SISIKON NU TO RASUL-RASUL 7

Pidatu i Stefanus

1Imam Daka' nompokilawa hi Stefanus, “Apaa anu tinaloakonmo nu mian aijo' iwi-iwi' totu'u?” 2#Kej. 12:1 Tinaaman i Stefanus, “To Utu-utus ka' to Tutuuma! Soba hongo na aku! Ma'isa pe'e mompolee'to i Abraham nolalin nokiijo' i Haran, tempo'nyo ia daagi' jojoong i Mesopotamia, Tumpu anu opopodaka' tinokamo hi ia, 3ka' notatae, ‘Pala'imo na lipu'um ka' to utu-utusum. Lako'mo i lipu' anu Ku potiju' hi beleyum.’ 4#Kej. 11:31, 12:4 Sahingga i Abraham nompala'i lipu' nu Kasdim, lantas nolalin nokiijo' i Haran. Noko silaka na Tuuma i Abraham, Tumpu nolalinmo i Abraham namba i lipu' aiya anu kajo-kajojoongan uuka aiya nu to Utu-utus ka' to Tutuuma iwi-iwi'. 5#Kej. 12:7, 13:15, 15:18, 17:8 Tempo'nyo aitu madi' ko sambagian pe'e na lipu' aiya anu binee' nu Tumpu hi Abraham da timbali pusaka' i Abraham; salawo pe'e madi' binee' hi ia. Panyo Tumpu binajanji'mo tukoonyo Ia mombee'ije i Abraham da bau pusaka' i Abraham tiba lee'nyo. Tempo'nyo aitu i Abraham madi' ko anak. 6#Kej. 15:13-14 Panyo aiyamo na anu tinaloakon nu Tumpu hi ia, ‘Lee' nu beleyum jojoongje susumo mian tumoka i lipu' nu mian sangga'at. To mia-mian nu lipu' aijo' nompalentah aha talalo hondo nonsakisa pato atu na taun na kopinnyo. 7#Kej. 3:12 Panyo Aku mohukumje bansa anu mombotuani aha, ka' aha tionyo mosabat lengkat i lipu' aijo' ka' monsombahje Aku i tampat aiya.’ 8#Kej. 17:10-14, 21:2-4, 25:26, 29:31–35:18 Noko potatae sumo aitu palajanjian aijo' pinohosonmo nu Tumpu nu adat monsunat. Sahingga salatan i Ishak anak i Abraham i hampemo, i Abraham nonsunatmo ia tempo'nyo ia umunnyo iyalunmo na sinaa. Lapas aijo' i Ishak suele nonsunatmo anaknyo, aijo'mo i Yakub. Ka' i Yakub mule' nonsunatmo sampu-sampulu' ka' ohua' na anaknyo, aijo'mo anu tinimbalimo to tutuuma mompolee' nu bansa Yahudi.

9 # Kej. 37:11, 28, 39:2, 21 To Tutuuma anu nolee'akon mae kita aijo' nongka'idekimo i Yusuf, sahingga aha nompobaluk ia tinimbali botuan i Mesir. Panyo Tumpu nombalakati ia, 10#Kej. 41:39-41 ka' nolapasakonmo ia i iwi-iwi' na kasusa'annyo. Tumpu nombee'imo ia kapandean tempo'nyo ia nangadap hi Firaun tomundo nu Mesir, sahingga i Firaun nompotimbali ia Gubernur i lipu' Mesir ka' nongkuasaimo Laigan Daka' i Firaun. 11#Kej. 42:1-2 Lapas aijo' tinokamo na tempo' nu kapo'ohopan anu daka' i songko-songko na lipu' nu Mesir ka' i Kana'an sahingga to mia-mian sinansalamo hondo. Mompolee'to madi'mo nohumpak anu okaan. 12Sahingga salatan i Yakub nohongomo ko gandum kiijo' mae i Mesir sinainyomo na to ana-anaknyo, mompolee'to, ai-aituje na namba nokiijo'. 13#Kej. 45:1, 16 Tempo'nyo aha namba kinopinduannyo, i Yusuf nompoto'i hi to utu-utusnyo aijo', tukoonyo iamo na i Yusuf. Tempo'nyoje aitu na tomundo nu Mesir nonsumbu' mongkona to utu-utus i Yusuf. 14#Kej. 45:9-10,17-18, 46:27 Lapas aijo' i Yusuf nompotuunmo hi tuumanyo, aitumo i Yakub, da mompoita ia hingga-hinggat tiba to utu-utusnyo iwi-iwi' molalinmo i Mesir – iwi-iwi'mo aha pitum pulu' ka' olima' na mian. 15#Kej. 46:1-7, 49:33 Sahingga i Yakub nolalin i Mesir ka' i kiijo'mo mae na ia ka' mompolee'to sinilaka. 16#Kej. 23:3-16, 33:19, 50:7-13, Yos. 24:32 Bangke' nu aha imihinyo mae po'ule' binoa nokiijo' i Sikhem ka' i lamun i polamunan anu ingolimo nu doi i Abraham hi bansa Hemor i Sikhem.

