Yohanes 7
7
Yefun Yesus bi nji ki sukdu su Yefun Yesus
1Orete Yefun Yesus mubot peyo-peyo mo bur Galilea. An yo mu mo bur Yudea nde, we An jam do, ye Yahudi mone meret os wa gu Yefun Yesus kwop wé.
2Sugane karowa ye Yahudi bi Kam Sye Nu Ti Kwenat, gato ye Yahudi napawa nu ti gato án bi amui nggo su kwenat ne. 3Karowa kam sye ne, sane Yefun Yesus bi nji ki nai An do, ”Nan mu kadit pe ré, ete Nan mu mo bur Yudea subere Nan bi pakon me Nan ben Nan bi suk-i gato ben nje yeket et. 4Nan iwa yé mwa bes Nan gum yepasye, saneyo Nan mu ben Nan bi suk-i ne bor wa yé mwa me et, Nan gurik wa nde. Nan ben Nan bi suk-i gato ben nje yeket bor more, sane Nan mu Nan waii ben wa yetu mwa ne sino me o et.” 5(An bi nji yo onyar kem mo Yefun Yesus dom nde anato An bi nji ki bi sukdu-i sane.)
6Sane Yefun Yesus ki nai An bi nji do, ”Yefun Allah ki nai Ji do, kam ne tep wa Ji ben suk yo bor nde tó yo, Ji yo ben suk nde tó. Wo nin sa, nin ben nin bi suk-i su kam daret sor, kam mwa ne sino ndo wa nin. 7Yetu mo bur ré bere án yo bariket nin nde. Sarewo Ji ki yetu mo bur ré mo sukibit gato yé ben ne bu anato án bariket Ji. 8Nin dakai mu simo kam sye ne sor. Ji yo mu mone nde tó, we kam yo tep wa Ji mu nde tó.” 9An ki An bi sukdu-i nai An bi nji ne or sa, An kem mo Galilea yei.
Yefun Yesus si nje konwa Kam Sye Nu Ti Kwenat
10Yefun Yesus bi nji mu simo kam sye mo Yerusalem, or Yefun Yesus dakai waii mu mone. Sarewo An yo kadum nggwa nai yé mwa jam nde, wo An gurik An dik kadit nje. 11Mo kam sye ne ye Yahudi bi yepasye meret Yefun Yesus mone. Yepasye ne ndobot yu do, ”Ye gane mo u ne?”
12Yé mwa gato sum wa simo kam sye ne, án tom apre nai yu subot Yefun Yesus. Deyo ki do, ”An Ye gato ben sukndo.” Deyo o ki do, ”Nde re! An gwat os ibit ben kidar yé mwa.” 13Sarewo yé yo ki sukdu subot An mo yé mwa gwem nde, we yé nyuwa ye Yahudi bi yepasye ware.
14Ye Yahudi konwa kam sye ne mu kom mo kam gri, or kam do at sa, Yefun Yesus mu mo Yefun Allah bi nu de mo ros de mit ne, An sok mo mit, ete An duno nje mone. 15Ye Yahudi bi yepasye yeket An bi sukduno-i. Yepasye ne ki do, ”Bei, Ye ré yo farkor mo nde, sane ben sa u anato An jam suk mwa ré ne?”
16Yefun Yesus ki nai yepasye ne do, ”Ji ki Ji bi sukduno-i are nde, wo Ye gato syogat Ji ma mo bur ré bi sukduno-i anato Ji ki ré. 17Ye gato iwa ben suk tepsu Yefun Allah mit ne yo, bere ye ne jam rer do, sukduno ne ma kadit Ji dakai, ondeyo sukduno ne ma kadit Yefun Allah, bere ye ne jam. 18Ye gato ki an dakai bi sukduno-i yo, an werwa an dakai bes an nggwa kok mone. Sarewo an werwa an bes Ye gato syogat an ma ne yo, an sa, ye gato ki bi sukdu-i ri roi anane, an yo kidar nje yo mo nde. 19Musa krom Yefun Allah bi sukduno wa nin benbot mó re. Sarewo nin yé bok ne sino yo benbot Musa bi sukduno-i nde, nin ge dik yo dom nde. Nin ben suk wai mo Musa bi sukduno-i ne. Sane dom, nin meret os wa nin gu ji kwop wé.”
