SISIKON NU TO RASUL-RASUL 8

1Ka' i Saulus suele sinanangmo kalana mian aijo' pinateanmo.

I Saulus nongkabisa'imo jama'at

Sinaa aitu mule' jama'at i Yerusalem mulaimo saja' o loloi', sahingga iwi-iwi' mian anu palesayamo, me sambiha'nyo to rasul-rasul, noga'a-ga'atmo nokiijo' i songko-songko na tano' nu i Yudea ka' i Samaria. 2To mia-mian anu mabuhuk hi Tumpu nolamunmo i Stefanus ka' nohangimo ia talalomo hondo nolibos.

3 # Kis. 22:4-5, 26:9-11 Panyo i Saulus saja'mo binala usaha mongkabisa'i jama'at. Ia namba lengkat i sa'angu' na laigan mokiijo' i laigan sa'angu' ka' mohela' monsabatakon to mia-mian palesaya, lantas momposoop aha i uno nu talungku'.

Lele Ma'ima' lengkat mae hi Tumpu pinolelemo i Samaria

4To mia-mian palesaya anu noga'a-ga'atmo aijo' noleleakonmo Lele Ma'ima' lengkat mae hi Tumpu aijo' iyaya mae. 5I Filipus namba nokiijo' i kota Samaria ka' noleleakon hi to mia-mian kiijo' mae mongkona Tomundo anu Momposalamat anu jinanji'mo. 6Salatan to mia-mian nohongomo i Filipus notatae ka' aha nontoamo hahan anu okabangangi binaunyo, da'isan na anu aijo' hi aha nompalahatikanmo apaa na anu tinaloakon i Filipus. 7Kalana to roh-roh ma'idek nosabatmo ka' naha kihisanmo nompala'imo mian da'isan anu pininsoopanmo nu setan. To mia-mian kapi' ka' pengko da'isan na anu pino'alinmo. 8Sahingga to mia-mian i kota Samaria aijo' i lame'mo hondo.

9I kota aijo' daagi' ko samian na mo'ane sanggonyo i Simon, anu noko to pia-piamangamo na tempo'nyo nombau to mia-mian nu Samaria tinalagoda nu ilimu'nyo. Ia nompoto'i hi to mia-mian tukoonyo ia mian hebat. 10Sahingga iwi-iwi' na mian da'isan i kota aijo' talalomo hondo nompalahatikan ia. “Mian aiya ko kahosonan lengkat hi Tumpu Allah anu talalo talasanggo, salaku ‘Kahosonan anu Daka'’ aijo',” na koonyo nu aha. 11Pininmo hondo na ia lewa' nonggoda to mia-mian tiba kahosonan nu ponsumbu'annyo, sahingga aha talalomo nompalahatikan ia. 12Panyo i Filipus nompolele hi aha mongkona Lele Ma'ima', mosia na Tumpu mompalentah sumo Tomundo ka' mongkona i Yesus Kristus, Tomundo anu Momposalamat aijo'. Sahingga aha pinalesayamo i lele anu pinotokakon i Filipus, lantas aha pinalamandikanmo mau mian to momo'ane mau pe'e mian to bouboune. 13Posi i Simon pe'e suele pinalesayamo. Ka' ilapas pinalamandikan, ia lau-laus nombatukimo Filipus. Hahan anu okabangangi tini-tinimbali aijo' nombau i Simon kino banga-bangang.

14To Rasul-rasul i Yerusalem nohongo tukoonyo nu aha to mia-mian nu Samaria nontalimamo potatae nu Tumpu. Kalana aijo' aha nonsai i Petrus ka' i Yohanes namba nokiijo'. 15Salatan i Petrus ka' i Yohanes tinokamo, aha nondo'akonmo to mia-mian nu Samaria aijo' da aha mohumpak Roh nu Tumpu, 16kalana Roh nu Tumpu ma'isa tinoka nongkuasai mau pe'e samian anu aijo' hi aha; aha olaje pinalamandikan nu sanggo i Tumpu Yesus. 17Lantas i Petrus ka' i Yohanes nompotiikmo lima nu aha hi to mia-mian nu Samaria aijo'; sahingga aha nontalimamo Roh nu Tumpu Allah.

18I Simon na nontoa saba' lima nu to rasul-rasul pinotiikmo i buan nu ubak nu mian haha aijo', Roh nu Tumpu binee'mo hi aha. Kalana aijo' i Simon nomboa doi hi Petrus ka' hi Yohanes, 19ka' notatae, “Bee'i mae na aku suele kuasa aijo', da de limangku opotiik maumo pa' hi he, mian aijo' mohumpakmo Roh nu Tumpu.”

20Panyo tinaaman i Petrus, “Silakamo na beleyum ka' doium! Te kooyum anu obee' nu Tumpu timbali o oli nu doi? 21Beleyum madi' ko hak mombatuki pakalaja'an mami, kalana kinyonyoaum madi' totu'u hi Tumpu. 22Kalana aijo' pala'imo na tanga'anum anu ma'idek aijo', ka' poita hi Tumpu da Nu ampuni na pikilanum anu ma'idek aijo'! 23Kalana ku sumbu' na beleyum saja' madi' sanang hi sangko sangalu ka' nu tobotuani nu ka'idekan.”

