KEJADIAN 41

Yusuf en he, ”Habi hegen andi ebe yi'nogo mene faget hegen,” iluk at raja Firaun yagatikhe wene

1 Tahun pire arat welagaukwasigen, at raja Firaun ebe i Nil era'lu mendek were'ma abi hasikhe. 2Ebe a'nogo mendek were'ma aremnogoat, wam sapi ebe 7 nen sei hokho mene re, esi i sobalek hangge mene i Nil ima nen wulibi wagaikhasik, engga i esanggokwe mene tegethigik nunggunem abi hasikhe. 3A'nogo nunggunem ombo'ne re, wam sapi hunogoat mene ebe 7 nenat i Nil ima nen wulibi wagaikhaat. Wam andi ebe mondok weak abeloak enek seloksek mene weinam agaikhasik, wam sapi sei hokho mene i esanggoma welaga mene omanogo era'lu mendek welagaikha. 4A'nogo mendek were'ma, wam sapi abeloak enek seloksek mene omanogo nen he, wam sapi asei hokho mene omanogo felelenghogo nunggunem abi hasikhesik at raja Firaun a'nogo eluk agaikhe. 5A'nogo hasikhesik, hobuk nogo isikhesik abi ekhe yi'nogo hasikheat: Gandum ero misigat meneba enggen ebe 7 nen mondok fano wurik mene igisogo wulabi wagunem hasikhe. 6Nen, ekhe re, gandum ero misigat hunogo meneba enggen ebe 7 nenat sogoi aganhan weak mene nen enggen saweret fesikhemo amusu lek puget fesikhe mene, igisogo wulabi wagunem hasikheat. 7A'nogo wulabi wagunem, at gandum enggen lek sawet mene omanogo nen gandum enggen fano werek mene ebe 7 nen omanogo haumet higik nunggunem hasikhe. A'nogo hasikhesik, at raja Firaun a'nogo eluk agaikhesik afe hebelagaikhesik he, ”I, an nabi higimo higi,” iluk anggasikhe. 8A'nogo hasikhesik, o wei isikhemo ohealekwe at raja a'nogo endawimo mondok weak agaikhe. Endawimo a'nogo weak agaikhe andi nen, ap o Mesir mene ekhe wesagun elalin hilingiti lagaukwa mene inom, yi mene ti mene awene inelu mene inom, wolisa loageluk inayonggo fesikhemo, wolisa lagaukwama wagaukwama re, abi hasikhe mene a'nogo it pilingisogo yagaisasikhe meneat he, ap it mene ekhe nen, ”Habi ebe yi'nogo hilinglasigin mene faget hegenma o,” iluk ekhe yagasu mondok elo'lek agaikhe.#Dan. 2:2

9A'nogo yagasu elo'lek agaikhemo, ap ekhe raja agai nunggu mene faget wene lenggalhi lagaikhe mene a'nogo nen at raja Firaun mel yagatikhe: ”Noe, an hamingmingengge attak yagaheti'lek weak hilingiti mene ekhe yogondak fakhogo yagahesik. 10Endamat he, noe haren ap sumburu roti faget wene lenggalhi lagaikhe mene a'nogo inom, an hamingmingengge yi inom, wena'nisasigindik, ninenggi hele warogo o afuni inenggi hele warek kwelakfisagarek oba kwelakninobagasiginmo, o ap hat haiba istana serogo welagaikharek mene inoe kain aiba welagagu andi. 11A'nogo logolik, o ninenggi hubanggo ekhe sambul, nit nemberegat ninabi ebe hunogo tomok hilinglasigin mene faget hasugu andi. 12A'nogo hasugusik, ap alage Ibrani mene ekhe it afuni hat hawi serogo welagaikharek mene inoe kain a'nogo amingmingengge welagaikhe mene ninom o andoma welagagu. A'nogo logolik nit ninabi hasugu mene andi pilingisogo yagatugumo, aren he, ”Ebe yi'nogo hilinglasigin mene faget hegepma o,” iluk senggerogo yaganisasikhe. 13Aren a'nogo yaganisasikhe higithogoat ebe mondok hilinglagaikhe. Andi ebe re, hat noe kain nen he, an hamingmingengge wene noba mene korogo wokhegendik he, neabu attak hilingiti lagagi mene nambotkwe wo'neti logolik, ap hamburu roti nunggu mene faget wene lenggalhi lagaikhe mene a'nogo nek he, wene oba fegendik ebe mondok watigin andi,” iluk yagatikhe.

