ZAKHARIA 13
13
1 Tuhan Omame Mondok Hokho mene a'nogo nen ikhi logolik, ”Linggene andi sambul he i elesi misik ekhe wulibi waga logolik, Daud ambisangma mene inom, afuni Yerusalem mene inom tugwi kembu fogerati logolik weak hilingiti lagaukwa mene omanogo horogo leget fisagain. 2Inenggi andi sambul he o kweang yiba tugwi kembu enu werek mene andoma re An nen horogo leget fisamo, ap misigen iluk ogo eberek logogin mondok lek. It afuni nen an nebe nabi iluk agarek mene andoma inom, nen ap munggwarengge inoba louksek logolik hilingitarek mene andoma inom, An nen mugusogo wulak fisagain. 3Nen, ap ekhe ambi wene waluk yagaisikhi lagi iluk agarek mene andi re, ap andi eisena agaisa inomen he, hat he heranhogo wene lalinafi lagen enggere hebe hoasuak iluk yagati logogun. Nen, aren ambi an nebe nabi o, iluk ugu halok he, at a'nogo onggwarek eisena agaisa nen ebe pinggi talogo potfisikhi logogun.
4Linggene andi sambul he, ap nabi re nabi ebe mene nen hilingiterek mene omanogo hilingisu inenggali agu nen hilingiti logogun. Iren inabikanggoba wokhikhi lago iluk foget fakhikhi logolik ineranhogo wene lalinabuogeluk su ap nabi nen labetarek mene omanogo labeti logogun lek. 5Iren lagokhogo ikhi logolik he, ’An he nabi re lego, an he neluk welagi huli omare we sumburu yabu nek helikhi lagi mene o,’ ikhi logogun. 6Nen, aben heinok wogisikhi logolik halok, ’Hat hami'mo inom, henggiba inom houmo alimbo oma re ninggi'nogo mene nogo?’ iluk heinok wokhugunem aren onggo ikhi logolik, ’An noumo alimbo ari re an nagailak ekhe aiba nen ninom yei yafunemen noate mene o’ ikhi logogin.
Gembala Allah nen lakfei wagaikhe mene wasuageluk awene palhukwa wene
7 Tuhan Omame Mondok Hokho mene a'nogo nen ikhi logolik, ”Hat karok yi menlasimbik he, gembala An nobaget yabu hilingiri'lago mene ari wasin o! Wat foumo re domba omanogo mondogat tel-fol uak. Oba nen he An pi wesimbik wam domba eagwi andoma koninafu logolik, ferinarek logogin.#Mat. 26:31; Mrk. 14:27 8nen o andoma mondogat afuni logogun mene re inebe minggilogo dua pertiga hakhogo re wa'lasugun. 9We minggilogo fena sepertiga nen enek he linerisogoin. Andi nen he, it andem enek he afuni nen perak endu oba ebe mene weinam asuageluk weratarek andi hakhogo enogo horinabigin o. Nen, it he emas ebe meneba nen weak mene iluk walhagarek a'nogo hakhogo it andi re An nen inobabut paligin. A'nogo hilingiti logolik iren samban An noba ugunem An nen onggo yagaisikhi logogin. Nen An nen it inoba re hit An nagainafuri o iluk yagaisagain, nen iren ogore An faget Nineisena Tuhan Allah re At aro, iluk fakhogo ugun o,” iluk isikhe.
Currently Selected:
ZAKHARIA 13: inohap
Highlight
Share
Copy
Want to have your highlights saved across all your devices? Sign up or sign in
