Yohanes 19

Itemo o Yesus bilasu wosone o sangahadika

(Matius 27:15-31, Markus 15:6-20, Lukas 23:13-25)

1So kagena de ma gubernur o Pilatus una magena wasulo awi prajurit la o Yesus iwingaho de wingangapo. 2Wingangapo daboloka, de awi prajurit ona magena wisimade Unaka gena, o bi gota ma daara datototopo gena yaaka koloko to Una Awi mahkota moi so Awi saheku isitalakeka. De lo o juba dauungu maro o bi kolanoka manga juba iwisitibaku. 3Dabolo de ona wisimade isidadu-dadu de itemo, “Suba! O Yahudika manga kolano!” De gila-gila Awi bioko yapopoka.

4Ma moili ma gubernur wosupu o Yahudika manga roririka wotemo kali, “He! Nianano! Nakoso Una magegena, ngohi towisisupu ma ngale gena tinidedemo nginika, igogou Una manena Awi sala moi lo ngohi tamakewa.” 5So o Yesus wisisupu de wisitalakeku de o mahkota datototopo de lo o juba dauungu, de ma gubernur una magena wotemo onaka, “Kodo! Hika Una manena niwinano.”

6Ato o imamka ma bi sahe de manga nyawa yojojajaga iwikelelo, de ona yangodu ka moiye imatoore itemo, “Powisidasangahadi! Powisidasangahadi!”

Duma ma gubernur wotemo, “Asitagala! Nako komagena, de ngini Awi nyawa masirete gena niwingaho la niwisidasangahadi. Nakoso maro ngohi to Una Awi sala moi lo tamakewa.”

7De o Yahudika manga roriri magena asa ka isigegego itemo, “Nako to ngomi mia bobita miacocoho gena pamote, igogou Una magena bilasu ka wosone, sababu Una lo wotemo daboloka Una o Gikimoi ma Ngopa.”

8Kagena de o Yesus Awi demo magegena ma gubernur woise, so una asa he ifoloisi wimodo. 9So awi kadato ma rabaka wowosa kali, de wosulo la o Yesus lo wisingosa kali, so wotemo o Yesuska, “So Ngona igogou o kiano.” Duma o Yesus ka o demo moi lo wosangowa. 10Wotemo kali, “Dadoohaso ngohi noisango noholu. Nagala Ngona noinakowa ngohi de ai kuasa, so aku tosulo Ngona nipalako eko lo nisidasangahadi.”

11So o Yesus wosango wotemo, “Nako Ngohi ngona gena igogou de ani kuasa, duma o kuasa magena ka cawali o Gikimoi asa aku wonihihike ngonaka. Mutuwade nako ngona de una ma Imam Wilalamo Ngohi woisidodoa ngonaka la ma ngale Ngohi isidasangahadi, una gena de awi dorou ifoloi ilamo.”

12O Yesus Awi demo komagena, so ma gubernur magena asa awi siningaka wotemo, “Bilasu Una towipalako.” So wosupu kali, duma o Yahudika manga roriri magena ka iwidotoore isidadu-dadu itemo, “Igogou! Nakoso o nyawa manena nowipalako, ngona gena nisowo ma Kolano Wilalamo ma Kaisar#19:12 Kaisar: O Buku ma duduka o kamus ma rabaka ‘Kaisar’ nianano. awi dodiao. Sababu ngona nanakoka, nakoso o nyawa moi kanaga wotemo una gena o kolano moi, de awi demo magena igogou una ma Kaisar iwilawangi.”

13So kagena de ma gubernur una magena wosulo o Yesus wisisupuka, de asa awi kuasa ma kursika womatamiye ma ngale wositatapu bilasu o Yesus wosone. Gena awi riho moi isironga Ma Nanaho o Tetono, de nako o Ibrani ma demo gena isironga o Gabata. 14O orasi magena o Paskah ma Rarame ma wange gena maro ilangika, so ma ngale magena yosidailako kasi, gena o wange he itiaika nagala o cako mogiowo de sinotoka. De ma gubernur kagena o Yahudi manga roririka wotemo, “Gena! Una manena nagala nia kolano.”

