MARKUS 9
9
1Jesus eteete mana, „Beu maa kou ani kitii, jakai me ida wija wido jooni-topai, okei Ugatameja jakimakita makiida bida boko ma meitaida dou beu gaa te bokaitai,” etii.
Bagouda Jesus Iginikiniki Tita
2Uno benumi umijake Jesusja Peterus ma, Jakub ma, Jahja ma ouwijake ibo bagouda okei to oopatikai. Okeija pekaida Jesus iginikiniki tidoke.
3Okaija kagaba maija wakijo umina tijake ataati tidoke tai. Makiida ka kagaba witoge-tai me idaana ma kou danite pokade taawija.
4Elias kidi Musa ma enaimo ewaa aakijake Jesus ma mana oojawegai.
5Tijake Peterus Jesuspa eteete mana, „Ei, Kuduu, inii jakai tope ko enaa no. Inii owaajokaa wido kijamigiipage; ena ko aki ipuwe, ena ko Musa ipuwe, ena ko Elias ipuwe,” etii.
6Kawe dani mana etii ko okai ewo kouja; okei weda umina gajake.
7Jabai kapagu ka eepumijake jabai duba make mana wuu eteete mana, „Kii ke ani Joka didé. Okai ejuwai to tai,” etii.
8Okai kou gaa kodaa maija okei wado doumigijake me idaana ma edou beu, kodeja Jesus to okei ma enaimo.
Elias Tiga Mei Mana
9Okei bagouda make mijouwe keetigo Jesus bida peu etimakai, dopai agijo kodo me idaana ma te ete-tijake, me Joka bokata bagee jupi make anigoutagiida to.
10Kii mana muto kegepa duba awijake okei kede akado wegene teete mana, „Kii ke kawe dani mana muto no? bokata bagee jupi make anigou mana kodo,” wegai.
11Tijake okei Jesus egaado teete mana, „Magijo ka kapogeije epi bagee ka ’Elias tiga meitagi’ wegaigai?” etii.
12Tijake Jesus wo eteete mana, „Maakidi, Elias tiga mejake utoma agijo utoma titaaki tijawii. Kodeja kawe dani me Joka maida make kapogeije ebijamakita mana okai gaduwai umina taitagi, daana me ka peu eewiitai?
13Kodeja ani kitii, beu maa kou, Elias meta kodeja, okeija ka dimi gata danite etijawita, okai maida make kapogeije ebijamakita danite,” etii.
Enija Beu Jaawita
14Okei etope-taidoopa dakii tijake me wedaba ka ebobimakitoojogo edou. Kapogeije epi bagee mana wo wegai jamo wegai teetigo.
15Okai kou gaa kodaa meido ego takuu-takuu umina, okei Jesus edojake, daana okei tibigi to okaapa mejake kipo emotai.
16Tijake okai egaado teete mana, „Má mana muto kii me ki ma akaije ooteete?” etii.
17Kou meido kodo jupi ka me idaana eteete mana, „Ei, Kuduu, ani joka akeepa oomeega, manaawo enija jago kodaa.
18Enija kodaa okai duba awidoke ti-toojogo wo gojawii amo gojawii etai. Ebeida ukouko edidaa ma, egaagede ma, daana otomidoke teike. Akija etope-taidoopa enija jaemigimakai ediimeega kodeja, okei kaga,” etii.
19Tijake Jesus wo eteete mana, „Kowaa kei, maakodo gai beu tuma, uno magoo ani keetouta? Daana kigi magoo kojáá kidoutouta? Aneepa oomei,” etii.
20Okai joka kidi oomei. Enija Jesus edojake okai kou gaa kodaa maija enija kodaa joka kidi juma duwajake etai. Okai maki maida wo gojawii jamo gojawii etai; ebeida ukouko umina etijake tai.
21Tijake Jesus joka kidi nakame egaado teete mana, „Agoo magoo dani kii dani tidoke tijake topi?” etii. Tijake joko eteete mana, „Jokaida kidaa make.
22Daana bodija duba ma, uwo duba ma nakuu etai umina, wagimakaine. Okai kouja aki kei timake keetigo ko, ipa nigajake needadai,” etii.
23Tijake Jesus wo eteete mana, „Kawe dani tijake ’kei timake’ eneege kou ko? Utoma agijo maakodo gai bageepa jakei timakija,” etii.
24Okai kou gaa kodo maija nakame emeeme tijake jege teete mana, „Ei, ani maakidi kagai. Anija maakidi te kagai dimi ko naadadai,” etii.