20Yé mwa ne ki do, ”Bei! Je u gei anato meret os wa gu Nan kwop ne? Semda ben Nan ko re go!”
21Yefun Yesus ki nai án do, ”Ji ben yetu ge dik gato i ne ge su kam Sabat sor, ete nin yeket. 22Sarewo Musa duno nin wa nin bisunat pa yebris, sane su ré nin bisunat nin bi pa su kam sye kam Sabat ne dom. (Musa yo duno nin subot sunat kadit ketke nde, wo nin bi amui anato duno nin subot sunat su ketke.) 23Sane nin bisunat nin bi pa su kam sye subere nin ben suk yo siri kadit Musa bi sukduno-i nde yo, suma ben anato nin maskwa Ji mo gato Ji ben ye gato i ne ge satu su kam sye ne? 24Nin ki nje gum ibit mo suk gato nin dakai me su nin gro daret nde, wo nin nutbot sisu ndo, nin watbot kom mo mit, orete nin nai sukjimnut gato sangge et.”
Yefun Yesus anato Yekwesu gato Yefun Allah syogat ma mo bur ré wa nai men yetu kadit sukye ete jowa men ne, sangge bado nde e?
25Sugane ye Yerusalem deyo ndo mo yu do, ”Ye gare anato Ye gato men bi yepasye syeret wa gu wé bado? 26Sarewo An dakai ki suk mo yé mwa gwem, yepasye yo ma duwer An mo nde, yepasye yo ki suk yo mo nde. Su ré men bi yepasye nut do, sangge, Ye ré anato Yekwesu gato Yefun Allah syogat ma mo bur ré wa nai men yetu kadit sukye ete jowa men bado? 27Sarewo Yekwesu gato Kristus ne ma it yo, bere men yo jam nat gato An ontu mó nde. Wo Ye ré sa, men jam nat gato An ontu mó re.”
28Orete Yefun Yesus duno nje mo Yefun Allah bi nu de mo ros de mit saresa, An ki bi sukdu-i ne sye yé, An saiye do, ”Sane, nin nut do nin jam Ji e? Nin nut do nin jam nat gato Ji ontu kwop mone bado? Ji dakai ma tepsu Ji dakai bi sukjimnut-i nde, wo Ye gato syogat Ji ma more, An sa, An ben An bi suk-i ri roi. Nin jam nde An re, 29wo Ji sa, Ji jam An, we Ji ma kadit An. An anato syogat Ji ma more.”
30Sugane ye Yahudi bi yepasye iwa but Yefun Yesus ware, ye yo syimtok An mo nde, we An Gen syu tó. Kam gato Yefun Allah fro wa ye but An yo bor nde tó. 31Kapre yepasye iwa but An, yé mwa mone napyo sye nai sukjimnut dik do, yé onyar kem mo Yefun Yesus. Sane yé ne ki do, ”Kristus do ma it yo, An kadum Yefun Allah bi suktinggi su suk gato ben yé yeket mwa wai kadit Ye ré bado? Mo nde, Kristus ana gare it!”
Ye werwa but Yefun Yesus
32Ye Farisi bok yo mone jam yé mwa ki suk apre nai yu subot Yefun Yesus. Sane ye Farisi si yekwesú mo Yefun Allah bi nu syogat ye gato mewa Yefun Allah bi nu ne mu wa but Yefun Yesus. 33Yefun Yesus ki nai yé mwa gato mo Yefun Allah bi nu ne do, ”Ji si nin kem more nam gan yo o sor re, orete Ji satu mu mo Ye gato syogat Ji ma mo bur ré re. 34Bere nin syeret Ji ware, nin yo ku Ji nde. Nin yo ku os wa ma mo pe gato Ji mu mone nde.”
