Pewaliana 27

Hi Akoꞌ nobarakati hi Isaki

1I komotodiana hi Isaki matana woweroꞌmo, iomo horiana hamboaꞌmo pangkiꞌ, katoꞌo nowowoimo hi Esau anaꞌna tokokaꞌ hei notiꞌi pe io, “O anaꞌku.” Mehoniꞌ hi Esau, “Hieꞌeluꞌa umoꞌ.” 2Notiꞌi hi Isaki, “Iꞌokiꞌlu aku hieꞌe motodimoꞌa, tinuwuꞌku hamboaꞌmo morue. 3Iroamo laiꞌma akomoꞌa ipoꞌahuki hambaꞌa pinatuwuꞌ i popada. 4Iꞌundamo ipomotomiꞌ motuntuni peleihangku. Uko tiꞌo ikomikiꞌa humei hingkeꞌna kuꞌokaꞌi, hingkeꞌna kubarakatiko kolentuꞌangku tene handoaꞌa mahi.” 5Angkana hi Ribeka pahori lolitana hi Isaki pe hi Esau. Kopolainalu hi Esau nolou mampoꞌahuki umoꞌna pe popada, 6notiꞌi hi Ribeka pe hi Akoꞌ anaꞌna, “Kuhorimo lolitane umoꞌmu pe hi Esau kokaꞌmu notiꞌi, 7‘Ikomimo humei pe aku hambaꞌa pinatuwuꞌ to iꞌahu, irewahi, iꞌundamo ipomotomiꞌ hingkeꞌna kuꞌokaꞌi honiꞌi kubarakatiko i hinarona Pueꞌ, kolentuꞌaku handoaꞌa mahi.’ 8Hinewowoꞌena onaꞌ ipehoromua moromiꞌ hapo to kutiꞌi hingkeꞌna iwaliꞌi. 9Noloumoko pe koꞌuwaꞌana porewuanta, irodiꞌmo merombaꞌa anaꞌna bekeꞌ to loluheꞌ, hingkeꞌna kurewahiꞌi, kuꞌunda, kupomotomiꞌ hibali peleihana umoꞌmu. 10Honiꞌi ikomi pe umoꞌmu hingkeꞌna noꞌokaꞌi hei nobarakatiko, kolentuꞌana io handoaꞌi mahi.” 11Notiꞌi hi Akoꞌ pe hi Rubeka inoꞌna, “Hi Esau kokaꞌku, io haduo to mowulari wotana, angkana aku hieꞌe koliꞌku mangkolehi. 12Ane noperorariꞌi umoꞌku wotangka, hingkiꞌ nobahaꞌ koniꞌakalanine. Aku mampopehupaꞌ kobuntoꞌangku handoꞌio pebarakati.” 13Angkana notiꞌi inoꞌne pe io, “Akumo to mampohorunga kobuntoꞌ tiꞌo onaꞌ. Ipehoromua hapo to kutiꞌi, noloumoko morodiꞌ bekeꞌ tiꞌohiꞌo.” 14Katoꞌo io noloumo mpuꞌu, moroa bekeꞌ tiꞌo nokomiki inoꞌna, uko tiꞌo inoꞌna moꞌundamo nopomotomiꞌ, motuntuni hibali peleihana umoꞌna. 