14A'nogo yagatikhemo, at raja nen it ekhe nen Yusuf wani loageluk lakfisasikhemo, lagaukwasik, o inenggi hele warek fisagarek oba nen weak-weagat wulakfei wagaukwa. Wulakfei wagaukwama, at Yusuf ambemosi palhik, asu laberigik, isikhesik he, raja Firaun oba wagaikhe. 15Wagaikhemo, at kain enupogoren Yusuf mel yagatikhe: ”An nabi arat higi mene re, afuni ekhe nen, ebe yi'nogo hilinglasigin mene faget hegenma, iluk yaganesu mondok elo'lek agama o. A'nogo hilinglagama, afuni ekhe nen he, arenek he, ebe yi'nogo hilinglasigin mene faget hegenma, iluk pilingisogo yagahesu mene werego, iluk yaganetama nen hat wolhafi o,” iluk yagatikhe. 16A'nogo yagatikhemo, at Yusuf en he, ”An hamingmingengge nen ebe yi'nogo hilinglasigin mene faget hegenma, iluk yagahesigin elo'lego. We, at Allah amu nen mondok senggerogo yagahesigin werego,” iluk yagatikhe. 17A'nogo yagatikhemo, at raja nen he, ”An nabi higi re yi'nogo, an nebe i Nil era'lu mendek logolik neilenggen yethigi hak he, 18ima nen sapi ebe 7 mene sei hokho esiba fano mene wulibi wagaikhasik he, engga i esanggokwe mene tegethigik nuggunem higi o. 19A'nogo wulibi wagaikhasik nuggunem, ombo'ne re, sapi hunogoat mene ebe 7 nenat oak solok-moloksek agap yelik mene weinam agaat. Wam sapi mondok weak ariginik mene o Mesir yi awi ti awi yoma mondogat ekhe neilenggen higire'lek mene higi o. 20Nen, wam sapi oak solok-moloksek andoma nen wam sapi ebe 7 nen asei hokho mene attak wulibi waga mene omanogo nunggunem higi o. 21A'nogo ningge meneat he, wam inebe fano agi'lek, oak solok-moloksegat were'ma higi. A'nogo higi hak he, neluk agi o. 22Hobuk nogo igirik he, nabi ekhe yi'nogo higiat: Gandum ero misik meneba enggen ebe 7 nen mondok fano wurik mene igisogo wulabi wagunem higiaro. 23Nen, gandum ero misik ekhe hunogo meneba enggen ebe 7 nenat sogoi aganhan weak mene nen enggen lek saweret fikhesik, amusu lek pugetfikhe mene igisogo wulabi wagunem higiaro. 24A'nogo wulabi wagunem, at gandum enggen lek sawet mene omanogo nen he, gandum enggen fano werek mene omanogo haumethigik nunggunem higi. An nabi pire a'nogo higirik he, ap wesagun elalin hilingitarek mene pilingisogo yagaisigi meneat he, ap it mene ekhe nen, habi ebe yi'nogo hilinglasigin mene faget hegenma o, iluk ekhe mondok yaganeta lego,” iluk yagatikhe.

