KEJADIAN 40

At Yusuf en ap hele warek mene nen inabi hasukwa mene tindelogo yagaisasikhe wene

1Inenggi ekhe welagaukwasigen, ap inebe pire at raja Firaun o Mesir mene amingmingengge mene. At ekhe inoe kain agai nunggu mene faget yi'nogo hilingisogo wogisagarek, iluk wene lenggalhi lagaikhe mene, nen at ekhe amburu roti werati logogun mene faget yi'nogo weratarek, iluk wene lenggalhi lagaikhe mene emberegen, inoe enupogot a'nogo weak hilingisogo fesukwa. 2Weak a'nogo hilingiti lagaukwama, at kain a'nogo a'mage hokhorogo inoba fesikhe. 3A'mage inoba fesikhesik, emberek inenggi hele warogo o inenggi hele warek fisagarek oba ap kain enupogot aiba serogo welagaukwa mene inoe aiba andoma at Yusuf enggi hele warogo o andoma fesukwama were'ma oba kwelakfisasukwa. 4Kwelakfisasukwama, hele warek inenggi hokhorogoat welagaukwa. Were'ma, it at raja Firaun aiba serogo welagaukwa mene inoe a'nogo nen he, Yusuf en it ap andi faget yi mene ti mene wogisikhi logouwageluk yagatikhe.

5O hubanggo ekhe sambul he, it at raja Firaun agai nunggu mene faget wene lenggalhi lagaikhe mene a'nogo inom, amburu roti faget wene lenggalhi lagaikhe mene a'nogo inom, emberegat inabi hasukwa. Inabi hasukwa andi ebe hilinglasigin mene wene ebere, amu-amu were'ma hasukwa. 6O healekwe at Yusuf inambit lagaikhesik, kwelagisasikhe re, it inendawinggen mondok engginhogo were'ma isasikhe. 7A'nogo were'ma isasikhesik he, mel yagaisasikhe: ”O yogondak he, hit hemberegat hinendawinggen engginhogo welagep andi nenahalok?” iluk inoba heinok wogisasikhe. 8A'nogo wogisasikhemo, iren he: ”O yogondak hubanggo ninabi hogo mene re, ebe yi'nogo mene faget hegep, iluk yaganisogoin mene afuni mondogat inonggot enegen welago o,” iluk yagatukwama at Yusuf en he: ”Allah nen yagaisugunem enek he, ebe yi'nogo mene faget hegep, iluk u hak, ma re hinabi hegep mene andi pilingisogo yagane'ni o,” iluk yagaisasikhe.

9Yagaisasikhemo, at raja Firaun agai nunggu mene faget wene lenggalhi lagaikhe mene a'nogo nen he, ”Nabi andi re, anggur ero ekhe an nelokhoma yago welaga higi. 10Anggur andi agole henagan nen hilingi'mo re, engga kerat sabelhi laga. Sabelhi logolik weak-weagat enggen ite mene re, weak-weagat yugulagunem higi. 11A'nogo hikhi logolik he, mangkok i at raja Firaun ninggerek mene nenggim fisogo logolik, anggur enggen a'nogo mene palogo, amusu mangkok a'nogoba keralogo figirik kain wogotunem nabi higi o,” iluk yagatikhe. 12A'nogo yagatikhemo, at Yusuf en he, mel yagatikhe: ”Hat habi hegen andi ebe yi'nogo: Anggur agole henagan nen hilingik hegen andi ebe re, o lingge ninenggi henagan logogun mene faget hegen o. 13At raja Firaun nen inenggi henagan logombik he, hat henggi hele fikhalogo wulakhobagambik, wene hoba mene korogo legetfisambik, heabu attak hilingiti lagen mene hambotkwe wokhesigin. A'nogo wokhesumo re, at raja Firaun imangkok andiba agai keralogo wogoti lagagin hagat wogosigin mene faget hegen o. 14-15A'nogo meneat he, hat heabu wokhesumo fano logolik, an noba ebe'no o. An weak ekhe hilingiti'le'maat he, afuni Ibrani mene inaiba nen an nabit werek kwelek yoma laknobagai wagaukwama welagi. Nen, o Mesir yoma nen ogo re, weak ekhe hilingitunem wene inoba fuluk hele warogo kwelakfisagarek andi hak an ekhe hilingiti'le'maat he, nenggi hele warogo yoma kwelaknobagai wagaikhama welagiat andi nen, at raja Firaun nen nenggi hele fikhalogo wulaknobagauwageluk, yaga'no o,” iluk yagatikhe.

16At raja Firaun nen agai nunggu mene faget wene lenggalhi lagaikhe mene a'nogo abi hasikhe mene ebe fano asigin mene yagatikhemo, at raja Firaun amburu roti werageti logogun mene faget wene lenggalhi lagaikhe mene a'nogo esanggo holhikhesik he, Yusuf mel yagatikhe: ”An nabi re, sumburu roti werago mul henagan ugu mene elema kwalhigik nunggul oba waluk lagunem higi aro. 17Mul ugu ebe amboloba mene elema re, yi kue ti kue at raja Firaun nen noageluk werago waluk lagunem he, sue wagasik kue andi nunggunem higi o,” iluk yagatikhe. 18A'nogo yagatikhemo, at Yusuf en he, ”Hat habi hegen andi ebe re, yi'nogo: mul ugu henagan mene hegen andi ebe re, o lingge inenggi henagan nen logogun mene faget hegen o. 19At raja Firaun nen inenggi henagan logombik, agoromi yagaisamo, hat halonggop tekhogo hoasimbik he, hebe warek eba hele kelogo hobagaumo re, sue wesimbik hebe nagain mene faget hegen o,” iluk yagatikhe.

20A'nogo yagaisasikhesik oba nen, o inenggi henagan welagaukwasik, at raja Firaun ebe ta'lagaikheba pesta hokho mene hilingisuogeluk agoromi at faget yabu hilingiti lagaukwa mene mondogat inom nouwogeluk inayonggo fesikhe. Inayonggo a'nogo fesikhesik, at agai nunggu mene faget wene lenggalhi lagaikhe mene a'nogo inom, amburu roti nunggu mene faget wene lenggalhi lagaikhe mene a'nogo inom, inenggi hele fikhalogo at agoromi eabu hilingiti lagaukwa mene fenakwe omanogo inoba woginarek wesuageluk agoromi ekhe yagaisasikhe. 21A'nogo yagaisasikhemo woginabi lagaukwasik woginarek wagaukwama re, at raja Firaun agai nunggu mene faget wene lenggalhi lagaikhe mene a'nogo eabu attak hilingiti lagaikhe mene ambotkwe wogoti logolik he, 22ap amburu roti nunggu mene faget wene lenggalhi lagaikhe mene a'nogo nek he, ebe mondok wasuageluk wene oba fesikhe. Wene mondogat a'nogo hilinglagaikhe andi, at Yusuf en isikhe higithogo mondok hilinglagaikhe. 23A'nogo meneat he, at ap kain agai nunggu mene faget wene lenggalhi lagaikhe mene a'nogo Yusuf oba ebeti'lek, we, mondok onggoret fisasikhesik welagaikhe.

Currently Selected:

KEJADIAN 40: inohap

Highlight

Copy