15Duma ona asa imatoore, “Hika powisidasangahadi! Hika powisidasangahadi!”

De wotemo, “Awadede! Dadoohaso bilasu towisidasangahadi to ngini nia kolano.”

De o imamka ma bi sahe itemo unaka, “To ngomi mia kolano ma somoa gena wihiwa, cawali ka ma Kaisar gena kanaga.”

16So imaaka komagena, so ma dodoguka de una, ma gubernur o Pilatus gena, o Yesus ka wisidoa la bilasu awi prajurit iwisidasangahadi.

O Yesus wisidasangahadi

(Matius 27:32-44, Markus 15:21-32, Lukas 23:26-43)

So o Yesus gena o bi prajurit iwingoso so itagi iwingahoka. 17Iwingahoka, de Awi sangahadi gena Una masirete wamoku so o kotaka de isupu itagi o riho moika isironga o Sahe ma Papala ma Riho, gena nakoso o bahasa Ibrani isironga o Golgota. 18So kagena yaadoka de gila-gila Una magena ona wisidasangahadika. De o orasi magena kanaga yasinotoli yasidasangahadi, ona magena o nyawa itotooma, ona yasinoto manga risoaka, so moi Awi girinaka de moili Awi gubalika.

19De ma gubernur wosulo isilefo to Una Awi sangahadi ma dokuka o galaki ma demo itemo: o yesus o nazaretka ma nyawa o yahudika manga kolano. 20So o Yahudika ma nyawa kanaga yadala o galaki ma demo magena yakelelo de yabaca, sababu o riho kekiaka Una wisidasangahadi magena o kota ma dateka, de ma demo gena isilefo o bahasa saange, ena gena o bahasa Ibrani, o bahasa Latin, de lo o bahasa Yunani. 21Duma o imamka ma bi sahe magena ma gubernurka itemo, “Kiaso nadohaka so ona isilefo de o demo ‘O Yahudika manga kolano,’ duma bilasu isilefo, ‘O nyawa Una manena wotemo masirete: Ngohi manena o Yahudika manga kolano.’ ”

22Ma gubernur woholu de wotemo, “O kia naga tosilelefoka gena, komagena bato de yaakuwa niatagali.”

23De o bi prajurit o Yesus wisisasangahadika, ona magena to Una Awi baju moi-moi ona yaregu idadi o gimina iha so kanaga moi-moi de manga gimina, de ma soohu gena ka Awi juba. Magena yauriwa duma isidaaka kadaku sidago lo kadahu so isidodaasu. 24De ona itemo moi de moika, “Hika upa paraca, duma ngone asa paundi la de magena inasidumu naguuna asa wamake de wodahe.” Komagena ma ngale idadi de imaaka imatero maro o kia idomaka isilelefo o Gikimoi Awi Jaji ma Buku ma rabaka itemo,

“To Ngohi Ai baju ona imatekesikotoku

la yaaka moi-moi de manga gimina

de ma ngale manga sidongirabaka

la yaaka o undi naguuna Ai juba wodahe.”

So o bi prajurit ona magena yaaka imatero maro o kia isilelefo idomaka.

25De kanaga o Yesus Awi sangahadi ma dateka imaokoye gena Una Awi awa, de ma awa ma nongoru, de o Klopas ma pedeka ami ronga ongo Maria de lo ongo Maria Magdalena. 26So o Yesus o sangahadika de wakelelo ma awa de ami dateka o muri moi foloi wisiboboso, de ma awaka Una wotemo, “Ai awa, kanena naga nowinano maro to ngona ani ngopa yanau moili.” 27De komagena o muri moi una magenaka wotemo kali, “Ai dodiao, kanena naga nominano maro ka to ngona ani awa masireteli.” So ka o orasi magenasi, de o muri moi magegena una ma awa gena womijaga daloha so igoge lo ka o tahu moi.