25A'nogo yagatikhemo, at Yusuf en at raja Firaun a'nogo mel yagatikhe: ”Noe, hat habi pire hegen andi ebe misigat hilinglasigin mene faget hegen o. Habi andi ebe at Allah nen hobuk hilingisigin mene faget, Arenat yagahetemo o. 26Habi sapi ebe 7 nen asei hokho mene hegen andi ebe re, 7 tahun logogun mene faget hegen. Nen, gandum enggen fano mene were'ma hegen andi ebe re, 7 tahun logogun mene fagerat hegen. Habi pire hegen andi ebe re, misigat hilinglasigin mene fagerat hegenma o. 27Nen, ombo'ne sapi ebe 7 nen oak solok-moloksek mene weinam aga andi inom, gandum enggen sogoi aganhan weak mene nen enggen lek saweret fikhesik, amusu lek pugetfikhe mene andi inom, ebe re sumburu ouwak mondok 7 tahun logogun mene faget hegenma o. 28An nen, habi ebe a'nogo hilinglasigin mene faget hegenma, iluk noe yagaheti andi, at Allah nen hobuk hilingisigin mene heilenggen yethoageluk yagahetemo heilenggen yethegen meneat yagaheti o. 29Hobuk o Mesir yi awi ti awi yoma mondogat 7 tahun yi mene ti mene oba heilarogo mondok hilinglagunem fano mondok logogun o. 30-31A'nogo logombik, ombo'ne re, 7 tahun sumburu yi mene ti mene ouwak wesigin. Sumburu ouwak andi mondok weak mene wagunem o yoma yi mene ti mene mondok lek asumo weakhogo logogun andi nen, attak-attak yi mene ti mene mondok oba heilarogo fano logogun mene andi mondogat hinonggot asigin o. 32”Noe hat habi henggi pireba hegen andi re, at Allah nen ebe weak-weagat hilingisigeluk anggikhesik weregen hegen o. 33Andi nen he, noe. Afuni yoma faget yi mene ti mene o yoma tegelogo fouwageluk, haren ap obabut hebelek mene yi mene ti mene awene elu mondok mene halok, wenagaisogo ayonggo fembik he, menfembik enggiba foumo fano o. 34-35A'nogo menfembik, ekhe re, haren hagoromi ekhe nen 7 tahun oba sumburu oba heilarogo ninggi logolik gandum enggen palugun mene inenggi wenagaisogo 5 ba asi laga halok, 4 en noageluk wogisikhi logolik, misigenek ekhe minggilogo fogoin mene andogorogo o kota lombok filik serogo logouwageluk inayonggo fembik menfisano aro. 36Gandum enggen andogorogo fogoin andi re, hobuk 7 tahun logolik, o Mesir yoma sumburu ouwak mondok weak wesigin andiba logolik, ninggi logogun mene faget andogorogo fogoin andi. A'nogo andogorogo fogoin halok he, afuni mondogat sumburu nele nen wa'lasugun lego,” iluk yagatikhe.

At raja Firaun nen Yusuf ayonggo fesikhesik ebe gubernur logouwageluk menfesikhe wene

37At Yusuf en raja Firaun a'nogo yagatikhemo at agoromi inomen Yusuf yabu a'nogo hilingisin mene faget ikhe andi, ”Fano mondok ikhe o,” iluk isukwa. 38A'nogo isukwasik at raja Firaun nen agoromi mel yagaisasikhe: ”At Yusuf Allah Areagun endawimo logolik yagatunem ili'logo andi nen, yabu andi aren higit hilingisigin werek andi hangge ap ekhe hunogoat mene koma mene herasugun anggegep. Mondok lego,” iluk yagaisasikhe. 39A'nogo yagaisasikhesik, at Yusuf mel yagatikhe: ”Wene mondogat egen andi Allah nen yagahetemo nen egen o. Ma re, it afuni ekhe inobabut endebat hebelek logolik yi wene ti wene endebat inelu meneat he, harenek he, hobabut mondok hebelek logolik yi wene ti wene mondok helu re, hat aro. 40Halok, an nen hat hebe gubernur logouwageluk menhobagagunem afuni mondogat haren, yi'nogo hilingi'no, ti'nogo hilingi'no, iluk yagaisugunem hane hologo hilingiti logogun o. We, an namunek he, hat endebat manggwe maya higit werek kwelek an ponggwe hak logolik, o yoma nenupogot an logogin o,” iluk yagatikhe.#Kis. 7:10 41-42A'nogo yagatikhesik he, at raja Firaun nen emas mene enggi segelet oba kain enupogot afuni awe a'ma ferinarek werek mene iluk inendawi wenggelogo ugu welagaikhe mene nonggologo at Yusuf enggiba ikfikhi logolik mel yagatikhe: ”Hat hebe afuni Mesir mene mondogat inoe kain gubernur logoinogeluk hayonggo figirik menhobagagi o,” iluk yagatikhe. A'nogo yagatikhesik, asu eil sakhorek mene enu lenan labetfigik, eile emas mene alonggopma ikfigik, isikhe.#Dan. 5:29 43A'nogo ikfesikhesik, at ebe enupogot afuni awe a'ma ferinarek logolik kereta oto hangge mene wam kuda nen lisogo waluk lagarek meneba nikhi lagaikhe mene ebe pire were'ma, ekhe at Yusuf waluk nikhi logouwageluk wogotikhemo, waluk lagu kwelek, it ap at kain enupogot agaukhogo hilingisuageluk serogo welagaukwa mene kereta andi elokhokwe laga logolik inane hokhorogo mel ilik lagaukwa: ”Hinebe, at loagen selegethani o, loagen seleget hani o,” iluk ilik laga lagaukwa. A'nogo hilingisogo at Yusuf afuni Mesir mene mondogat inoe kain gubernur logouwageluk menfesikhe andi. 44A'nogo menfesikhesik, at raja Firaun nen wene ero mel isikhe: ”An raja Firaun nen, afuni Mesir mene mondogat haren,

