KAJADIAN 9
9
Palajanjian nu Tumpu Allah hi Nuh
1 #
Kej. 1:28
Tumpu Allah nombalakatimo i Nuh tiba to ana-anaknyo, ka' notatae, “Pinganak ka' pomolee' da'i-da'isan, da lee' nu beleyum monjojoongi songko-songko na dunia. 2Iwi-iwi' na tomonsi' ka' ikan tiba to bina-binatang sangga'at mabuhuk hi beleyum. Aha iwi-iwi' beleyum na mongkuasai. 3Iwi-iwi' aijo' timbali okaan nu beleyum, susumo suele sosu'anon anu molumba'; iwi-iwi' aijo' Ku bee' hi beleyum da bau kaanon nu beleyum. 4#Im. 7:26-27, 17:10-14, 19:26, Ul. 12:16, 23, 15:23 Anu madi' timbali okaan nu beleyum aijo'mo ponoha' anu daagi' ko baso'nyo, kalana santuu'nyo kiijo' i uno nu baso'. 5To mia-mian ka' to bina-binatang anu mompatei manusia, Ku hukum mate. 6#Kej. 1:26, Kel. 20:13 Manusia pinotimbali mo susumo Aku; kalana aijo' ihe na mompatei manusia, ia suele opatei nu manusia.
7 #
Kej. 1:28
Jadi, komiu tionyo ahi' monganak ka' pomolee' da'i-da'isan da lee nu beleyum monjojoongi songko-songko na dunia.”
8Tumpu Allah notataemo hi Nuh ka' to ana-anaknyo, 9“Uuka aiya Aku balajanji'mo tiba beleyum ka' mule' tiba lee' nu beleyum, 10ka' tiba iwi-iwi' anu ko nyawanyo, aijo'mo to tomo-tomonsi', ka' iwi-iwi' na binatang i katano'an, ka' iwi-iwi' anu sinabatakonmo i kapan aijo' hingga-hinggat tiba komiu. 11Aijo'mo na pala janjian-Ku hi belemiu: Aku binalajanji'mo tukoongku iwi-iwi' na anu ko nyawanyo madi'mo osilakai nu iyaba'. Madi'mo daagi' ko iyaba' anu monsilakai dunia aiya. 12Salaku bau tanda palajanjian anu sampe toka sidu-sidutu' anu binaung-Kumo tiba belemiu, ka' tiba iwi-iwi' anu ko nyawanyo, 13saba' Ku una'imo tandalo' aita' i kundom pontandai palajanjian-Ku hi dunia. 14De tempo'nyomo Aku mongkukubimo langit nu sehu', tandalo' aijo' otoamo; 15Aku monginau'mo palajanjian-Ku hi beleyum, ka' hi iwi-iwi' anu ko nyawanyo, aijo'mo iyaba' madi'mo daagi' monsilakai iwi-iwi' anu tumuu'. 16De tandalo' otoamo aita' i kundom, Aku suele montoamo ka' tolo inau'mo i palajanjian anu sampe toka sidu-sidutu' aijo', Aku tiba iwi-iwi' anu ko nyawanyo i dunia. 17Aijo'mo na tanda nu palajanjian-Ku anu binee'kumo hi iwi-iwi' anu ko nyawanyo aiya i dunia.”
I Nuh tiba to ana-anaknyo
18To ana-anak i Nuh anu nosabat lengkat mae i kapan aijo' atina'mo i Sem, i Ham, ka i Yafet. (I Ham aijo'mo na tuuma i Kana'an.) 19Aha totolu' na anak i Nuh, aijo'mo na mompolee' nu iwi-iwi' mian i dunia.
20I Nuh mian topo bau ale', ka' iamo na momonanyo nombau ale' nu anggur. 21Salatan i Nuh nonginumo anggur, ia nalangumo. Ingukatakonnyomo na baju'nyo iwi-iwi' lantas ia i hoyotmo langgo-langgo' i uno nu kemahnyo. 22Salatan i Ham aijo'mo tuuma i Kana'an, nontoa tuumanyo langgo-langgo', ia nosabatmo ka' nompoto'i han aijo' hi to utu-utusnyo anu ua'aha. 23Lapas aijo' i Sem ka' i Yafet nongalamo sa'angu' na juba' ka' binoka nu aha aita' mae i bekoang nu aha. Aha i lumajang nambasule' ninsoop i kemah aijo' ka' nonsabuti tuuma nu aha aijo'. Aha nompalingakon ohup nu aha da boli montoa tuuma nu aha anu i langgo'mo aijo'. 24Salatan i Nuh sininsumbu'mo madi'mo nalangu ka' sinumbu'nyomo apaa na anu binaumo nu anaknyo tampalui', hi butongnyo, 25ia notataemo,
“Tinuda'an nu balaa' na i Kana'an!
Ia timbalimo posaihon anu madi' ko angga'nyo hi to utu-utusnyo.
26Opuji' na Tumpu, Tumpu Allah i Sem!
I Kana'an timbalimo posaihon i Sem.
27O'amalakon da Tumpu Allah mompaka balakati i Yafet da tampat kajojoongannyo i dunia aiya mompaka ewamo.
O'amalakon da lee'nyo jojoong hingga-hinggat tiba lee' i Sem.
I Kana'an timbalimo posaihon i Yafet.”
28Ilapas na iyaba' aijo', i Nuh, daagi' tinumuu' 350 na taun. 29Ia sinilaka umunnyo 950 mo na taun.
Currently Selected:
KAJADIAN 9: LAILOE
Highlight
Share
Copy
Want to have your highlights saved across all your devices? Sign up or sign in