LUKAS 19

I Yesus tiba i Zakheus

1Salatan i Yesus tinokamo i Yerikho, Ia i lumajangmo lau-laus so' noliu-liu kota aijo'. 2I kota kiijo' daagi' ko samian kapala nu topo tage hasin anu kaya, sanggonyo i Zakheus. 3Ia mongka'oho' montoa pa' ihe na i Yesus aijo', panyo kalana mian talalo da'isan, ka' ia mule' kodo', sahingga ia madi' moko ala nontoa i Yesus. 4Atina' ka' ia nopadeka' noliu-liu to mia-mian lantas noliba' i sangkau na kau', da moko ala montoa i Yesus, gagana' uuka motulumo i kiijo'. 5Salatan i Yesus tinoka i kau' aijo', ia nonsinda nokiita' ka' notatae, “Zakheus, pintau' mae lia-lia'! Kalana aku tionyo sonso' i laiganum sinaa aiya.”

6I Zakheus lia-lia' nintau' ka' nontalima i Yesus, ka' ilame'mo. 7Iwi-iwi' na mian anu nontoa aijo' nontampu'unimo nongo-nguyung. Aha notatae, “Se'! Ia mamba sonso' i laigan nu mian anu madi' ma'ima'!”

8Lapas mule' kiijo' i laigannyo, i Zakheus tinuminjo ka' notatae hi Yesus, “Tumpu, sambahagian na halata'ku, ku halala'akon hi mian kasiasi; tiba ihehe na anu toho' ingakalanku, po'ule' ku bayan hi ia pimpaton lipat!”

9Lantas koonyo i Yesus, “Sinaa aiya beleyum tiba komiu sampoto utusanum pinosalamatmo nu Tumpu, ka' binee'annyomo kantumuu'an bu'ou, kalana beleyum suele lee' i Abraham. 10#Mat. 18:11 Anak nu Mian toka da molio tiba momposalamat mian anu talas.”

Pongkantuangakon doi mosoni'

(Mat. 25:14-30)

11 # Mat. 25:14-30 Hau-haunyo mian daagi' mohongo i Yesus basisik, Ia nonsisikakon sa'angu' na kantuangan. Kalana tempo' aitu Ia kiijo' koko Yerusalem, ka' mian monsangka, saba' Tumpu malia'mo mompalentah susumo Tomundo i dunia aiya. 12I Yesus notatae, “Daagi' ko samian lee' nu mian daka' anu namba i lipu' majo'on da o hangkat timbali tomundo, lapas aijo' ninsusule'mo mae. 13Ma'isa pe'e i namba, ia nolagamo sampulu' na mian pokauhonnyo, lantas nombee'i aha toto samian sa'angu' na doi mosoni'. ‘O dagangakon na doi aiya hau-haunyo aku mamba,’ tukoonyo hi aha. 14Panyo tumpu nu lipu' aijo' mongka'ideki ia. Jadi, salatan ia i nambamo, aha nonsaimo bobotokon da mompoto'i, ‘Kami madi' mongka'oho' mian aiya timbali tomundo mami.’

15Panyo lee' nu mian daka' aijo' i hangkatmo tinimbali tomundo, lantas ninsusule'mo mae i kampungnyo. Lia-lia' ia nolaga to poka-pokauhonnyo da tokamo mae hi ia, da osumbu' sangkuka na ka'untungan anu i humpak nu aha. 16Pokauhon anu momona tinokamo ka' notatae, ‘Tuan, sa'angu' na doi mosoni' anu binee'to Tuan, aitu pinotimbalingkumo sampulu'.’ 17‘Ma'ima',’ tukoonyo nu Tuan aijo', ‘beleyum pokauhon anu ma'ima'! Kalana i hahan anu toto ise-ise' beleyum timbali opalesaya. Beleyum kupotimbali mongkuasai sampulu' na kota.’ 18Pokauhon anu ko ohua'nyo tinokamo ka' notatae, ‘Tuan, sa'angu' na doi mosoni' anu binee'to Tuan aijo', pinotimbalingkumo olima'.’ 19Hi pokauhon aijo', tomundo notatae, ‘Beleyum timbali mongkuasai olima' na kota.’ 20Pokauhon sangga'at tinoka ka' notatae, ‘Tuan, aiya na dointo Tuan, pino'una'ku i lenso. 21Aku mabuhuk hi kita Tuan, kalana kita Tuan mian anu masigo. Kita Tuan mongala apaa na anu misa' posi anu i Tuan, ka' kita Tuan mongala hasin misa' i tampat anu madi' tinugalan i Tuan.’ 22Tomundo aijo' notatae hi ia, ‘Beleyum pokauhon anu ma'idek! Sumo posi potataeum aku mohukum beleyum. Nusumbu' aku mian anu masigo; aku mongala anu misa' anungku, ka' mongala hasin anu misa' i tampat anu madi' tinugalanku. 23Desumo aitu ka' kadaka' beleyum madi' momposoop doi aijo' i bank, da de minsusule'mo mae na aku montalimaje bunga nu doi aijo'?’ 24Lapas aijo' i tomundo notatae hi to mia-mian anu tinuminjo i kiijo', ‘Ala na doi aijo' hi ia, ka' bee' hi pokauhon anu ko doi mosoni' sampulu' aijo'.’ 25Panyo to mia-mian aijo' notatae, ‘Tuan, ia nohumpakmo sampulu'!’ 26#Mat. 13:12, Mrk. 4:25, Luk. 8:18 Tomundo aijo' nontaami, ‘Soba' hongo: mian anu daagi'mo, hi ia opaka bee'i lebe manjoo' mule'. Panyo mian anu madi' ko apa-apaanyo, apaa na anu hi belenyo po'ule' o ala hi ia. 27Ka' uuka boamo mae na sampo bali'ku haha atina' anu madi' mongka'oho' aku timbali tomundo'nyo. Pateimo na aha iwi-iwi' aiya i ahopku!’ ”