Yi'nogo hilingi'no, iluk yagaisigi'le'ma, inendawimo nen anggaluk ekhe hilingiti logogun mondok lego, iluk Yusuf yagati andi hinesanggo holini o,” iluk yagaisasikhe. 45A'nogo yagaisasikhesik, Yusuf enu it afuni Mesir mene inenu hangge, Zafnat-Paaneah salfilik, agwe ap Asnat Potifera tugwi kembu it mene eisewerek o kota Heliopolis mene a'logo wogotikhe.

46A'nogo menfesikhesik agwe a'nogo wogotikhemo, at Yusuf ebe umur 30 tahun oba yabu raja Firaun aiba Mesir mene faget, hilingisigiluk ero fakfesikhe. Fakfesikhesik, at Yusuf ebe raja Firaun aiba andoma nen o Mesir esanggokwe yi awi ti awi mondogat eilenggen hilik lagaikhe. 47Lagu kwelek, 7 tahun fano mondok werek kwelek, yi mene ti mene awi yatukwa mene enggen mondok hokhorogo oba heilarogo itikhe. 48Gandum enggen itikhe mene andi at Yusuf en andogorogo o kota lombok filik lagaikhe. O kota andoma ebe lombok era'lukwe yabukwe gandum enggen itikhe mene palogo re, o kota andomaat filik lagaikhe. 49At Yusuf en gandum enggen mondok hokhorogo ial laut yenggelek era'lukwe welagarek andi hangge andogorogo fesikhe andi nen he, enggi wenakhigik fikhi lagaikhesigen, hobuk hokhorogo hilinglagaikhemo andi nen wenati'lek herakfisasikhe.

50A'nogo logolik, sumburu ouwak andi oan wagi'lek werek kwelek, at Yusuf agwe Asnat a'nogo eagwi ap inebe pire taginafikhe. 51A'nogo taginafikhemo, at Yusuf en he, mel isikhe: ”At Allah nen he, an yi enggin ti enggin hokhorogoat higi a'nogo nonggoret figik, neisena againafuri inom inoba nonggoret figik, uageluk hilingnafe andi nen namlogo manggusa mene enu, Manasye,” iluk salhikhe. 52A'nogo salhikhesik, ekhe mel isikheat: ”Allah nen he, an nebe weak were'ma nagainafuri ya wo'nete,” iluk isikhesik amlogo hobuk mene andi enu re, ”Efraim,” iluk salhikhe.

53A'nogo salhikhesik oba nen, o Mesir 7 tahun fano mondok welagaukwasigen arat elugun oba asi wagaikhe. 54A'nogo hilinglagaikhesik, ombo'ne re, attagat at Yusuf en, ”Sumburu ouwak werek kwelek 7 tahun logogun,” iluk yagaisasikhe a'nogo higithogoat ouwak arat agaikhe. Sumburu ouwak arat agaikhemo, o yi awi ti awi ouwak mondok agaikhe meneat he, o Mesir yi awi ti awi mondogat sumburu fesukwa mene omanogo welagaikhe.#Kis. 7:11 55Sumburu a'nogo ouwak agaikhemo, afuni Mesir mene inamburu nele nen elo'lek agaikhemo, at raja Firaun kino yagasi lagaukwama, aren he, mel yagaisasikhe: ”Yusuf en he, yi'nogo hilingi'no, ti'nogo hilingi'no, iluk yagahisikhe halok ane hologo mondok hilingi'no,” iluk komorogo Yusuf oba lakfisasikhe.#Yoh. 2:5 56A'nogo lakfisasikhemo nen, sumburu ouwak a'nogo, o andoma yi awi ti awi wialarik laga logolik, elo'lek agaikhemo, at Yusuf en gandum enggen palogo kota mondogat fesikhe mene omanogo kwe hurik lagaikhesik, onggo wanhunem afuni Mesir mene nen sumburu at oba onggo palhi lagaukwa. 57A'nogo palhu were'ma, afuni o yi awi ti awi mondogat sumburu ouwak mondok weak agaikhe andi nen he, afuni o elima yoma mene mondogaren sumburu Yusuf oba onggo paluogeluk o Mesir kwikhi lagaukwa.

Currently Selected:

KEJADIAN 41: inohap

Highlight

Copy