17 # Kel. 1:7-8 Salatan malia'mo na tempo'nyo Tumpu mompodaagi'mo janji'-Nyo hi Abraham, bansanto i Mesir nintuangmo lebemo dina'isan. 18Ahennyo samian na tomundo sangga'at anu madi' monsumbu' i Yusuf, nompalentahmo i Mesir. 19#Kel. 1:10-11, 22 Tomundo aijo' nompahaikakonmo bansanto talalo masigo hi mompolee'to. Ia nompakisamo aha mongalin to bunga-bunga mea' anu sala'je i hampe bolimo opalakai da matemo. 20#Kel. 2:2 Tempo'nyomo aitu na kinahampean i Musa; ia bunga mea' anu ma'ima' hondo. Tinotolu' na bitu'on na kinopinnyo ia pinotuu' i laigan nu tuumanyo, 21#Kel. 2:3-10 ka' salatan ia ingalinmo, anak langkoyang nu Firaun nongalamo ia, lantas pinotuu'nyomo susumo posi anaknyo.

22Iwi-iwi' na ilimu' nu bansa Mesir ingajanakonmo hi ia, ka' ia tinimbalimo mian anu talalo kokuasa i uno nu kotae-tae ka' i palabuatannyo.

23 # Kel. 2:11-15 Tempo'nyo i Musa umunnyo patom pulu'mo na taun, kino kinyonyoamo na ia da mamba montoa mosia na bau-baunyo nu bansanyo mian nu Israel. 24Lantas ia nontoa samian anu aijo' hi aha sinakisamo nu samian na mian nu Mesir; sahingga tininjohannyomo na mian anu sinakisamo aijo' ka' pinateannyo na mian nu Mesir aijo'. 25I Musa monsangka bansanyo mangalati'je tukoonyo Tumpu hau-haunyo mompakemo ia da mompobebasmo aha. Panyo inyata'nyo aha madi' mangalati'. 26Dodododopnyo ia nontoa mule' ua'aha na mian nu Israel mahantuda', lantas ia binala usaha nompodame aha. Ia notatae, ‘Komiu aiya moto utus. Kadaka' komiu mahantuda'?’ 27Panyo mian anu nonjagun sangalunyo aijo' nonsulakon i Musa i sohipi'nyo lantas notatae, ‘Ihe na nohangkat beleyum timbali polaya' ka' mian kopian mami? 28Apaa beleyum ka'oho' mompatei aku, sumo beleyum nompateimo mian nu Mesir nabongi?’ 29#Kel. 18:3-4 Salatan i Musa nohongo apaa na anu tinaloakon nu mian aijo', i Musa nalai nompala'i Mesir lantas jinojoong i lipu' nu Median. I kiijo' mae ia nohumpakmo ua'aha na anak.

