu tumpu nu ale' aijo', aha notatae samian ka' samian, ‘Aiyamo ia na tumpu nu budennyo. Imbo' da o pateinto na ia da o alanto na budennyo.’ 15Lantas aitu i hela' nu aha i sambiha' nu ale' aijo' ka' pinateannyo na ia.”

Lantas i Yesus nompokilawa, “Yo, de tumpu nu ale' aijo' minsusule'mo mae nu posia na anu nombau ale' haha aijo'? 16Tantu ia toka ka' mompatei anu nombau ale' haha aijo', lantas ale' aijo' nu bee'mo hi sangga'at na mombauakon.”

Nohongo aitu, notataemo na to mia-mian hi Yesus, “Imadi' koko totu'u!”

17 # Mzm. 118:22 Tinonto'an i Yesus na aha ka' notatae, “Desumo atina', apaa na alati'nyo ayat nu Kitab nu Tumpu aiya?

‘Batu anu madi' pinake nu tukang nu laigan, tinimbalimo batu anu talalo o palalui.’

18Iwi-iwi' na mian anu manabu' i batu aijo', tionyo mohopu', ka' ihe na nutuda' nu batu aijo', tondiodos timbali abu'.”

Han mombayan hasin

(Mat. 22:15-22, Mrk. 12:13-17)

19To gulu-gulu' agama, ka' Kapala nu to ima-imam monsumbu' saba' kantuangan aijo' nu patuakon i Yesus hi aha. Mokonyo aitu aha kahanda'mo mohakop Ia tempo'nyo aitu, panyo aha mabuhuk hi mian da'isan. 20Jadi aha molio kasampatan anu ma'ima'. Aha nonsuu'akon hi mian da montiho susumo mian tobos, ka' monsai mian haha aijo' mompoki-pokilawa apa-apaa hi Yesus da o humpak na kasala'annyo, da aha timbali momboa Ia hi anu ko kuasa ka' pamalentah nu Gubernur. 21Jadi to mia-mian anu pinonsuu' akonan aijo' notataemo hi Yesus, “Kita Tuumangku Gulu', osumbu' mami iwi-iwi' na anu tinaloakontomo nu Kita Tuuma ka' pinogulu'mo aijo' totu'u. Osumbu' mami mule' Kita Tuuma mompogulu' mana-manasa mongkona kahanda' nu Tumpu hi mian, kalana Kita Tuuma, madi' mompile'i mian. 22Mokonyo sumo aitu, soba Kita Tuuma taloakonmo mae hi kami, mosia na atulan nu agamanto, pa' timbali mombayan hasin hi Tomundo kabai madi'?”

23Panyo nusumbu' i Yesus na akan nu aha. Mokonyo aitu Ia notatae, 24“Soba potoamae hi beleng-Ku sambatu na doi salaka. Gamban ka' sanggo ihe na aiya?”

“I Tomundo!” na pinontaami nu aha.

25“Desumo aijo',” koonyo i Yesus hi aha, “Bee' hi Tomundo apaa na anu i Tomundo, ka' hi Tumpu, apaa na anu nu Tumpu Allah.”

26Jadi i ahop nu mian da'isan aitu, aha madi' moko ala nohumpak sa'angu' pe'e na kasala'an i Yesus. Aha ola nomohokot ka' binangang i pinontaami-Nyo aijo'.

Han anu po'ule' tinumuu' yo aitu sinilakamo

(Mat. 22:23-33, Mrk. 12:18-27)

27 # Kis. 23:8 Daagi' ko to pia-piangkuka na mian lengkat i posa'angu'an nu Saduki tinoka hi Yesus. (Aha aitumo posa'angu'an anu ko pikilan, au'aitu anu matemo madi'mo po'ule' tumuu'.) Aha nompokilawa hi Yesus, 28#Ul. 25:5 “Kita Tuumangku Gulu', i Musa nontulis atulan aiya da bau kapalaluanto: De samian na mo'ane silaka, ka' ia madi' ko anak, saba' tionyo mongosoai balunyo, da mombee'i lee' hi mian anu sinilakamo aijo'. 29Toho' jinadi popitu' na mian moto utus. Tumpenyo no'osoa, lantas sinilakamo madi' kino anak. 30Ilapas mae ko ohua'nyo nongosoaimo balunyo, panyo ia mule' sinilakamo, madi' kino anak. 31Anu tinimbali sumo aijo' tinimbali mule' hi utusnyo anu ko totolu'nyo, ka' aijo' mule' tinoka-toka hi ko popitu'nyo. 32Ahennyo boune aijo' sinilakamo. 33I sinaa mian silaka po'ule'mo opotumuu', bengkele' ihe na boune aijo'? Kalana aha popi-popitu' nongosoaimo ia.”

34I Yesus nontaami, “To mia-mian anu tumuu' tempo' uuka mo'osoa, 35panyo to mia-mian anu pantas po'ule' opotumuu' de silakamo, ka' tumuu' i tempo' anu tokaje mae, aha madi'mo mo'osoa. 36Baunyo nu aha sumomo malaikat, ka' madi'mo silaka. Aha te ana-anakmo nu Tumpu, kalana aha po'ule'mo tinumuu' lengkat i kapatean. 37#Kel. 3:6 Posi i Musa nomponyata'mo mana-manasa mian mate po'ule' opotumuu'. I uno nu tulisannyo mongkona kumbung anu i noak aijo', ia nonsanggo Tumpu, sumo, ‘Tumpu i Abraham, Tumpu i Ishak, ka' Tumpu i Yakub.’ 38Yo, Tumpu aijo' misa' Tumpu nu mian silaka! Ia Tumpu nu to mia-mian tumuu'! Kalana i ahop nu Tumpu, iwi-iwi' na mian tumuu'.”

39To pia-piangkuka na gulu' agama notatae, “Potaam nu kita Tuumangku Gulu' ma'ima' hondo.” 40Mokonyo aitu aha madi'mo daagi' baani nompokilawa apa-apaa hi Yesus.

Tomundo anu Momposalamat

(Mat. 22:41-46, Mrk. 12:35-37)

41I Yesus nompokilawa hi aha, “Mosia ka' timbali otaeakon tukoo miu, Tomundo anu Momposalamat Lee' mae i Daud? 42#Mzm. 110:1 Padahan posi i Daud notatae i Kitab Mazmur,

‘Tumpu notatae hi Tumpungku:

Suhangmo i sasu koanan-Ku,

43sampe Aku mombaumo to bali-bali'-Um

minsesuluk hi Beleyum.’

44Jadi, de i Daud nonsanggo, Tomundo anu Momposalamat aijo' ‘Tumpu,’ mosia na Ia timbali Lee' mae i Daud?”

Pokinde' da obala'ingati na to gulu-gulu' agama

(Mat. 23:1-36, Mrk. 12:38-40)

45Hau-haunyo to mia-mian mohongo i Yesus notatae, Ia notatae hi anu saja' mombatuki Ia, 46#Luk. 11:43 “Obala'ingati na aha to gulu-gulu' agama. Nuka'ima'i nu aha na kolalajang mibaju' nu juba' mantan, ka' sanang na o adati iyayamae i pasan. Nuka'ima'i nu aha na i tampa-tampat anu o angga'i, i uno nu laigan pogalejaan tiba i bau-bauon. 47Aha mongakali to balu-balu, ka' mongagoi laigannyo. Ka' da bau pongkulubi ka'idekan nu aha aijo', aha balado'a manta-mantan! Hukuman nu aha saidi' mae maboat!”

Currently Selected:

LUKAS 20: LAILOE

Highlight

Copy