24Lantas i Simon notatae hi Petrus ka' hi Yohanes, “Tulungi pe'e poitakon hi Tumpu da madi' ko sa'angu' pe'e na anu tinaloakonmo nu to utu-utus aijo' jadi hi belengku.”

25Noko lapas na aha nombee'i katalangan ka' nompotoka potatae nu Tumpu, i Petrus ka' i Yohanes ninsusule'mo i Yerusalem. Ka' manjoo' na to kampu-kampung i lambanan nu aha aijo' nompotoka Lele Ma'ima' i Samaria.

I Filipus tiba samian anu ko pangkat matangkas lengkat mae i Etiopia

26Samian na Malaikat nu Tumpu notatae hi Filipus, “Donganmo mamba! Lako'mo mokiijo' i sasu Selatan i jalan anu lengkat mae i Yerusalem mokiijo' i Gaza.” Jalan aijo' liing. 27-28Sahingga i Filipus mule' nambamo. Tempo'nyo aitu daagi' ko samian anu ko pangkat mokalaja i kalaja'an Etiopia anu hau-haunyo lumambanan minsusule' mokiijo' i lipu'nyo. Mian aitu samian anu ko pangkat matangkas anu mongulus iwi-iwi' kakaya'an i Kandake, Tomundo boune i lipu' Etiopia. Mian aijo' mambamo nokiijo' i Yerusalem da balado'a hi Tumpu, ka' uuka aiya hau-haunyomo minsusule' tiba bendinyo. Hau-haunyo suha-suhang i uno nu kasake'annyo aijo' ia nombasa' Kitab i Nabi Yesaya. 29Roh nu Tumpu notatae hi Filipus, “Lako'mo oha-ohani i kasake'an aijo'.” 30Sahingga i Filipus namba nongohani kasake'an aijo', lantas ia nohongo mian aijo' mombasa' Kitab Nabi Yesaya. I Filipus nompokilawa hi ia, “Apaa Kita Tuan mangalati' i anu o basa' nu Kita Tuan aijo'?”

31Tinaaman nu mian aijo', “Mosia na aku mangalati', de madi' ko anu mompotingaanakon hi belengku?” Lantas sinale'annyo na i Filipus sumake' i bendi ka' sumuhang hingga-hinggat ia. 32#Yes. 53:7-8 Aiyamo na to aya-ayat anu binasa'nyo aijo',

“Ia sumomo domba anu pinungu da o kolot,

susumo anak nu domba anu madi' molokak de bulunyo o gunting,

sumo aijo'mo na Ia madi' notatae santaa' pe'e.

33Ia pinopo ambang ka' binee'an hukuman madi' adin.

Napas-Nyo binubut i dunia aiya,

sahingga samian pe'e madi' ko anu moko ala monsisikakon ihe na lee'-Nyo.”

34Anu ko pangkat matangkas lengkat i Etiopia aitu notatae hi Filipus, “Soba poto'iakon mae hi belengku, ihe na anu nu patui nu nabi aiya? Posi butongnyo kabai mian sangga'at?” 35Sahingga i Filipus mule' mulaimo notatae; ia nompake aya-ayat aijo' salaku pontampu'uni da moleleakonmo Lele Ma'ima' mongkona i Yesus hi anu ko pangkat matangkas aijo'. 36Hau-haunyo i lumambanan, aha tinokamo i sa'angu' na tampat anu ko ueenyo. Anu ko pangkat matangkas aijo' notatae, “Toa aijo' ko ueenyo! Apaa mule' na kulangnyo mompalamandikan aku?”

[ 37I Filipus notatae, “De Kita Tuan palesayamo totu-totu'u i kinyonyoa, Kita Tuan timbalimo o palamandikan.”

“Aku palesayamo hi Yesus Kristus, aijo'mo Anak nu Tumpu Allah,” koonyo nu anu ko pangkat matangkas lengkat mae i Etiopia aijo'.]

38Lantas ia nompoto'i bendinyo aijo' belenti; lapas aijo' ua-ua'aha, i Filipus ka' anu ko pangkat matangkas aijo' nintau'mo nokiijo' i uee ka' i Filipus nompalamandikan ia. 39Salatan aha ninsusule'mo lengkat mae i uee, Roh nu Tumpu Allah nongalamo i Filipus lengkat i kiijo'. Anu ko pangkat matangkas lengkat mae i Etiopia aijo' madi'mo daagi' nontoa ia. Anu ko pangkat matangkas aijo' i lame'mo na nolausakon lumambanannyo. 40Padahan i Filipus noko kiijo'mo i Asdod. Ka' salatan ia nolausakonmo lumambanannyo, ia mompolelemo Lele Ma'ima' mongkona i Yesus i songko-songko na kota sampe tinoka i Kaisarea.

Currently Selected:

SISIKON NU TO RASUL-RASUL 8: LAILOE

Highlight

Copy