25Kouda kodaa me wedaba tibigi kotuu timakeetigo Jesus edojake nokii enija kodo emoge eteete mana, „Kowaa ke, manaawo ma gapa daba ma enija, ani katii, aki me ki duba make podomi, daana metaato amoujo te kai,” etii.
26Enija emeeme ma podomeete jato joka kidi juma eduwajake-tai umina, tijake joka kidi bokaagi dani tidoke tai, tijake me wedaba ka „Bokaagi” wegai.
27Tijake Jesus gane ejakijake wado ebukijake okai anigou.
28Owaapa wadoujo kijake etope-taido to tojake egaado teete mana, „Magijo ka inii enija te jaemigimake?” etii.
29Tijake okai eteete mana, „Kii bagee tumaana ka te epodomijawija, kodeja sembahjang ka to,” etii.
Kigi Wijaago Jesus Bokaitagi Mana Eti-menita
30Kouda kodaa make uwijake Galilea makijo wokaato kai. Jesus topi kou ko me epi kai okai ide beu.
31Okai etope-taido etopeete kojoka, eteete mana ko, „Me Joka kidi me ka ganeida eekegajawiitai, tijake okei wagimakaitai. Wagijake ko uno wido umijake anigoutagi,” etii.
32Kodeja okei kou mana kodo gai beu, daana egaado tai weda gai.
Etope-taido Akaije Tita
33Okei Kapernaum makijo uwii. Jesus owaa wadoujo kijake okai etope-taido egaado teete mana, „Ita maida make mana wegaaga kou ko magijo?” etii.
34Kodeja okei mana godai beu tijake gabo tou. Okei jupi meime ibo, ita maida make akaije akaate kouja.
35Jesus animakijake etope-tai wija ma gaati kede manaa-tijake eteete mana, „Me idaana okai tiga kaine ga-toojogo, nemouga puki kai beu kai peu, daana utoma bageepa jakei tai,” etii.
36Tijake okai joka idaana ebukijake okei jupi ejoonijawii. Okai ejupugijake eteete mana,
37„Meija joka kii danite aneeka dubaiga ejakimakipi, okai najakimakai. Daana meija najakimakipi, okai ani najakimakai beu kodeja, okai nabadikumita me ejakimakai,” etii.
Akaije Ti Nitai Me Kidi Iniija Noogei
38Tijake Jahja eteete mana, „Kuduu, inii me idaana edou, inii neepei beu bagee, aki eka dubaiga enija jaemigimakai. Tijake inii beu etipe, okai neepei beu kouja,” etii.
39Kodeja Jesus eteete mana, „Beu te etii. Meena ma beu bida agijo aneeka dubaiga ewaa awijake odigaa gaa ko nawidogai ko.
40Akaije ti nitai bagee iniija noogei kouja.
41Meija uwo no-tijake kinipi, ikii Keristus ipuwe kouja, beu maa kou ani kitii, okaija petege umina te igaita.
Gane Juwa, Bado Juwa, Peu Kaawi-toojogo Mana
42Meija ani maakidi nagata daba bagee kede idaana monoo etipi, okai kii me kidi ki ogo maida ibo mogo gadimijake maikai epouda eemigimakai enaa.
43Daana akija gane ka peu mejawipi duwakumii. Gane wijaago imo to togoo bodijaapa uwii ma ko, gane enakaato to ajii tai wadoujo kai enaa.
44Kouda kodaa temege maija te bokajaida kodo, daana bodija maija te dinijaida.
45Daana akija bado peu mejawipi duwakumii.
46Kou danite bado wijaago kadaga bodija kaemigimakai ma ko, kotiidogo ajii tai wadoujo kai enaa.
47Daana akija peka ka peu mejawipi gobakumii. Peka wijaago kadaga bodija kaemigimakai ma ko, peka enakaato to Ugatameja jakimakita makiida wadoujo kai enaa.
48Kouda kodaa temege maija te bokajaida, daana bodija maija te dinijaida.
49Utoma bagee utoma bodija ka diga wagija wagiitai kouja.
50Diga enaa, kodeja diga kodo igi beu ki-toojogo, kawe dani tijake digaigijo awija? Ikii duba diga awii to tai, daana ikii utoma kojáá tou to tai.”
Currently Selected:
MARKUS 9: EKG
Highlight
Share
Copy
Want to have your highlights saved across all your devices? Sign up or sign in
