KEJADIAN 13

Abram Lot emberek minggilagaukwa wene

1At Abram o Mesir herakfisaluk, o abel utara fikhit lagain iluk, o Kanaan nen selatan fikhit andoma wagaikhe. Waga logolik he, at agwe inom yi mene ti mene mondogat inom helaluk wagunem at Lot a'nogo ogore ombo'ne wagaikheat. 2Abram anggo re, domba inom, kambing inom, sapi inom, nen, arupiah perak mene inom, emas mene inom, mondok hokhorogo were'ma ebe kain enggi werek agun welagaikhe. 3-4A'nogo waga logolik, o Betel lagaluk, o ekhema nen ekhema kwigik wagaikhe. A'nogo waga lagaikhesik, o Betel honggolek Ai honggolek higit lagaikhesik he, attak o sabu su mene wutikhesik, yi mene ti mene Allah faget warogo endu noleti logogun oba obalik wutikheba a'nogo lagaikhesik, Allah fogeratikhe.

5Nen, at Lot ogo re, againafuri inom, amingmingengge inom, anggo domba kambing, sapi inom, welagaikheat. 6It emberek inanggo mondok hokhorogo welagaikhe andi nen, engga endebatma re, emberek misi'mo logou elo'lek agaikhe. 7Andi nen he, at Abram agoromi wam konhi lagaukwa mene inom, Lot agoromi wam konhi lagaukwa mene inom, inom wene palhukwa. (O andem sambul it afuni Kanaan mene inom, Feris mene inom, o andomaat welagaukwa.)

8Inagoromi wam konhi lagaukwa mene wene a'nogo palhi lagaukwama, at Abram en Lot mel yagatikhe: ”Nit ninebe misigen tago hilingi'mo, hat hagoromi inom, an nagoromi inom wene a'nogo pali'lagwi andi weago. 9Ma re, nit ninamu-ninamu minggilasuogo. Hat honggwarek hendawimo hamolo anggegen kwe wenakhan. Hat andi kwe lagain halok, an yi kwe lagain, hat yi kwe lagain halok, an andi kwe lagain,” iluk yagatikhe.

10A'nogo yagatikhemo, at Lot eilenggen esanggokwe yethasikhesik, i Yordan ima o kota Zoar huli yethasikhe re, andoma i mondok hokhorogo were'ma Tuhan agayo enggen yabumo hangge inom, o Mesir hangge inom, were'ma yethasikhe. (O andoma Tuhan nen o kota Sodom inom, Gomora inom, oan felelenghogo inoati'lek werek kwelek o elokhe fano mondok a'nogo welagaikhe andi.)#Kej. 2:10 11At Lot a'nogo eilenggen yethasikhesik, o Yordan tonggwe andoma mondogat wenakhasikhesik he, Abram emberek minggilogo at Lot o mo wulibi wagarek higit andoma lagaikhe. 12Lagaikhesik, o sabu kota ekhe were'ma wutik, ekhe were'ma wutik, o Yordan tonggwe andoma mondogat ya wutik ta wutik laga lagaikhesik, o Sodom higit andoma asi wagu kwelegat he, at Abram enek he, o Kanaan andomaat welagaikhe. 13O kota Sodom andoma re, afuni Allah elokhoma inobabut mondok weak hilingiti lagaukwa mene welagaukwa.

Abram o Hebron lagaikhe wene

14At Lot arat lagaikhemo nen he, at Tuhan nen Abram mel yagatikhe: ”Hat hebe mendek welagen oba aremat mendek logolik, heilenggen elikwe, yikwe, polikwe, malikwe mondogat yethano o. 15Kweang hat heilenggen yethegen mene andoma mondogat hat hebe inom, haren tagomangge mene inom, eise asimbik mondok-mondok logobagaigeluk wokhisagain o.#Kis. 7:5 16An nen he, haren tagomangge mene inebe mondok hokhorogo, ilingage kweangma inenggi wenasu mondok elo'lek welagarek andi hak, hinebe inenggi wenasu mondok elo'lek mene hilinghinabigin o. 17Kweang yoma mondogat hat wokhesigin andi nen he, heilenggen kogolik polikwe, malikwe, elikwe, yikwe mondogat lano o,” iluk yagatikhe. 18A'nogo yagatikhemo, at Abram en o sabu wutikhe mene a'nogo waluk, e Allah agayo afuni nen Allah faget hilingiti logogun oba era'lu enu Mamre andi re, o Hebron era'lu horogatma re, andoma wusi wagaikhesik, yi mene ti mene Tuhan faget warogo noleti logogun oba obalik mezbah wutfesikhe.

Currently Selected:

KEJADIAN 13: inohap

Highlight

Copy