ZAKHARIA 12
12
Yerusalem hobuk agap teligin wene
1Afuni Israel mene faget yagaisoageluk ikhe mene re yi. Tuhan nen pogot tiaganet figik, kweang elalogo figik, afuni inoba ineluk mene wogisigik, isikhe mene a'nogo nen ikhi logolik, 2”An nen Yerusalem he, iwak anggur agai hinago mene hak hilingisogo fagain o, A'nogo hilingisogo foumo re o kweang it horok-horokwe werek mene andoma nen nogoin mene re, ap lugu-lugwi palhi logolik talo-talongge hilingitarek hakhogo hilingiti logogun, Nen, Yerusalem hukhogo kwelafu halok he o Yehuda anggweangma kota werek mene andoma, inomat hukhogo kwelaginabugun o. 3Oba nen linggene andi asi wesigin oba re An nen Yerusalem andi re helep enggin mene hakhogo hilingisogo fagain o, nen it inunggulenu ekhe mene nen lekhogoin iluk hilingisugun mene re inebe alomat laga logogun. Ap kweangma werek mene inunggulenu lombok omanogo re misik sebe imbik he Yerusalem inom weim yabi wesugun. 4Inenggi andi sambul he An nen kuda andoma mondogat inafekwe nonghong isigik, nen ap amboloba lagaluk lagu mene re An nen lugu-lugirinafik, nen it afuni Yehuda mene re An nen kagalinarek welagik, hilinginabigin oba nen he it inaselei mene inanggo kuda re An nen eil puk mene hilingisogo fagain. 5A'nogo hilingitunem it Yehuda inap ineisok erokwe mene omanogo inendawimo nen anggikhi logolik, ’Tuhan Omame Mondok Hokho mene a'nogo nen At againafuri o Yerusalem werek mene inoba inomamet fisikhemo o,’ iluk ikhi logogun.
6Inenggi andi sambul he Yehuda inap ineisok erokwe omanogo re An nen e wurogo nolek meneba endu fagaisogo kwelakfugunem amulok kulung hikherek hak inom, athe gandum enggen palugun horokse'ma anggele'ma endu fagaisogo kwelakfugunem hilingiterek hak inom, hilingisogo fisagain. Nen, iren he inunggulenu inera'lukwe werek mene omanogo leget fisogoin. Oba nen afuni Yehuda mene re o kota andomaat logolik inailo legengge logogun.
7It hun Daud eisok erokwe mene inom, afuni Yerusalem mene inom, inenu werek logouwageluk wogisasigimo helasukwa mene andoma re, it Yehuda inap fenakwe inaiba inenu werek logouwageluk wogisasigi mene inom taganhogo hilingik logoinogo iluk An Tuhan nen tak tentara Yehuda mene inoba inomamet fisagain. 8Inenggi andi sambul he, An nen afuni Yerusalem mene nawe a'ma fisaluk ferinarek logogin. Nen, inanggele'ma nen he, mondok inomame lek mene ogore, Daud omame welagaikhe hak hilingisogo fisagain. It inebe re malaikat An mene nen halinafunem hakhogo re, it he An nonggwaregen halinafunem, it Daud ambisangma mene nen halinafi logogun. 9Inenggi andi sambul he ap inunggulenu lombogen Yerusalem inom weim yabi logoin iluk hilingiti logogun mene andoma re An nen inomame legetfisagain.
10Andi nen it Daud ambisangma mene inom, afuni Yerusalem mene inom inoba An nen it inendawinggen hundik welagaikharek mene inom, samban ugu welagaikharek mene inom hilingisogo fisagain. Iren he, at talogo warek logogin mene a'nogo ineilenggen yerogo logolik, afuni inomalik manggusa tago wa'lagunem le agu welagaikharek hak hilingiti logogun, nen, ap inomalik misigenek engge legagunem inendawimo mondok heiselogo le agu welagaikharek hak hilingisugun.#Yoh. 19:37; Why. 1:7#Mat. 24:20; Why. 1:7 11Inenggi andi sambul he o Yerusalem oba andoma lenggu-lengga mondok hokhorogo ugun, andi re o lembah Megido Hadad-Rimon faget le aga lagaikha hakhogo le asugun. 12-14Andi nen, it ineisok erokwe mene omanogo inebe lombok le yagaisogo logogun. Nen it Daud ambisangma mene omanogo ineisok erokwe mene ogore, Natan ambisangma mene ineisok erokwe mene omanogo ogo, Lewi ambisangma mene ineisok erokwe ogo, Simei ambisangma mene ineisok erokwe mene ogo, nen ap amu mene ineisok erokwe mene ogo le yagaisogo mondok logogun. Nen, ap ineisok erokwe lombogen ogore inebe lombok le mondok aga logogun, nen it ineisok erokwe lombok omanogo nen ap ogo hemi ogo inamu-inamu le aga logogun o,” iluk ikhe.
Currently Selected:
ZAKHARIA 12: inohap
Highlight
Share
Copy
Want to have your highlights saved across all your devices? Sign up or sign in