15Uko tiꞌo hi Ribeka moroa parewa to manobaꞌ, iomo parewana hi Esau, uluꞌ anaꞌna, parewa to nikolodohi, katoꞌo nirumbaꞌkimo nopake hi Akoꞌ, anaꞌ koꞌukoana. 16Koliꞌna bekeꞌ tiꞌo nipodokiꞌki i rombali korawena hi Akoꞌ hante i dokoꞌna to mangkolehi. 17Katoꞌo io mampaꞌani pangka to motomiꞌ hante depa to nowalimo, pe hi Akoꞌ anaꞌna. 18Honiꞌi hi Akoꞌ mekahi pe peꞌohaꞌana umoꞌna hei notiꞌi, “Umoꞌ.” Mehoniꞌ umoꞌne, notiꞌi “Hieꞌeluꞌa anaꞌ, hihimokoreꞌito?” 19Mehoniꞌ hi Akoꞌ pe umoꞌna, “Akumola hi Esau, uluꞌ anaꞌmu. Kuwalimo hibali hapo to itiꞌikiꞌa pe aku. Peꞌaromo hingkeꞌna ipangkamo bauꞌ poꞌundangku to kuꞌahu, hei ibarakatimoꞌa, umoꞌ.” 20Katoꞌo notiꞌi hi Isaki pe anaꞌna, “Hantouꞌko woꞌo pahua onaꞌ.” Mehoniꞌ anaꞌne, “Alaꞌ Pueꞌ Ala, Pueꞌmu to mosulungiꞌa” 21Katoꞌo notiꞌi hi Isaki pe hi Akoꞌ, “Humeimoko mekododungku anaꞌ, hingkeꞌna kuperorariko ba anaꞌkukoreꞌi hi Esau ba handoꞌio.” 22Mekododungkumo mpuꞌu hi Akoꞌno pe umoꞌna, hei umoꞌna tiꞌo mamperorarimo hei notiꞌi, “Ane loaꞌ, loaꞌna hi Akoꞌ ane korawe korawena hi Esau.” 23Hi Isaki hawaꞌi nohalaꞌ koꞌiona, alaꞌ korawena hibali korawena hi Esau, angkana handoaꞌi tene nobarakati hi Akoꞌ, 24katoꞌo meꞌitano tene, “Tuꞌureꞌi ingko hieꞌe anaꞌku hi Esau?” Mehoniꞌ hi Akoꞌ, “Ioꞌ umoꞌ!” 25Katoꞌo mololitamo hi Isaki, “Ipododungkumo pangka tiꞌo pe aku, hingkeꞌna kuꞌokamoꞌi bauꞌ to iꞌahu to iꞌundamo anaꞌ, hingkeꞌna aku mobarakatiko.” Katoꞌo nopododungkumo pangka tiꞌo pe umoꞌna hante angoroꞌ, katoꞌo mangkamo umoꞌne. 26Mololitamo hi Isaki pe io, notiꞌi, “Humeimoko dodungku hei iꞌumaꞌmoꞌa anaꞌku.” 27Katoꞌo mekododungkumo mpuꞌu hi Akoꞌ hei noꞌumaꞌmo mpuꞌu umoꞌne. Konorokinalu waune baduꞌna hi Esau, nobarakatimo mpuꞌu notiꞌi,

