KEJADIAN 11
11
O Babel helep oba sep hun-hun wurik lagasukwa wene
1O endamat afuni inunggulenu lombok kweangma yi awi ti awi welagaikharek andi inane misigat logolik, yi mene ti mene enu misigat mene nek ikhi lagaukwa. 2A'nogo logolik, o mo lagai wagarek higit o tonggo erang tonggoma mondok liok-layokse'ma enu Babylonia andoma lagaukwasik welagaukwa. 3Logolik, it-it ekhe nen ekhe yagatik ikhi logolik mel isukwa: ”Niren he, kweang mene helep hangge omame asuageluk endumo werasuogo,” iluk isukwa. A'nogo isukwasik, helep hangge asuageluk kweang mene inom, amusu anggokhorweak mene inom, weragaisogo sep hunitarek mene ekhe heratukwa. 4A'nogo heratukwasik he, mel isukwa: ”Nit ninebe o kweangma yi awi ti awi pugulhi'lek logolik ninenu werek logouwogen he, o kota ekhe ket mene halhi logolik, o ekhe uan-awan mene sep hun-hun pogoroba wurik lagauwogo,” iluk isukwa.
5A'nogo isukwasik, wutunem Tuhan nen o kota ket halhi lagaukwa mene a'nogo inom, nen o sep hun-hun uan-awan wurik lagakhi lagaukwa mene a'nogo inom, eilenggen hagaluk pi wesigeluk isikhe. 6A'nogo at Allah pi wesigeluk, mel isikhe: ”It andi inunggulenu misigat, nen inane misigat logolik,
Yi'nogo hilingisuok iluk, wene attak lenggalha re andiat higi. Hobuk iren,
Nit yi'nogo hilingisugun ninamolo, iluk anggugunem higirenek hilingiti logogun higi. 7Halok, it-it ekhe nen ekhe inane inesanggo holhi'lek hilingisuagen, niren inane onggut munenfisa puogo,” iluk pi wagaukwa. 8Pi wagaukwasik nineisena Enupogoren it pugulogo o yi awi ti awi lakfisasikhemo, o kota ket mene halugun isukwa a'nogo herakfisaluk pugulagaukwa. 9At Tuhan nen it afuni inunggulenu lombok mondogat inane unggut munenogo hilingfisasikhesik, o yi awi ti awi pugulogo lakfisasikhe andi nen, o andoma enu Babel salhukwa andi.
Ap Sem ambisangma mene nen ta'larik lagaukwa wene
10Ap Sem en ambisangma mene inebere yi. I fu hokho mene a'nogo wagaikhe huli andem oba tahun pire hilingfuluk at Sem ebe umur 100 tahun oba at omalik abengge ekhe enu Arpakhsad tatikhe. 11At ebe umur 500 tahun ekhe inom logolik againafuri helime inom alage inom taginafikheat.
12Nen Arpakhsad umur 35 tahun logolik aren amlogo abengge ekhe enu Selah tatikhe. 13Andi nen at ap Arpakhsad ebe umur 403 tahun inom logolik againafuri helime inom alage inom taginafikhe.
14At Selah umur 30 tahun logolik aren amlogo abengge ekhe enu Eber tatikhe. 15Andi nen at Selah ebe umur 403 tahun ekhe inom logolik againafuri helime inom alage inom taginafikhe.
16Nen, at Eber umur 34 tahun oba, aren amlogo abengge ekhe enu Peleg tatikhe. 17Andi nen, at Eber umur 430 tahun ekhe inom logolik againafuri helime inom alage inom taginafikheat.
18Nen, at Peleg umur 30 tahun logolik aren amlogo abengge ekhe enu Rehu tatikhe. 19Andi nen, ap Peleg ebe umur 209 tahun ekhe inom logolik againafuri helime inom alage inom taginafikhe.
20At Rehu umur 32 tahun logolik aren amlogo abengge ekhe enu Serug tatikhe. 21Andi nen at Rehu umur 207 tahun ekhe inom logolik againafuri helime inom alage inom taginafikhe.
22Ap Serug umur 30 tahun logolik aren amlogo abengge ekhe enu Nahor tatikhe. 23Andi nen at Serug ebe umur 200 tahun ekhe inom logolik againafuri helime inom alage inom taginafikheat.
24At Nahor umur 29 tahun logolik amlogo abengge enu Terah tatikhe. 25Andi at Nahor ebe umur 119 tahun ekhe inom logolik againafuri helime inom alage inom taginafikhe.
26Nen, at Terah umur 70 tahun logolik aren amlogomi abengge inenu Abram inom, Nahor inom, Haran inom taginafikhe.
Ap Terah againafuri inomen hilingitukwa wene
27Ap Terah nen againafuri taginafikhe mene inenu re yi: Abram inom, Nahor inom, Haran inom, taginafikhe. Nen, at Haran nen amlogo ekhe enu Lot tatikhe. 28At Haran he, eisena ebe eluk werek kwelegat, awiba o Babylonia ta'lagaikheba o enu Ur andoma ebe wa'lagaikhe. 29Nen, at Abram ogo re, agwe Sarai heligik, Nahor agwe Haran a'logo Milka heligik, isukwa. Isukwasik, Haran amlogo ap enu Yiska tatikhe. 30A'nogo meneat he, at he Sarai ebe abili welagaikhe.
31Were'ma, ap Terah o Kanaan wesigeluk, o Babylonia kota Ur herakfisaluk amlogo Abram inom, omba Lot inom, a'logo Sarai Abram agwe a'nogo inom, wagaukwa. A'nogo meneat he, wesuogeluk o Haran wagaukwasik, andoma kamo isukwasik welagaukwa. 32Andoma logolik, at Terah ebe umur 205 tahun agaikhesik, o andoma nen wa'lagaikhe.
Currently Selected:
KEJADIAN 11: inohap
Highlight
Share
Copy
Want to have your highlights saved across all your devices? Sign up or sign in