O Yesus wosone

(Matius 27:45-56, Markus 15:33-41, Lukas 23:44-49)

28Itekawa, de o Yesus wanako o bi moi-moi dangodu isiboloka, so womasigaso ma ngale idadi de imaaka imatero maro o kia idomaka isilelefo o Gikimoi Awi Jaji ma Buku ma rabaka. Una wotemo, “Kodo! Ai kiri daduduka.” 29Kagena naga o udo-udo moi ma rabaka gena o anggur dakokiopi, so ona o bunga moi koloko o kaka yadehe so yatono. Dabolo de o bunga magena o gota ma uma, ma ronga o hisop gena, ma ideka isisuruka, de yatubo to Una Awi uruka la ma ngale Una wapipi. 30Una wapipi dabolo de wotemo, “Ai manara tosiboloka.” Ato Awi sahe iruku gena wosoneka.

31O wange magegena isidailako ma ngale ma langino o Sabat ma wange de ma boboloi o wange magena o Paskah ma Wange ma rarame ilalamo moi. Ma ngale magegena so o Yahudika manga roriri yodupawa, nakoso o Sabat ma wangeka, de o bi sone ma bake o sangahadika gena kanagasi, so ma gubernur o Pilatuska iwigolo la ibisisangahadika manga dohu gena yatepi, ma ngale ona isiguti o sangahadiku de gila-gila yapoosu. 32So o bi prajurit yasulo la itagi so yahino de ma nonoma gena yasisasangahadi yasinoto o Yesus Awi dateka, ona magena manga dohu yatepi. 33Dabolo de yahino o Yesus Awi sone ma bakeka, de asa yanako igogou Una wosoneka, so Awi dohu gena ona he yatepi kawa. 34Ngaroko komagena, duma to Una Awi alu ma ngunu gena o nyawa moi o prajurit manga sidongirabaka de o tuba wasuru, sidago imatodoka o au de lo o ake imakacapu isupu de iuhi. 35O nyawa moi kanaga o bi moi-moi magegena igogou wakeleloka, so una wosingangasu daboloka, de ma ngale o Yesus Kristus gena winisingangasu nginika, la ngini lo aku niwipiricaya o Yesuska. O kia naga wosingongangasu magena ka itero, de una masirete ka wanako awi demo magena itotiai de itetero. 36O bi moi-moi magena imadadi ma ngale asa isiganapu o kia idomaka isilelefo o Gikimoi Awi Jaji ma Buku ma rabaka itemo, “Awi kobo moi lo asa upa yatepi.” 37De lo isilelefo kali itemo, “Ona asa iwinanano Una iwisusuruka.”

O Yesus wipoosu

(Matius 27:57-61, Markus 15:42-47, Lukas 23:50-56)

38Itekawa, de o Yusuf o Arimateaka ma nyawa moi wahino. Ma ngale una o Yesus wimote-mote de o Yahudika manga roriri wamodo, so ka womasidodutulu. Ngaroko komagena, duma una asa womabobarani so wahika o Pilatuska, de wagolo o Yesus Awi sone ma bake. De o Pilatus o Yusuf wisimaha so una wotagi de o Yesus Awi sone ma bake magena waaho. 39De o Nikodemus, una magena o putu moi ipapasaka o Yesus wikurumi, una magena lo o Yusuf wimote. So una waaho lo o gososo dabobou gena o gota gaharuno isicacapuka de o sou, gena ma lamo nagala o kilo moruwange, ma ngale o Yesus Awi sone ma bake isisou. 40So kagena de ona Una Awi sone ma bake magena yaaaho waasi de yarapa kasi, dabolo de asa isisangi de o baro daaare, mote de o Yahudika manga adati de manga galepu nakoso o sone ma bake yapoosu. 41De o riho kiaka Una wisisasangahadika kanaga o doro moi, de kagena lo o boosu moi o teto ma rabaka, de magena ka damomuanesi, so ma rabaka o sone ma bake moi lo waasi yapoosu. 42Sababu ilangi o Sabat ma wange gena he yadangade yaado, de kagena de o boosuka gena ma soa ikuru kawa, so o boosu magena ma rabaka asa Una Awi sone ma bake yapoosu. Dabolo de ona o teto ilalamo moi yodololo la o boosu magena ma ngora isiperesu.

Currently Selected:

Yohanes 19: LAIGBI

Highlight

Copy