KEJADIAN 42

At Yusuf ogogwi omanogo gandum onggo palugun iluk o Mesir lagaukwa wene

1At Yakub esanggo holhugunemen he o Mesir enek he gandum onggo pali'lagwi ugunem holhikhesik aren amlogomi yagaisikhi logolik: ”Hit he nenahalok hinafe wing-wonghogo welagep? 2O Mesir enek he gandum werek iluk ugunem nesanggo holhinggere nit sumburu ouwagen wa'lago hanogore andoma lambik he gandum onggo pali lani,” iluk yagaisasikhe.#Kis. 7:12 3Yagaisasikhemo at Yusuf ogogwi agaila'lak inebe 10 nen omanogo gandum onggo pali logoin iluk o Mesir lagaukwa. 4Oba nen he, at Benyamin Yusuf agot inagaisa misik mene a'nogo nek he, at ebeba yi'nogo ti'nogo weak mene ekhe oba asinogo iluk hit hinom logoin lek, iluk yagaisasikhe.

5O Kanaan oba ogo sumburu ouwak hokho mene lagasikhemo at Yakub amlogomi inom afuni fena amu mene inom o Mesir gandum onggo pali wagaukwa. 6Andem oba re, at Yusuf a'nogo ebe kain gubernur mendek logolik afuni o kweangma yi awi ti awi mondogat inoba onggo palhi lagaukwama at Yusuf ogogwi omanogo ogo wagaukwasik he, ineindep awi yagaisogo a'ma sebe i wagaukwa. 7Wagaukwama at Yusuf a'nogo nen ogogwi eil enek isasikhe. Enek isasikhesigen he at eranen yandalonhogo hilingiti lagaikhe. A'nogo hilingiti logolik, it ap omanogo inoba at ane haferogo yagaisikhi logolik, ”Hit hinebere koma nen wagep? Hinaiba koma mene?” iluk heinok woginafikhemo, iren onggo yagati logolik, ”Nit he o Kanaan ninap sumburu onggo palugun iluk wago o,” iluk yagatukwa. 8A'nogo ikhi logolik at Yusuf en he, an nogogwi omanogo iluk elu agaikhe oba nen iren he at inonggot agaukwa. 9A'nogo hilingiti logolik at Yusuf en he, it ogogwi andi faget abi wokhasikhe aple a'nogo ebet hasikhesik, it yagaisikhi logolik he, ”Hit oma re, nit ninaiba yoma ninggi'nogo werek iluk hineil penesuogeluk wagepma hisikhi lagi!” iluk yagaisasikhe.#Kej. 37:5-10 10Yagaisasikhemo iren onggo ikhi logolik, ”Lego ninoe, nit hagoromi re we sumburu onggo palugun iluk wago. 11Nit he nineil penetu ninap fuk, nit he fano ninap. Nit ninebe re nineisena misigen tago mene wago,” iluk yagatukwa. 12Yagatukwama at Yusuf en ikhi logolik, ”Hit he hineranhogo! Nit ninaiba yoma hineil penesugun iluk wagep,” iluk yagaisasikhe. 13Yagaisasikhemo iren ikhi logolik, ”Ninoe, nit ninebe re nineisena misik mene o Kanaan agun amlogomi. Nit nineisena misik mene nen ninebe 12 en tagongge mene welago, oba nen he ninare misik enek ekhe wa'lagaikhe, nen elabo mene re eisena inom werek kwelek wago,” iluk yagatukwa. 14A'nogo yagatukwama at Yusuf en ikhi logolik, ”An nen yagahisigi a'nogo eberogoat! Hit yire hineil penetu hinap wagebo. 15An nen ninoe raja enu hombuk palogo igin enggere, hiren hinagot elabo mene waluk wesugun lek halok he o yoma nen hit wulibi logoin lek iluk he, an nen yogondak hinobabut palhisikhi lagi andi. 16Hit hinane egep aple andi higit asigin a? Lek asigin a, iluk he yoma hit ap pok mene hakhogo hinobagaumo werek kwelek he, hit mene ap misik mene ekhe hinagot andi hondosi lambik we'no. Nen lek halok he, hun raja oak, hit ari re hineil penetu hinap nit ninaselei mene,” iluk yagaisasikhe. 17A'nogo isikhesik it a'nogo hele warogo kwelakfisagarek oba omanogo kwelakfisasukwama inenggi henagan welagaukwa.

18Inenggi henaganek oba at Yusuf en it omanogo yagaisikhi logolik, ”An he Allah oba nailorogo logolik higithogo hilingiti laginggere, hiren wene misik yi higithogo hilingisugun halok enek he hinagap telogo hinobagagin o. 19Nen, hiren ibi-eberogo nenat egep andi ninelu asuageluk hit fenare gandum onggo palhep mene andi hineisugwi hinagaisailak inom sumburu nelerogo logoinogore waluk hinaiba lagu kwelek he hit mene arem misik enek ekhe hele warogo fisagarek oba yoma foumo logogin. 20Werek kwelek wene hiren egep mene andi enegasuageluk, hit hinagot elabo mene andi an nambit waluk wagep halok enek he, an nen, ’Eberogoat aga’ anggagain,” iluk yagaisasikhe.

