JAKARIA 11
11
Dudehulio lotahi kawaasawa tadiila omanusia
1Wuu Libanon, huo̒ilo huhuu-hebuumu,
alihu tulu momobu bubuu-ngowaalo arasimu!
2Wuu bungo lodaru, hiyongolo mola,
sababu maloombahu bubuu-ngowaalo woohu,
bungo lo ayu u hiheebatia maloombahu.
Wuu bubuu-ngowaalo leidaa̒ to Basan, hiyongolo mola.
Sababu oo̒o-ayuwaalo daa̒ mapilopoto lopayadu.
3Dungohiilo hilimuta lotahi kawaasawa
madiduu̒ odudaa̒ limongolio!
Dungohiilo heuwongo lo sisii-ngawaalo to oa̒ayua;
sababu malo aantulu tambati biluloa̒ limongolio to ngohilayaa̒ lo Dutulaa Yordan.
Diiti duulota
4 Eeya Allahu Taa̒ala lotahuda mai odelaatia, “Pohutualo debo odelo yio̒ diiti tahemo himbala himba u mao̒lotolo. 5Tahi potalia himba momate mate-mateelo mao̒ hihii-mbaawaalo boito lou̒ diila moo̒tapu hukuumani. Timongolio tamopotali tapu lo hihii-mbaawaalo boito moloi̒ya, ‘Ilopujiaalo mola Eeya! Botia mai̒lo duhenga mola kayaanto!’ Didii-tiyaalo boito diila molaasa tolia̒ngo to hihii-mbaawaalo bibiahi mongolio.
6Wau̒ diilalo mohuto molaasa odehu hilao penu boli olita tolipu botie. Wau̒ lohihilao mamohudu ngoilanggubu tuango lipulio ode tahi kawaasawa. Timongolio boito mamopo aantulu lipu botie, wau Wau̒ diila tamohama monto okokawasa limongolio.”
7Watia, Jakaria, lapatao̒ hewuupa lomongo dahangi lohimba u mohimbala hihii-mbaawaalo u mao̒lotolo. Watia otunggudu duloputu; u ngoputu iluntee lowatia “Omuura” wau u ngoputu poli “Buuhuta”. Lapatao̒ watia lolumula lodaaha wau lolaalao̒ hihii-mbaawaalo boito. 8Diiti toulota tamolonuo̒ olaatia lopoo̒ pulito osaabali lowatia. Timongolio pilopolaahu lowatia todelomo wakutu ngohula mola. 9Lapatao̒ watia loloi̒ya mao̒ ode himbala lohimba boito, “Watia diilalo mohuto mohimbala olimongoli. U musi mate huliilo mao̒ mate, wau u musi binaasa huliilo mao̒ binaasa. Lapatao̒ labitio mowali mopapaa-teaalo mate-mateelo mao̒.” 10Lapatao̒ tunggudu u iluntee lowatia “Omuura” boito hilama lowatia wau biloli lowatia u diila lopomata daantia u pilohutu lo Eeya ode ngoa̒amila bangusa. 11To dulahee boito olo daantia boito diila pilopomata. Tahi podahangia lohimba boito helo ngimato olaatia, wau timongolio longalati deu̒ Eeya donggo hemo tahuda loli totoonulalo huhutu lowatia. 12-13Watia loloi̒ya mao̒ ode limongolio, “Wonu mongotuani akolo, wohiyalo mai wuupa watia; wonu diila, sambeloolo.” Lapatao̒ timongolio longohi mai olaatia tolo pulu lopita doi talaa̒ duo̒lo wuupa lowatia.
Eeya lotahuda mai olaatia, “Potuwota mao̒ doi boito ode delomo bulua Bele lo Eeya.” Oditolio pilopo tuwoto lowatia otolopulu doi talaa̒ boito ode delomo bulua Bele Eeya. Bo tunggula teteetolo pilomasisia limongolio olaatia! 14Lapatao̒ uito biloli lowatia tunggudu lowatia u oluolio, deu̒yito-yito u iluntee lowatia “Buuhuta”, yi lopoo̒ lomola himbunga lo Yehuda wau Isirai̒lu.
15Lapatao̒ lotahuda mai Eeya olaatia, “Pohutua mao̒ pee̒entapo debo odelo yio̒ diiti, bo pee̒enta botie odelo diiti tadiila mopiohe. 16Sababu Wau̒ mamongohi tuugasi ngotaalio lodiiti u modaha himbala lohimbaa-U̒, bo tio diila momandungi himba u yilooli; tio diila mololohe himba u yilapalo, diila olo mohunema himba u pilalia, wau diila mongohi ua̒alo ode himba u donggo tumutumulo. Tumbao̒ tio lohihilao lolamela tapu lohimba u molingohe daa̒ wau lomahutao̒ luluu-obeyaalo binatangi boito. 17Malaa̒-laa̒natilo diiti tadiila ohuna boito! Tio malo lolaa himbala lohimbalio. Popaatea mamo poo̒pulitao̒ okokawasaalio. Polotodu uluu̒lio mamowali molulupuhu wau matolio olowala mowali pitoo̒.”
Currently Selected:
JAKARIA 11: LAIGOR
Highlight
Share
Copy
Want to have your highlights saved across all your devices? Sign up or sign in