“Tuꞌu mpuꞌu wauna anaꞌku

hibali wauna popada to nobarakati Pueꞌ.

28Pueꞌ Ala hingkiꞌ mampaꞌaniko kini to ka laniꞌ

hei woiꞌ to molompoꞌ

hante kina hei angoroꞌ to melobi-lobi.

29Roboꞌ-roboꞌ ngkodeꞌ hingkiꞌ mengkoruꞌ pe ingko,

hei lekiꞌna kodatua melingkotuꞌ pe ingko.

Mewalimoko pengkoruꞌara halalimuhi,

hante anaꞌ-anaꞌna inoꞌmu hingkiꞌ melingkotuꞌ pe ingko.

Hihimo to motundaꞌko io hingkiꞌ nobuntoꞌi huliꞌ,

hihimolu to mobarakatiko, io nibarakati.”

30Koꞌukona hi Isaki mobarakati hi Akoꞌ, handoaꞌi morue hi Akoꞌ mampolihi umoꞌna, mehupaꞌmo woꞌo hi Esau kokaꞌne ka poꞌahuana. 31Io woꞌo mampatimomo pangka to motomiꞌ, hei nokomiki umoꞌna. Notiꞌi pe umoꞌna, “Umoꞌ, peꞌaromo mangka bauꞌ to kuꞌahu to kuꞌunda, hingkeꞌna ibarakatiꞌa.” 32Angkana notiꞌi hi Isaki pe io, “Himokoreꞌi?” Mehoniꞌ, “Akumola uluꞌ anaꞌmu, hi Esau.” 33Katoꞌo nopohoko mpololeke hi Isaki hei notiꞌi, “Hihimoreꞌito topoꞌahu pinatuwuꞌ to nokomi pe aku? Kuꞌokamo lekiꞌna kohandoaꞌamu mehupaꞌ, hei kubarakatimo. Hei io tontolu mewalimo toaꞌ to nibarakati.” 34Koꞌukona nohori hi Esau lolitane umoꞌna, nokomi kohanondoihana, meꞌola mangkureu-reu, hei notiꞌi, “Ibarakatiꞌa woꞌo umoꞌ.” 35Mehoniꞌ umoꞌne, “Hineꞌmu mehupaꞌmo meꞌakokalai hei mamperompoꞌi pebarakati to pe ingko.” 36Notiꞌi hi Esau, “Hintotoꞌ mpuꞌu konaꞌne hi Akoꞌ, alaꞌ io merompihamo moꞌakalaiꞌa. Tokokaꞌangku niperompoꞌimo, hinewowoꞌena noperompoꞌi womo pebarakati to pe aku.” Katoꞌo notiꞌi woꞌo, “Haꞌireꞌi uwaꞌ umoꞌ pebarakati to ntaniꞌna ipaꞌanikiꞌa?” 37Katoꞌo hi Isaki mohoniꞌ hi Esau notiꞌi, “Io kuhinimo mewali uweꞌmu, hei lekiꞌna tinona mewali hawiꞌna, hei kubakuimo hante kina hante anggoroꞌ. Hamboaꞌmo uwaꞌ to wadi kuwalikiko, anaꞌku.” 38Notiꞌi hi Esau pe umoꞌna, “Halangkaꞌ tiꞌolureꞌi pebarakati to uwaꞌ i ingko umoꞌ? Ibarakatimoꞌa woꞌo umoꞌ!” Hante loaꞌ to kodeꞌ meꞌolamo hi Esau. 39Katoꞌo umoꞌna mohoniꞌi,

“Kotuꞌuana peꞌohaꞌamu

hingkiꞌ moꞌela ka woiꞌ to molompoꞌ

hei moꞌela ka kini ka laniꞌ to i tanti.

40Ingko hingkiꞌ tuwuꞌko ka poponiꞌamu

hante hingkiꞌ mewaliko hawiꞌna hineeꞌmu.

Angkana ane ingko moꞌewa komakuasaꞌna,

hingkiꞌ himpolohoꞌko ka kuasaꞌna.”

Hi Akoꞌ mehilai pe Mesopotamia

41Hi Esau mohakiꞌ laline pe hi Akoꞌ alaꞌ pebarakati to noweiki umoꞌna pe io, katoꞌo notiꞌi i lalina, “Ando-ando hanondoihaꞌa alaꞌ komahina umoꞌku intu hawaꞌi hingkiꞌ morue. Koꞌukona intu merorima, hineeꞌku hi Akoꞌ hingkiꞌ kurokoꞌ.” 42Ikonohorinalu hi Ribeka pangkoliwone hi Esau io morumbaꞌ toaꞌ mowowoi hi Akoꞌ, katoꞌo notiꞌi pe io, “Hi Esau, kokaꞌmu, mohakiꞌ laline hei hingkiꞌ norokoꞌko. 43Hinewoꞌena anaꞌku, ipehoromuamo hapo to kutiꞌi. Mehilaimoko pe hi Laba pinoꞌumoꞌmu, to uwaꞌ i Hara, 44hei meꞌohaꞌko itoꞌo haꞌumbora ando komoruene, wute moholi kobukotane. 45Ane nokomolihakimoꞌi hapo to iwali pe io, honiꞌi aku hingkiꞌ morumbaꞌ toaꞌ ako modupaꞌko. Aku hawaꞌa hiniꞌ nokomoholii ingkei meroduo hampihalao i haꞌandolu.” 46Katoꞌo hi Ribeka mantiꞌi pe hi Isaki, “Aku nobosaꞌa mampeꞌele towoweꞌe-towoweꞌe toHet, hantambina hi Esau. Ane hi Akoꞌ woꞌo moroa haduo hantambina ka toHet i roboꞌ hieꞌe, agina mahimoluꞌa!”

Currently Selected:

Pewaliana 27: LAILJE

Highlight

Copy