ZAKHARIA 14
14
Yerusalem inom inunggulenu lombok omanogo inom faget isikhe wene
1 Tuhan awi tegelinabigin oba a'nogo arat horogasi waga. Andi nen he Yerusalem he afuni nen telambik hit hinonggwarek hineilenggen werek kwelek afuni nen sumbut-sumbut aga logogun. 2Tuhan nen yi afuni ti afuni inunggulenu lombok andoget fisambik o Yerusalem inom weim yabi kuageluk yagaisagain. Ma re kota andi telambik o wurik andoma mondogat sebelogo fakhigik, nen hemi o andi mene pailak hilinginafik, nen it afuni o andi mene inebe fena minggilogo re hele warinarek laluk inamingmingengge hilingisogo fisigik, nen fena minggilik logogun mene re o kota logouwageluk fisigik ugun. 3A'nogo hilingisumo nen Tuhan wesimbik o attak it ap inunggulenu inap andi inom hilingiti lagaikhe higithogo it inom weim yabi wesigin. 4Inenggi andi sambul At ebe punu Zaitun oba o Yerusalem en mo ero fikhit andoma mendek logogin. Ma re, punu Zaitun andi tonggo elonggo mondogat wogolek mene re tulem kagalasumo mo ero fikhiren pikhit mo erembul fikhit andomaba hilingik logogin. Punu andiba nen minggilogo re abel utara fikhit higil-higil lagik, nen, minggilogo fena re abel selatan fikhit lagik ikhi logogin. 5Hit he, punu andi pire pelanget lasumo re fanggong kwe andi nen heise logoin. Hit he attak hun Uzia afuni Yehuda mene faget raja mendek were'ma it inombalak o lugul inailo nen heise lagaukwa a'nogo hak, hilingisugun. A'nogo hilingisumo re, an Neisena Tuhan Allah ebe re malaikat inebe mondogat inom seberogo wesugun.
6Inenggi andi asi wesigin sambul he, o sogoi inom, meiso sogenggen es mene inom ekhe logogin lek. 7Inenggi andi sambul he, o mum agi'lek, hubanggo mene ogore mondok selegat hilingik logogin. Oba nen he, linggene andi ki sambul asi wesigin iluk andi re we At Tuhan amunek elu logogin.
8Inenggi andi sambul i eil habup mene o Yerusalem en wulibi wesigin. Wilibi wesumo re, i andi minggilogo re Laut Mati ba kwelabi lagik, nen fena re, Laut Tengah ba kwelabi lagik, ikhi logogin. I andi re tahun hundik-hundik andoma o hibiba ogo nen meisoba ogo lagu mondok logogin.#Yeh. 47:1; Yoh. 7:38; Why. 22:1 9Andiba re, Tuhan ebe yi afuni ti afuni o kweangma welagaikharek mene inebe mondok faget inoe raja logolik melalinafi logogin. Nen, afuni inebe lombogen At Allah amu oba inendawinggen himbirek fuluk logogun, nen, we At amu Enu nek inelu logogun.
10O kweang mondogat he, o Geba nen abel selatan fikhit o Rimon huli andomaba re, kweang utara fikhit meneba andoma re logogin. Oba nen Yerusalem enek he, mondok legoma logogin. Andi re, kweang era'lukwe werek mene mondok sebelek werek kwelek kota andi re lego logogin, Kota ebere Pintu Gerbang Benyamin meneba andoma nen wurilogo re Pintu Gerbang Sudut agarek oba andoma huli logoin, nen kwe sou pa'leget attak meneba nen menara Hananel wurogo liabe'ma andi huli nen he, hun raja anggur agai perelherek oba andoma huli hilingik logogin. 11A'nogo hilingi'mo afuni inailo legengge logolik inebe inanggomo kagalogo inoatarek mene andoma legengge logogun.#Why. 22:3
12It ap inunggulenu lombok it Yerusalem mene inom weim yabi wesugun mene andoma mondogat inoba re, Tuhan nen ou mondok inailo mene lakfei wesigin. Andi nen he, inebe ineluk werek kwelek ineilenggen inom, inamelinggen inom, inebe abirengge inom mondok fili aga logogun.
13Inenggi andi sambul, ap inunggulenu lombok andoma inoba Tuhan nen inendawinggen nonghong isigik, nen inailo mene hilingfisigik, umo re ap inebe lombogen inagaila'lak fena fikhit logogun mene omanogo fak fisaluk inebe inoati logogun. 14Ap mene nek o Yehudaba nen he, o Yerusalem ili wanhi logolik weim yafi logogun. Hugulengge wanhu mene iluk he iren ap inunggulenu inera'lukwe logogun mene omanogo inangge mondogat emas inom perak inom, inasu kabogeritikhi logogin mene omanogo inom helikhi logogun.
15Ou mondok elokhenggen weak mene ogore it inanggo kuda, bagal, unta, keledai inom nen yi mene ti mene ap selei mene inawi sabu salekwe andoma bene mondogat saga i wesigin.
16Andi nen yi afuni ti afuni inunggulenu lombok Yerusalem inom weim yafukwa mene fena ineluk logogun mene omanogo re, o kota andiba we'luk Tuhan Omame Mondok Hokho logolik Raja welagarek mene a'nogo apne wanhik, nen, O Sabu engga salogo welagaukwa mene a'nogo oba ebeti logolik seni isatik, ikhi logogun.#Im. 23:39-43 17It inunggulenu ekhe nen o Yerusalem laluk ineisena Tuhan Omame Mondok Hokho mene, Raja Lego Mondok welagarek mene a'nogo fogerasi lagu mene inabit agu halok, it inanggweang oba andoma meiso pelabi wagi'lek logogin. 18Nen it Mesir inap andi ambi O Sabu engga salogo welagaukwa mene a'nogo faget ebeti' lek logolik seni isati lek hilingitu halok he, Tuhan nen, ou it ap inunggulenu Tuhan obaget hilingisi wesu inabit mene andoma inoba hilingfisagain mene a'nogo higithogoat hilinginabigin. 19A'nogo it Mesir inap inom nen it ekhe inunggulenu lombok seni O Sabu andi faget ebetu aple inabit mene andoma inoba unggum a'nogo wogisagain.
20Inenggi andi sambul he kuda asubene abolok lelok-lelogenggetu mene porek omanogo ebene re hesesengge wokfuluk, ”Tuhan obaget amu enogo werek,” iluk palogo foumo logogin. O Tuhan Aiba panci omanogo re, mangkok Tuhan obaget warogo nolhi logolik mezbah elokhoma enogo werek mene hangge iluk anggikhi logogun. 21O Yerusalem oba inom, Yehuda ba inom, panci andoma mondogat he Tuhan Omame Mondok Hokho mene a'nogo obaget amu enogo hilingitu mene fogoin. Afuni wam warogo fei wagu mene nen he, panci andoma wam fugu mene omanogo isatu mene wanhi logogun. Inenggi andiba asi wesigin sambul he, ap onggo palhu mene re Tuhan Omame Mondok Hokho mene a'nogo Aiba andoma ekhe logogun lek.
Currently Selected:
ZAKHARIA 14: inohap
Highlight
Share
Copy
Want to have your highlights saved across all your devices? Sign up or sign in
