Pewaliana 28

1Uko tiꞌo, hi Isaki mowowoi hi Akoꞌ, katoꞌo mobarakatiꞌi hei mepaha pe io notiꞌi, “Inioꞌko moroa hantambimu ka towoweꞌe toKanaꞌa. 2Mantimomoko, nolou pe Pada-Aram, pe tambina hi Betuel uweꞌmu, hei iroamo katoꞌo haduo ipohantambi ka anaꞌna pinoꞌumoꞌmu hi Laba. 3Woi-woina Pueꞌ Ala to Makuasaꞌ mobarakatiko wute woriꞌ anaꞌmu hei oꞌuweꞌmu hingkeꞌna muleꞌmu tiꞌo mewali topeduluna woriꞌ roboꞌ ngkodeꞌ. 4Woi-woina Pueꞌ Ala to Makuasaꞌ mobarakatiko hante muleꞌmu, hibali hante pebarakati to niweikiꞌi pe hi Burahima, hei woi-woina ingko moꞌompui woiꞌ to ipeꞌohaꞌi hieꞌe hibali to nopaꞌaniki Pueꞌ Ala pe hi Burahima.” 5Uko katoꞌo, hi Akoꞌ nopopewotumo umoꞌna nolou pe hi Laba i woiꞌ Pada-Aram, hi Laba iomo anaꞌna hi Betuel toAram, kokaꞌna hi Ribeka, inoꞌna hi Akoꞌ hante hi Esau.

Hi Esau mohantambi womo

6Nohori hi Esau hapo to notiꞌi umoꞌne i tempona mobarakati hi Akoꞌ. Hei nobahaꞌmo hi Esau, hi Akoꞌ norumbaꞌ umoꞌna nolou pe woiꞌ Pada-Aram, hingkeꞌna nopampaliꞌ hantambina inoꞌo hei mepaha umoꞌne hingkeꞌna hawaꞌi moroa toKanaꞌa nopohantambi. 7Nobahaꞌmo woꞌo hi Esau pengkoruꞌne hi Akoꞌ i hawaꞌna tomotodina hei kopolaina pe woiꞌ Pada-Aram. 8Koꞌukoana nobahaꞌmo hi Esau kohawaꞌne nolei umoꞌna towoweꞌe toKanaꞌa tiꞌo. 9Iomo horiana hi Esau noloumo pe hi Sumaeli anaꞌna hi Burahima, hingkeꞌna nopohantambiꞌi anaꞌne to nikokeneꞌi hi Mahala, hineeꞌna hi Nebaio.

Pepototuruna hi Akoꞌ i Beteli

10Katoꞌo hi Akoꞌ molai ka bolaꞌ Baraseba nolou pe bolaꞌ Hara. 11Mentoriꞌ ando, hupaꞌmo i haꞌanu peꞌohaꞌa hei hamini itoꞌo. Noroa haꞌanu watu to uwaꞌ itoꞌo nopoꞌoluna honiꞌi toturu. 12Hawaꞌi morue katoꞌo mepototurumo. I lali pepototuruna, noꞌoki haꞌanu tukaꞌ ka woiꞌ wute i laniꞌ. Noꞌokiꞌ malaꞌekane Pueꞌ Ala moneꞌ munaꞌu i tukaꞌ tiꞌo. 13Metotiꞌimo Pueꞌ i hirina hi Akoꞌ hei mantiꞌi, “Akumo hieꞌe Pueꞌ Ala to nopenombai hi Burahima uweꞌmu hei to nopenombai hi Isaki umoꞌmu. Woiꞌ koturuamu hieꞌe hingkiꞌ Kupaꞌanikiko wute i pemuleꞌamu. 14Pemuleꞌamu hingkiꞌ Kupoworiꞌ hibali koworiꞌna awu i duniaꞌ hei iohi hingkiꞌ memuleꞌhi i tinaꞌ motoꞌando hei tinaꞌ i kotompuha ando, hei i imbo-imbo koꞌuwaꞌara. Nokomi koꞌingkona hei pemuleꞌamu, lekiꞌ-lekiꞌna tino i duniaꞌ hingkiꞌ nibarakati. 15Aku hingkiꞌ moꞌowoniko hei mampoꞌodaꞌko pe imbo koꞌakoamu hei hingkiꞌ Kukomiko mahuliꞌ pe woiꞌ hieꞌe alaꞌ hawaꞌko hingkiꞌ Kupolihi wute Kupobuhoꞌi lekiꞌ-lekiꞌna to Kudandikimoko.” 16Meꞌaromo hi Akoꞌ, notiꞌi i lalina, “Tuꞌu-tuꞌu mpuꞌu Pueꞌ uwaꞌ i peꞌohaꞌa hieꞌe angkana hongkoꞌ hieꞌe kokubahaꞌne.” 17Nokomi komorokaꞌna hi Akoꞌ, notiꞌi, “Makaja mpuꞌu peꞌohaꞌa hieꞌe, mombaha hieꞌe tambina Pueꞌ Ala. Hieꞌe hibali wambaꞌ suruga.” 18Ikopoꞌonina hampihoꞌolu-olu hi Akoꞌ moroa watu to nopoꞌoluna honiꞌi nopopetotiꞌi hei nobobohi hante bokaꞌ saitu hingkeꞌna mewaliꞌi watu tandaꞌ pangkolowoina pampemombahana Pueꞌ Ala pe io. 19Pebolaꞌa tiꞌo nokokeneꞌi Beteli palaihana, “Tambina Pueꞌ Ala” hampiha kota tiꞌo nikokeneꞌi Lus. 20Itoꞌo mokamboaꞌmo hi Akoꞌ pe Pueꞌ Ala, notiꞌi, “Ane Ipoꞌawaꞌa hei Ipodaꞌa i patengkaꞌangku hieꞌe hei Ipaꞌaniꞌa pangkaku hante parewangku, 21hei ane Ikomiꞌa mahuliꞌ pe tambina umoꞌku, Ingko Pueꞌ to hingkiꞌ mewali Pueꞌ Alaku. 22Hei hingkiꞌ kudolaꞌkiKo hadolaꞌ ka hampuluꞌ ka lekiꞌ-lekiꞌna to Ipaꞌanikiꞌa. Hei watu popangkolowoi to kupopetotiꞌi hieꞌe hingkiꞌ mewaliꞌ peꞌohaꞌa menomba pe Ingko.”

Currently Selected:

Pewaliana 28: LAILJE

Highlight

Copy