30 # Kel. 3:1-10 Patom pulu' na taun lapas aitu, samian na malaikat tinokamo hi Musa i padang ewa ohani Bungkut nu Sinai. Malaikat aijo' tinoka i uno nu apu i kuhat anu hau-haunyo moak. 31I Musa binangang na nontoa han aitu, sahingga ia namba nongohani da monsumbu' pa' apaa na aijo'. Lantas ia nohongo lewo' nu Tumpu notatae, 32‘Akumo na Tumpu mompolee' miu; Aku Tumpu i Abraham, i Ishak, ka' i Yakub.’ I Musa ilakatnyomo nu buhuk sahingga madi' daagi' baani na montoa kuhat aijo'. 33Lapas aijo' Tumpu notatae mule', ‘Lapasakon na sandaan anu nunu pake aijo', kalana tano' tampat katinjoan nu beleyum aijo', tano' anu susi'. 34Aku nontoamo ka' nompalahatikanmo ideknyo nu kasansala'an nu mian-Ku i Mesir. Aku nohongomo indi nu aha ka' Aku mambamo mompobebas aha. Uuka aiya, imbo'! Aku monsaimo beleyum minsusule' mokiijo' i Mesir.’

35 # Kel. 2:14 I Musamo aiyamo na i Musa anu madi' nuka'ima' nu bansa Israel ka' anu madi' otalima nu aha ka' notatae sumo uuka, ‘Ihemo na nohangkat beleyum timbali polaya' ka' mian kopian mami?’ Panyo iamo na mian anu sinai nu Tumpu timbali polaya' ka' pomposalamat, kalana bantuan lengkat hi malaikat anu tinoka hi ia i kuhat anu moak aijo'. 36#Kel. 7:3, 14:21, Bil. 14:33 I Musa ai-aijo'mo na polaya' nu bansa Israel nosabat lengkat i Mesir ka' nombau anu okabangangi tiba hahan anu ma'isa toho' tinimbali i Mesir, i Ambai anu Momea' ka' i padang ewa kinopinnyo patom pulu' na taun. 37#Ul. 18:15, 18 Iamo suele na i Musa anu notatae hi bansa Israel, ‘Tumpu Allah mombee'je hi beleyum samian na nabi anu pinile'an lengkat hi posi komi-komiumo atina', susumo Ia nompile'imo aku.’ 38#Kel. 19:1–20:17, Ul. 5:1-33 I Musamo ai-aijo' hi aha bansa Israel i padang bone', anu nowakini malaikat nota-notatae i Bungkut nu Sinai tiba mompolee'to. Iamo na nontalima lengkat hi Tumpu lele anu moko tumuu' da opotokakon hi kita.

39Mau mule' sumo aitu mompolee'to madi' mongka'oho' tulut hi ia. Aha madi' nontalima ia ka' mongka'oho'mo minsusule' i Mesir. 40#Kel. 32:1 Aha notatae hi Harun, ‘Baui mae na kami pilogot, da pilogot haha aijo' na molaya' kami. Kalana kami madi'mo nonsumbu' pa' apaa na anu tinimbalimo hi Musa anu nomboa mae kami nosabat lengkat i Mesir!’ 41#Kel. 32:2-6 Lantas tempo'nyo aitu aha nombau sa'angu' na patong anak nu sapi', lapas aitu aha nonsombahkonmo koloban i patong aijo' ka' nombau-bauon ponsombah anu pinosi bau nu aha aijo'. 42#Am. 5:25-27 Sahingga Tumpu nompala'imo aha ka' nompojohokmo aha monsombah to manda-mandala' i langit. Aijo' pokakanamo tiba apaa na anu tinulis i uno nu kitab nu to nabi-nabi. Sumo uuka,

‘O to mia-mian nu Israel! Misa'mo bau baging-Ku

komiu mongkolot ka' mongkulubanakon binatang pinatompulu' na taun na kopinnyo i padang bone'.

43Kemahmo nu pilogot Molokh (sanggo nu pilogot nu mian Simitis) na opoboa-boa miu

tiba patong binatang nu pilogot miu, aijo'mo i Refan;

te patong anu binau miu da osombah.

Kalana aijo' Ku alinje na komiu sampe majo'on mokiijo' i sambiha' nu lipu' Babel.’