35Ye Yahudi bi yepasye ndo mo yu do, ”Ye gare ki do An mu mo u anato men yo ku os wa men mu ku An nde ne? Bere An mu ku men bi nje-i mo ye Yunani bi nat-i ko kadit men, ete duno ye Yunani mone bado? 36Ye ré ki do, bere men syeret An, sarewo men yo ku An nde re. Men mu mo pe gato An kem mó dom nde re. An bi sukjimnut-i sa u ne?”
Syur gato ben yetu mbau
37Ye konwa kam sye kam bok ne kom mo kam gato ye bes gum kok gato kam wari ne sa, Yefun Yesus ti mo yé mwa gwem mo Yefun Allah bi nu, ete An saiye do, ”Nin sosa mó yo, nin ma mo Ji, ete Ji syo syur nai nin da. 38Ye gato onyar kem mo Ji ne anato tepsu sukdu gato yé krom mo Yefun bi sukdu sare do, ’Kadit an mit syur it tepsu syur nggrup ete syesyar mu nden. Syur ne ben yetu mbau.’ ” ( 39Yefun Yesus bi sukjimnut do, syur ne anato Yefun Allah Gen. Bere Yefun Allah Gen bok nggwa mo ye gato onyar kem mo Yefun Yesus. Tomgane Yefun Allah Gen yo ma nde tó, we Yefun Yesus kwop, ete An it satu mu mo An bi Ai nde tó.)
40Yé mwa gato jam suk gato Yefun Yesus ki ne, deyo ki do, ”Ye gare sangge, An anato yenabi gato ma wa ós men ye Yahudi.”
41Ye deyo o ki do, ”Ye gare anato Kristus gato Yefun Allah syogat ma wa nai men yetu kadit sukye ete jowa men.”
Sarewo ye deyo o ki do, ”Nde ré, Kristus anare nde. Yekwesu gato Yefun Allah syogat ma wa jowa men yo ma kadit bur Galilea nde. 42Mo Yefun Allah bi sukdu yé krom do, Kristus bi amui mo yeraja Daud. Sane bere Kristus si Daud ne sino ontu mo Betlehem, gato Daud bi nat-i ne.” 43Sane yé mwa duwer yu subot Yefun Yesus. 44Ye deyo werwa but An, sarewo ye yo syimtok An kaim mo nde.
Ye Yahudi bi yepasye yo onyar kem mo Yefun Yesus nde
45Sane ye gato mewa Yefun Allah bi nu satu ma sa, yekwesú mo Yefun Allah bi nu si ye Farisi ndo mo án do, ”Nin yo gwat An ma nde wa suma ne?”
46Ye gato mewa Yefun Allah bi nu ne ki do, ”Ye ne ki bi suk-i ndo yé. An bi sukdu ne tik men mit ware, men yo but An nde.”
47Ye Farisi ki nai án do, ”Ye ne ben kidar nin dom bado? 48Te men bi yepasye si men ye Farisi deyo onyar kem mo Ye ne mó it bado? Yo mo nde. 49Sarewo yé mwa gato onyar kem mo Ye ne, án jam nde Musa bi sukduno-i re. Yefun Allah dufo mo yé mwa ne or re, bere Yefun Allah gu án kwop wé sor.”
50Ye Farisi dik yo mone, an gum do Nikodemus, tom gabere an mu ku Yefun Yesus mó re. An ndo mo ye Farisi mone do, 51”Men bi sukduno-i duno men do, men yo gu ye yo kwop mo nde tó yei, men ndobot an, men kibot suk gato an ben ne, men jam sisu ri-roi et. Men jam kom mo mit nde tó, men yo gu an kwop nde tó yei.”
52Ye Farisi ki nai Nikodemus do, ”Sane nan dom si ye Galilea sino onyar kem mo Ye ne bado? Nan watbot Yefun Allah bi sukdu sisu ndo et! Bere nan jam mone do, yenabi yo ma kadit bur Galilea nde.”
Ye ku rek nggon ge dik yo ben siri
[53Orete yé mwa ne satu mo bi nu.
Currently Selected:
Yohanes 7: KGR
Highlight
Share
Copy
Want to have your highlights saved across all your devices? Sign up or sign in
@LAI 2004, 2014
