KEJADIAN 12
12
Allah nen Abram ayonggo fesikhe wene
1A'nogo wa'lagaikhemo were'ma, nineisena Tuhan nen Abram mel yagatikhe: ”Hat he, haiba inom, hoe hagot inom, heisena aiba inom, herakfisaluk he, o An nen yagahesigin oba andoma lano o.#Kis. 7:2-3; Ibr. 11:8
2An nen he, haren tagomangge
mene nen hokhorogo sik-pik
imbik, it inunggulenu hokho
asuageluk hilinghobagagin o.
An nen, hat fanot hobagagik,
henu werek hilinghafik ugunem,
halisikhogo afuni ekhe hat
fanorinafi logogin aro.
3Afuni ekhe nen nauk inoba louget
fagarek hak hat fanot hafa halok,
An nen it andi fanorinafik,
it ekhe nen homan hobagagun halok,
An nen homan fisigik, ikhi logogin o.
Nen, hat hoba halisikhogo afuni
kweangma mene inunggulenu lombok,
An nen fanorinabigin o,” iluk yagatikhe.#Gal. 3:8
4-5At Abram ebe umur 75 tahun oba, Tuhan nen yagatikhe higithogoat o Haran herakfisaluk o Kanaan wagaikhe. A'nogo wagaikhe andi re, agwe Sarai inom, agot amlogo Lot inom, inomen o Haran logolik afuni ekhe it inamingmingengge asuageluk woginafukwa mene inom, inangge yi mene ti mene sumburogo helasukwa mene inom, helaluk wagaukwa. O Kanaan arat wagaukwasik he, 6Abram o Kanaan esanggokwe eilenggen hilik-hilik wagaikhesik he wesa aple hilingiti lagaukwaba o Sikhem en he o More e wesagayo eroma asi wagaikhe. (Nen, andem oba re afuni o Kanaan inap kweang andiba andoma welagaukwa). 7Andoma wagaikhesik were'ma Tuhan ebe Abram elokhoma menlagaikhesik he, mel yagatikhe: ”An nen afuni haren tagongge mene wogisagain he, o ebe yoma o,” iluk yagatikhemo, at Abram en Tuhan elokhoma menlagaikhe mene a'nogo faget, yi mene ti mene warogo noleti logogun oba obalik halogo fesikhe.#Kis. 7:5; Gal. 3:16 8A'nogo hilingi'luk he, pikhirat i ambutmo higit tom hokho meneba o kota Betel esanggoma, mo liabi wagarek higithogo andoma wagaikhesik, o Betel en honggolek, Ai nen honggolek andoma o sabu su meneba ekhe wutikhe. O wutikheba andoma nen he, o mo ubukhogo kwikherek higit he, o Betel andi, nen, o mo liabi wagarek higit he, o Ai andi. O andoma yi mene ti mene Allah faget warogo noleti logogun oba obuluk mezbah ekhe wutikhesik Tuhan fogeratikhe. 9A'nogo hilingi'luk he, o ekhe nen ekhema kwigik, o Kanaan i ambutmo higit wagaikhe.
Abram o Mesir lagaikhesik hilingitikhe wene
10A'nogo wagaikhe meneat he, o Kanaan andoma sumburu mondok ouwak hokho mene lagasikhemo sik asumo nen wesigin iluk, o Mesir ap pok higit logoigeluk lagaikhe. 11A'nogo laga logolik, o Mesir kuogeluk horokhogo asi lagaukwasik agwe Sarai mel yagatikhe: ”He yi nerei. Hat he, helokhe fano mondok hilingi'more, 12afuni Mesir mene nen, hat hebe ineilenggen heambik he,
Andi Abram agwe higi, iluk anggambik, an nebe noati logolik, hat heluk hobagainogo nen he, nerei ino. 13Haren a'nogo igin halok, hat halisikhogo an nebe heraknobagambik, fano hilingnabuageluk he, ap ari an noe, iluk yagaisano o,” iluk yagatikhe.#Kej. 20:2, 26:7 14A'nogo yagatikhesik, Abram laga lagaikhesik, o Mesir arat kwi lagaikhe hak he, afuni Mesir mene nen he Sarai a'nogo elokhe fano mondok hilingi'mo ineilenggen hasukwa. 15A'nogo hasukwa ma, at enupogot Firaun agoromi pegawai nen ogo, he Sarai ineilenggen hasukwaat. Hasukwasik, ”He ekhe elokhe mondok fano mene nineilenggen hogo,” iluk at kain Firaun yagasi lagaukwa. Andi nen he, he a'nogo kain Firaun aiba waluk lagaukwa. 16Waluk lagaukwama, at ap Firaun a'nogo nen, he Sarai alisikhogo Abram fano hilingfigik, afuni Abram amingmingengge logouwageluk wogotik, domba, kambing inom, sapi inom, keledai, unta inom, wogotik, isikhe.
17A'nogo meneat he, at ap kain Firaun a'nogo nen, he Sarai ebe wanhikhe andi nen, Tuhan nen ap kain a'nogo inom, agoromi at aiba welagaukwa mene inom, ou ero hokho inailo mene inoba fesikhe. 18A'nogo fesikhemo, at ap kain Firaun a'nogo nen, at Abram wolhasikhesik he, mel yagatikhe: ”Haren he, he yi re, an nagwe, iluk yaganeti'lek lalogo hilingnafen andi nenahalok? 19Haren he, he yi an nombo'ne mene, iluk egenma an wanhi andi nenahalok? Hagwe ebe yi, helaluk he, lan o,” iluk yagatikhe. 20A'nogo yagatikhesik, at ap kain a'nogo agoromi inebe miren mene hakhogo yagaisikhi logolik Abram ebe inom, agwe inom, angge yi mene ti mene mondogat inom, o andoma nen wulakfisoageluk yagaisasikhe.
Currently Selected:
KEJADIAN 12: inohap
Highlight
Share
Copy
Want to have your highlights saved across all your devices? Sign up or sign in