44 # Kel. 25:9, 40 Kemah katokaan nu Tumpu hi mian ola kiijo' hi mompolee'to i padang bone'. Kemah aijo' binau kalana palentah nu Tumpu hi Musa ka' mombatuki sonto' anu pinotoa nu Tumpu Allah hi Musa. 45#Yos. 3:14-17 Lapas aitu kemah aijo' pinoboa-boa nu mompolee'to tempo'nyo aha tiba i Yosua namba nompo'ago lipu'to aiya i kakuasa'an nu to bansa-bansa anu i laa' nu Tumpu na aha. Kemah aijo' kiijo' una-una' sampe tempo'nyo i Daud. 46#2Sam. 7:1-16, 1Taw. 17:1-14 I Daud nomposanang kinyonyoa nu Tumpu ka' ia nompoitamo hi Tumpu da ia opobee' na mombau sa'angu' na laigan ponsombaan Tumpu anu nuso-nusombah i Yakub aijo'. 47#1Raj. 6:1-38, 2Taw. 3:1-17 Panyo i Salomo na nompotinjo laigan bau ponsombaan Tumpu, Allah.

48Panyo Tumpu anu Matangkas na Kuasanyo madi' jojoong i uno nu laigan anu obau nu mian; kalana i uno nu kitab nu nabi tinulismo sumo uuka,

49 # Yes. 66:1-2 ‘Langit aitumo na kasuhangan-Ku,

ka' tano' polapisi tengkeng-Ku.

Laigan apaa na anu ka'oho' opotinjoakon miu hi beleng-Ku?

Iya mae na tampat bau pilawean-Ku?

50Misa' posi Aku ahi' na nompotimbali anu haha aitu iwi-iwi'?’

sumo aijo'mo na koonyo nu Tumpu.

51 # Yes. 63:10 Palias hondo na ko panggaganyo na to Utu-utus ka' talalo susa' na mohongo Tumpu! Bihing miu mabongon hondo madi' mohongo potatae nu Tumpu! Komiu pokakana tiba mompolee' miu; saja' panggaga hi Roh nu Tumpu! 52Apaa daagi' ko nabi anu madi' sinakisa nu mompolee' miu? Aha nompateimo to posa-posaihon nu Tumpu anu u'utu pe'e mae nombebakonmo tukoonyo. Posaihon nu Tumpu anu totu'u, tokaje mae. Ka' uuka aiya komiu nongkabisa'imo ka' nompateimo Posaihon nu Tumpu aijo'. 53To mala-malaikat nompotokamo pale-palentah nu Tumpu Allah hi komiu, panyo komiu madi' mohongo-hongo.”

I Stefanus pinahambunu'akonmo nu batu

54Salatan to mia-mian Mian Kopian Daka' nu Agama aijo' nohongomo iwi-iwi' anu tinaloakon i Stefanus, na'idekanmo hondo na kinyonyoa nu aha ka' pinusa hondo hi ia. 55Panyo i Stefanus anu kinuasanmo nu Roh nu Tumpu, nonsinda langit. Ia nontoamo kadaka'an nu Tumpu ka' i Yesus tinuminjomo i tampat kakuasa'an sasu koanan nu Tumpu. 56“Toa,” koonyo i Stefanus, “aku nontoamo suluga' tinontuhea'mo ka' Anak nu Mian tinuminjomo i sasu koanan nu Tumpu!”

57To Mia-mian Kopian Daka' nu Agama aijo' nompitimo bihing nu aha ka' lewa' noloboo', lantas hingga-hinggat nohakop i Stefanus. 58Aha nohela' ia nosabat i sambiha' nu kota ka' lapas aitu pinahambunu'akonmo nu aha nu batu. To mia-mian anu nonsakisi apaa na anu tinimbalimo aijo' nompo'una' baju' nu aha hi samian na olitau sanggonyo i Saulus. 59Hau-haunyo aha mompahambunu'akon i Stefanus, i Stefanus noloboo', “Kita Tumpu Yesus, talimamo na roh-ku!” 60Lantas ia dinumaladupumo ka' noloboo' daka-daka' ka' notatae, “Kita Tumpu, boli dosa' aiya opokona hi aha!” Noko taloakonnyo sumo aijo' ia sinilaka.

Currently Selected:

SISIKON NU TO RASUL-RASUL 7: LAILOE

Highlight

Copy