KAJADIAN 12
12
I Abram i lagamo nu Tumpu Allah
1 #
Kis. 7:2-3, Ibr. 11:8 Tumpu notataemo hi Abram, “Pala'imo na lipu' no beleyum, sampoto utusan nu beleyum ka' laigan nu tuuma nu beleyum, lantas mambamo i lipu' anu Ku potiju' hi beleyum. 2Ku ponjoo'je na lee' nu beleyum ka' aha timbalije bansa anu daka'. Ku balakatije na beleyum ka' mompotimbali sanggo nu beleyum talasanggo, sahingga beleyum timbalije balakat.
3 #
Gal. 3:8
Ku balakatije na to mia-mian anu mombalakati beleyum
ka' mongkutuki to mia-mian anu mongkutuki beleyum.
Ka' kalana beleyum
Ku balakatije na bansa iwi-iwi' i dunia.”
4-5I Abram umunnyo pitumpulu'mo ka' olima' na taun tempo'nyo ia nompala'imo mae Haran, susumo anu pinalentahkonmo nu Tumpu hi ia. I Abram namba i tano' Kana'an hingga-hinggat tiba i Sarai bengkele'nyo, ka' i Lot ponuanakonnyo ka' iwi-iwi' na halata'nyo tiba to posa-posaihon anu i humpak nu aha i Haran.
Salatan aha tinokamo i Kana'an, 6i Abram nonsongkohi tano' aijo' sampe tinokamo i kau' anu ko balakatnyo kiijo' i More, aijo'mo tampat ponsomban Tumpu kiijo' i Sikhem. (Tempo'nyo aitu mian nu Kana'an daagi' monjoongi tano aijo'!) 7#Kis. 7:5, Gal. 3:16 Tumpu nanintoamo hi Abram ka' notatae hi ia, “Aiyamo na lipu' anu Ku bee'mo hi lee' nu beleyum.” Lantas i Abram nompotinjomo sa'angu' na mezbah ikiijo' bau ponsomban Tumpu anu nanintoamo hi ia. 8Lapas aijo' ia nambamo i sasu selatan, mokiijo' i da'erah anu mabungkut i sasu kabete'an kota nu Betel, ka' nombaumo kemah i olot nu Betel ka' Ai: Betel i sasu kinsoban ka' Ai i sasu kabete'an. Ka' suele mule' ikiijo' ia nompotinjomo mezbah ka' nonsombahmo Tumpu. 9Lapas aijo' ia namba mule' lengkat i sa'angu' na tampat namba mule' i tampat sangga'at mompanjolongi bahagian sasu selatan tano' nu Kana'an.
I Abram kiijo' i Mesir
10Panyo kiijo' i Kana'an hau-haunyo tinokanmo nu kasusa'an i anu okaan anu talalomo hondo sahingga i Abram namba nompaka pajo'onmo mule' nokiijo' i sasu selatan, i lipu' nu Mesir da jojoongmo ikiijo' mae, sampe madi'mo ko kasusa'an aijo'. 11Tempo'nyo ia nompala'imo potempasan ka' ninsoopmo i lipu' nu Mesir, notataemo na ia hi Sarai bengkele'nyo, “Beleyum handa, bengkele'ku. 12De mian nu Mesir montoa beleyum, tantu koonyo nu aha beleyum bengkele'ku, lantas aku tantu opateimo ka' beleyum na opotumuu'. 13#Kej. 20:2, 26:7 Jadi sahanyo nu poto'i, beleyum atina' utusku ise' da aku opotumuu' ka' madi' opoposia kalana beleyum.” 14Ka' memang tinotu'u, salatan i Abram nompala'imo potempasan ka' tinokamo i lipu' nu Mesir, mian nu Mesir nontoamo tukoonyo nu aha i Sarai handa hondo. 15To pia-piangkuka na mian anu ko pangkatnyo mokalaja i laigan nu tomundo nontoamo ia ka' nompoto'i hi tomundo palias na kino handanyo na boune kiijo'; kalana aijo' ia binoamo i laigan nu tomundo. 16Kalana i Sarai, sahingga i tomundo madi' nompoposia i Abram ka' nombee'imo ia to posa-posaihon, sampahas na domba ka' mee', sapi', keledai ka' unta.
17Panyo kalana i tomundo nongalamo i Sarai, Tumpu nompotokamo mae to panya-panyakit anu okabuhuk hi tomundo, ka' to mia-mian i uno nu laigannyo. 18Lantas i tomundo nolagamo i Abram ka' nompokilawa hi ia, “Apaa na anu binaumo nu beleyum hi belengku aiya? Kadaka' madi' pinoto'i nu beleyum ia aitu bengkele' nu beleyum? 19Kadaka' beleyum nompoto'i ia aitu utusum ise' ka' nompobee'mo aku nongala binau bengkele'ku? Aiyamo na ia, bengkele' nu beleyum; alamo ka' lako'mo!” 20I tomundo nompalentahmo hi to pia-piangkuka anu ko pangkatnyo, ka' aha nonsabatakonmo i Abram da mompala'imo lipu' aijo' hingga-hinggat tiba bengkele'nyo ka' iwi-iwi' anu daagi' hi ia.
Currently Selected:
KAJADIAN 12: LAILOE
Highlight
Share
Copy
Want to have your highlights saved across all your devices? Sign up or sign in