KAJADIAN 8
8
Iyaba' no otimo
1Tumpu Allah madi' mongkolilimi i Nuh ka' binatangnyo iwi-iwi' anu daagi' hi ia i uno nu kapan aijo'. Tumpu Allah nompotobungmo mombun, sahingga uee nontampu'unimo tinolo tutus. 2Mata nu uee iwi-iwi' i aluk nu dunia ka' sabatan nu uee aita' i langit ingompok-Nyomo. Madi'mo kino ujan, ka' uee nompaka tinolo tutusmo. 3Ilapas 150 na sinaa, uee madi'mo talalo naleeng. 4I tanggan sampulu' ka' popitu' bitu'on ko popitu'nyomo, kapan aijo' tinosasamo i sa'angu' na tuu' nu bungkutnyo, aijo'mo bungkutnyo nu Ararat. 5Uee saja'mo tinolo tutus ka' i tanggan sa'angu' bitu'on ko sampulu'nyomo, to tutuu'nyo nu bungkutnyo nontampu'unimo kinantoaan.
6Salatan pinatompulu'mo na sinaa, i Nuh nontuhea'akonmo sa'angu' na tolongan nu kapan 7da molapasakon sa'angu' na tomonsi' papaa'. Tomonsi' aijo' madi'mo ninsusule' mae i kapan panyo saja'mo i lumahap mokiijo' mo'uuka sangkutnyo uee nu iyaba' no'otimo hondo-hondo. 8Hau-haunyo aijo' i Nuh nolapasakonmo mule' sa'angu' na malapati' da bau ponsumbu'an pa' uee aijo' no'otimo. 9Panyo kalana uee daagi' moleetabi songko-songko na kilit nu tano', tomonsi' malapati' aijo' madi' nohumpak katengke'an. Sahingga ia po'ule'mo ninsusule' mae i kapan; i Nuh nontajuakon limanyo ka' i hakopnyo ka' pinosoopnyo. 10Tinanda'an i Nuh mule' pinitun sinaa, lantas po'ule' mule' nolapasakon tomonsi' malapati' aijo'. 11Mamalom tomonsi' aijo' ninsusule'mo mae hi ia nontongon mae santake na hon nu zaitun anu malonde' i tungkusnyo. Aijo'je ka' sinumbu' i Nuh taalu' uee no'otimo. 12Noko tanda'annyo pinitun sinaa, ia po'ule' mule' nolapasakon malapati' aijo', ka' tempo'nyo aitu tomonsi' aijo' madi'mo po'ule' ninsusule' mae hi ia.
13Salatan umun i Nuh 601 mo na taun i tanggan sa'angu' bitu'on sa'angu', uee no otimo hondo. I Nuh nombukaimo atop nu kapan aijo' ka' pinosilele'nyomo duhu-duhuk. Ia nontoa saba' kilit nu tano' kinantisanmo. 14Itanggan uampulu' ka' popitu' bitu'on ko ohua'nyo tano' kinantisanmo hondo-hondo.
15Lantas notataemo na Tumpu Allah hi Nuh, 16“Posabatmo mae ikapan atina' hingga-hinggat tiba bengkele' nu beleyum, to ana-anak nu beleyum ka' to bengke-bengkele' nu aha. 17Sabatakonmo iwi-iwi' na tomonsi' ka' binatang sangga'at, anu daka' ka' anu ise', da aha timbali momolee' ka' monsongkohi songko-songko na dunia.” 18Lantas nosabatmo mae na i Nuh i kapan aijo' hingga-hinggat tiba bengkele'nyo, to ana-anaknyo ka' to bengke-bengkele' nu aha. 19Iwi-iwi' na tomonsi' ka' binatang i katano'an nosabatmo mae i kapan aijo', toto sangahan nosi poga-pogala'mo.
I Nuh nonsombahkonmo koloban
20I Nuh nombaumo sa'angu' na mezbah bau ponsombahkonan koloban hi Tumpu. Toto sangahan na tomonsi' ingalanyo sa'angu' ka' binatang sangga'at anu timbali okaan. Lantas sinombahkonnyomo salaku koloban anu opotunu i mezbah aijo'. 21Hongohisnyo nu koloban anu sinombahkonmo aijo' nomposanangmo kinyonyoa nu Tumpu, sahingga Ia notataemo i uno nu kinyonyoa-Nyo, “Aku madi'mo daagi' mongkutuki dunia aiya kalana palabuatan nu manusia; Ku sumbu' saba' aha daagi' pe'e tempo'nyo ma'isa motu'a, pikilan nu manusia aijo' ma'idek. Aku madi'mo daagi' monsilakai iwi-iwi' apaa na anu ko nyawanyo, susumo anu sala'je binaung-Ku aiya. 22Salatanmo pe'e dunia aiya daagi' ko tempo'nyo mosu'an, ka' mongala bua'nyo, tempo'nyo nu bakin ka' tempo'nyo nu panas, tempo'nyo nu posinaa ka' tempo'nyo nu ehua, sina ka' malom.”
Currently Selected:
KAJADIAN 8: LAILOE
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in