Yagaisasikhemo iren ikhi logolik he, at gubernur en tegete mene andi nek he fano ikhe anggasukwa. 21A'nogo anggasukwasik, it aremnogo ekhe nen ekhe yagatik, ekhe nen ekhe yagatik hilingiti logolik, ”Yogo agi, niren attak ninagoren lebetneani ugu kwelek niren ane holhi'legengge at eberogoat endawi ou hugu kwelek oba nen he herakfisogo a'nogo re, yogondak ninenggi elugun oba enggin hikhi lago ari,” iluk isukwa. 22Andi isukwama at Ruben a'nogo nen ikhi logolik: ”An nen attak aremnogo abo andiba wene yi'nogo ti'nogo hilingisugun lek iluk yagahisasigi oba nen he, hit an nane holhi'legengge hilingitigip a'nogo re yogondak nit ninagot wasugun iluk isugu a'nogo nen wene ninoba fili'lago ari,” isikhe.#Kej. 37:21-22 23A'nogo ugunem, at Yusuf esanggo holhi lagaikhe oba nen he, iren he Yusuf inonggot andi nen, nit ninane fut fagain lek hea iluk, it ekhe nen hebelogo yagati lagaukwa. 24A'nogo hilingitukwasik, at Yusuf a'nogo it aremnogo herakfisaluk le asi lagaikhesigen he nekhengge ane u hak agaikhemo nek he, it inambit wagaikhe. Wagaikhesik it ori omanogo ineilhanem at Simeon a'nogo senegeisogo enggi hele wasuageluk, yagaisasikhe.

At Yusuf ogogwi omanogo inambotkwe wagaukwa wene

25At Yusuf en yagaisikhi logolik su karung at ogogwi nen waluk wagaukwa mene andomaba re gandum kwalfuluk it inauang inonggwaregen mene andoma ogore inasu lombok kwalfilik lano. Nen sumburu ebekhalemen nogoin mene ogore wogisanoat, iluk yagaisikhemo aren hilingi'no iluk yagaisasikhe mene a'nogo higithogo nek hilingitukwa. 26A'nogo yagaisasikhemo at Yusuf en ogogwi omanogo gandum onggo palhukwa mene omanogo wam keledai amboloba liakfesukwasik lagasukwasik he, o omanogo nen wulipluk wagaukwa. 27Wagaukwasik ebekhalem hup nogo ikhi logolik it mene misik ekhe nen keledai gandum wogisogoin iluk su ele filing hasikhe. Filing hugunemen he, aren mene uang a'nogo ambem kwalek welagaikhe. 28Kwalek welagaikhemo aren ori omanogo inoba yagaisikhi logolik, ”Uang attak mene a'nogo oak waganogo herakfisikhemo su karung oba kwalegengge yi kwelakhani agwi!” iluk yagaisasikhemo, it omanogo inendawimo youk isukwasik inailo nen heinok wok-wok aga logolik, ”Arire ninggi'nogo nen Allah nen nit ninoba hilingninafe nogo?” iluk isukwa.

29A'nogo isukwasik it aremnogo o Kanaan asi wagaukwasik iren hilingitukwa mene inom, hasukwa mene omanogo inom, mondogat ineisena oba tindelhukwa. 30Iren tindelhi logolik he, hun gubernur o Mesir werek agun andi nen he wene ane haferogo yaganisikhi logolik, hit he yoma hineil penesuogeluk wagepsik iluk ninoba fu'mo hikhibet nisikhe. 31Hikhibet nisikhemo re niren ikhi logolik, ”Nit he fano ninabo, higithogo nek hilingitorek mene, nineil penesuogeluk wagore lego. 32Nit he nineisena misik mene nen ninebe 12 nen ta'ninarek oba nen he, at misik ekhe re wa'laga nen at elabo mene re eisena inom o Kanaan werek,” iluk yagato. 33A'nogo yagatoma nen he, at gubernur a'nogo nen ikhi logolik, ”Hit arem mene misik ekhe yoma werek kwelek hit fenakwe nek he gandum waluk hineisugwi hinagaisawi inamburu nelerogo werek enggere inambit waluk lani o. 34Nen hiren he hinagot elabo mene andi waluk nekhengge wesumo nek he, hit hinare hele warogo figi mene yi fikhalogo wulakhisambik he, hit hineil penesuogeluk wagep fuk iluk nelu asumo, hit ninom yoma logolik hinendawinggen nen wenggel fuluk onggo paligik, hunirigik ikhi logogun iluk yaganisikhe o,” iluk ineisena yagatukwa.

35A'nogo yagatukwasik, iren inasu karung omanogo seleget fouwogen iluk heiselhilik lagaukwa re tompet uang kwelabek mene omanogo uang ebeet inasu tomok kwalegengge were'ma hasukwasik it omanogo ineisena inom inailo hokho mene agaukwa. 36Inailo nek agaukwasik ineisena nen it yagaisikhi logolik, ”Namlogo Yusuf ogo legat, Simeon ogo legat, nen yogondak at Benyamin ogore wanuogeluk ikhi lagepma, namlogomi hiren hilingiti lagep oba an nagainafuri omanogo longgo nek ugunem an hineisena anggolo hurane hikhi lagi yi re, ninggi'nogo nen agi,” iluk isikhe. 37Andi isikhemo at Ruben a'nogo nen eisena yagati logolik, ”Nagot Benyamin he we an nenggimo wo'nom, an nen nekhengge waluk wesigin, nen waluk wesigin lek halok he neisena haren an namlogomi pirenet inebe pinggi inoa'nogo,” iluk yagatikhe. 38A'nogo yagatikheba nen he at Yakub en ikhi logolik, ”Lego, an he mondogat yaman agari'mo re, hiren an nendawimo weaget fou lek mene andiba nen, an wa'lasigin andi nabit enggere, namlogo Benyamin he waluk logoin lek, we at oe mondogat wa'lagama arenek werek enggere ebekhalem lagunemen at oba yi'nogo ti'nogo ekhe asinogo,” iluk yagaisasikhe.

Currently Selected:

KEJADIAN 42: inohap

Highlight

Copy