Pinopodaka' na i Yesus ninsoop i Yerusalem

(Mat. 21:1-11, Mrk. 11:1-11, Yoh. 12:12-19)

28Salatan tinaloakonmo i Yesus iwi-iwi' aijo', Ia i lumajangmo namba imoona tiba aha mokiijo' i Yerusalem. 29Salatan tinokamo koko Betfage ka' Betania i Bungkut nu Zaitun, Ia nonsai ua'aha na mian anu saja' mombatuki Ia mamba imoona. 30“Lako' i kampung anu ingahopan aijo',” koonyo i Yesus hi aha, “de komiu minsoop i kiijo', komiu montoa sa'angu' na keledai anaknyo sego-segot. Keledai aijo' ma'isa toho' sinake'an nu mian. Bukai ka' boamae na keledai aijo'. 31De nupokilawa nu mian hi komiu, ‘Kadaka' obukai miu na keledai atina'?’ taloakon, ‘Nupalaluimo nu Tumpu.’ ”

32Ua-ua'aha na anu saja' mombatuki Yesus aijo' namba, tinokannyo iwi-iwi' sumo anu tinaloakon-Nyomo. 33Hau-haunyo aha nombukai anak nu keledai aijo', tumpunyo notatae hi aha, “Kadaka' obukaimo miu na keledai atina'?”

34Aha nontaami, “I Tumpu mompalaluimo.” 35Lantas binoa nu aha na anak nu keledai aijo' hi Yesus. Lapas aijo' i latasan nu juba' nu aha aita' i keledai, ka' nontulungi Yesus natisake'. 36Hau-haunyo Ia notulu sake-sake' i keledai aijo', to mia-mian nompolatasmo juba' nu aha i jalan.

37Salatan i Yesus malia'mo toka i Yerusalem, i jalan pintuahan nu Bungkutnyo Zaitun, iwi-iwi' na anu mombatuki Ia da'isan hondo aijo', lewa'mo noloboo'akon mompuji' Tumpu Allah ka' montalima kaseh hi Ia, kalana iwi-iwi' na anu okabangangi sinakisianmo nu aha. 38#Mzm. 118:26 Aha noloboo'akon, “Balakatiakon na Tomundo anu tinokamo mae kalana sanggo nu Tumpu! Salamat i suluga', ka' o puji' na Tumpu Allah!”

39Toto sangga'at na mian nu Farisi kiijo' i totonga' nu mian da'isan notatae hi Yesus, “Tuumangku Gulu', tewa'mo na anu mombatuki Kita Tuuma, da momohokot.”

40I Yesus nontaami, “Palesayamo! De aha momohokot, batu-batu haha aiya na moloboo'.”

I Yesus nohangi Yerusalem

41Salatan i Yesus malia'mo ohani i Yerusalem, ka' nontoa kota aijo', Ia nohangimo. 42Tukoo-Nyo, “Paya', na kino'ima'nyo de sinaa aiya nusumbu'mo apaa na anu timbali mompodaagi' mae paladamean! Panyo uuka beleyum madi' moko ala montoa. 43Beleyum mongoa'ije sa'angu' na tempo', tempo' sampo bali'um mongewa iyayamae; aha montumbuhi ka' mompakisa beleyum lengkat mae i songko-songko na tampat. 44Nugalisi nu aha na beleyum tiba tumpu nu lipu'um; ka' madi' ko sambatu pe'e na batu nu pojohok nu aha tasusun i tampatnyo, kalana beleyum madi'mo mompalahatikan pa' hi pian na Tumpu toka mae momposalamat beleyum!”

I Yesus ninsoop i Laigan nu Tumpu

(Mat. 21:12-17, Mrk. 11:15-19, Yoh. 2:13-22)

45I Yesus ninsoop i Laigan nu Tumpu, ka' i laa'nyo na to daga-dagang i kiijo'. 46#Yes. 56:7, Yer. 7:11 “I uno nu Kitab nu Tumpu,” tukoo-Nyo hi aha, “tinulis sumo uuka: Tumpu notatae, ‘Laiganku opotimbali tampat balado'a.’ Panyo komiu mompotimbalimo petaa nu tololang!”

47 # Luk. 21:37 Sansina-sinaa i Yesus mompogulu' i Laigan nu Tumpu. Kapala nu to ima-imam tiba gulu-gulu' agama, tiba to tu'a-tu'anyo nu Yahudi mongindi da o pateimo na Ia, 48panyo madi' mohumpak jalan da obau na han aijo', kalana iwi-iwi' na mian saja' mohongo Ia, ka' mongka'ima'i potatae-Nyo.

Currently Selected:

LUKAS 19: LAILOE

Highlight

Copy