KAJADIAN 13
13
I Abram kai' i Lot noga'a-ga'atmo
1I Abram nompala'imo Mesir lantas nambamo i sasu utara i bahagian selatan i Kana'an tiba bengkele'nyo ka' iwi-iwi' na anu daagi' hi ia, ka' i Lot suele ahi' nombatukimo. 2I Abram kaya hondo; ia daagi' ko domba, mee', sapi' ka' mule' salaka tiba mosoni'. 3Sahingga ia nambamo lengkat i sa'angu' na tampat, ka' nolalinmo mule' i tampat sangga'at, nompanjolo Betel. Ia tinokamo i da'erah olot nu Betel ka' Ai, i tampat anu ko balakatnyo anu u'utu mae pinombauannyo kemah, 4ka' mule' pinombauannyo mezbah. Ikiijo'mo na pinonsombannyo Tumpu.
5I Lot suele ko bengkele'nyomo ka' ko to ana-anaknyomo tiba to posa-posaihonnyo ka' domba, mee' ka' sapi'. 6Kalana aijo' tano' anu ikiijo' madi' ewa ka' madi' manjoo' na hemputnyo bau kajojoongan nu aha ohua', kalana potu'on nu aha talalo manjoo'. 7Lantas pinainggagamo na to pola-polaya' potu'on i Abram ka' to pola-polaya' potu'on i Lot. (Tempo'nyo aitu mian nu Kana'an ka' mian nu Feris daagi' monjoongi tano' aijo'.)
8I Abram notataemo hi Lot, “Kita aiya moto utus, madi' ma'ima' de to mia-mian nu beleyum ka' to mia-mianku painggaga. 9Kalana aijo' sahanyo kita moga'a-ga'atmo. Pile'imo na bahagian nu tano' aiya iya na anu nu ka'ima'i. De beleyum mamba i sasu aiya, aku mamba i sasu sangga'at.”
10 #
Kej. 2:10
I Lot nontanggalakon songko-songko, ka' tinoanyo iwi-iwi' na Bangka'nyo nu Yordan toka-toka i kota Zoar manjoo' na ueenyo, sumomo Taman nu Tumpu kabai sumomo tano' nu Mesir. (Sumomo aijo' na balu-balu'nyo u'utu mae ma'isa pe'e Tumpu nongidei to kota-kota nu Sodom ka' Gomora.) 11Ahennyo i Lot nompile'imo songko-songko na Bangka'nyo nu Yordan aijo', lantas nambamo i sasu kabete'an. Sumo aijo' na ua'aha aijo' noga'a-ga'atmo. 12I Abram tataap jinojoongmo i tano' Kana'an, panyo i Lot nombaumo kemah i to kota-kota anu kiijo' i bangka'nyo tinoka-toka kiijo' mae koko Sodom. 13Kota Sodom aijo' jojoongan nu to mia-mian anu ma'idek na kinyonyoanyo ka' baladosa' hi Tumpu.
I Abram nolalinmo namba i Hebron
14Salatan i Lot nambamo, Tumpu notataemo hi Abram, “I tampat kinatinjoan nu beleyum atina' tanggalalokon ima-ima' na tampat aiya songko-songko; 15#Kis. 7:5 Ku bee'mo hi beleyum ka' hi lee' nu beleyum na tano' songko-songko anu tinoamo nu beleyum atina' da timbalimo bau bagi nu beleyum sampe toka sidu-sidutu'. 16Ku bee'ije na beleyum lee' anu da'isan hondo, sahingga madi' ko samian na anu moko bilang aha. Sumomo mian madi' moko ala mombilang abu' i tano', sumo aitumo na lee' nu beleyum madi' opoko ala obilang. 17Uuka aiya songkohimo na tano' aiya kalana Ku bee'mo hi beleyum.” 18Lapas aijo' i Abram nolalinmo kemahnyo, lantas tinataapmo koko kau' anu singkap ko balakatnyo tampat lewa' ponsomban kiijo' mae i Mamre koko Hebron ka' ikiijo'mo na ia nompotinjo mezbah bau ponsomban Tumpu.
Currently Selected:
KAJADIAN 13: LAILOE
Highlight
Share
Copy
Want to have your highlights saved across all your devices? Sign up or sign in
