MARKUS 8

Me Ida Empat Ribu Naija Agijo Jawudita

1Okai kou gaa kodo maija me wedaba kotuu timakijake okei naija agijo tagu kojoka Jesus etope-taido manaa-tijake eteete mana,

2„Ani meido kei ipa egai, okei uno wido ani ma neetou kouja, daana naija agijo ena ma beu.

3Daana naidi ma okei owaapa uwei etipa ko, okei ita maida bobaa taipigai kodaa, poto bagee maija mejake kouja,” etii.

4Tijake etope-taido wo eteete mana, „Kaija make goti motijake kii me beuda kiija me wedaba kei ke mobu awiine ko?” etii.

5Tijake Jesus eteete mana, „Ikeepa goti kemo magoo topai?” Etijake wo eteete mana, „Pituwo topai,” etii.

6Meido kodo maki maida animake-tei etijake, goti kemo pituwo kodo motijake nagajaweege mana eti-menii. Okai utijake etope-taido menii, meido kodoopa jawude-tijake. Tijake meido kodoopa jawudina.

7Mijo binei wija wido maija topai. Sembahjang tijake binei kede jawudei etii.

8Okei nojake mobu kai. Utita abu kitaija kodo mo-motijake edu tapuja pituwo awimakai.

9Okei me ida muto muto to mutoona.#8:9 empat ribu Okai meido uwei etii.

10Okai kou gaa kodo maija etope-taido ma enaimo koma matakijake Dalmanuta makijo dakii tai.

Dou Beu Agijo Ediimai

11Parisi bagee mejake Jesus egaado tai, epa maida make dou beu agijo doune egaado teete ko.

12Okaija kegepa duba umina gaagaa tijake kei teete mana, „Magijo ka kii tuma ki dou beu agijo ubaate? Beu maa kou ani kitii, kii tuma kiipa dou beu agijo tumaana ma te emuwakaita,” etii.

13Okai meido ejaikidokijake koma kigeena ma matakijake metaato adii.

Parisi Bagee Ejajawe-tai Agijo

14Etope-taido goti adaku tijake dokii beu. Komaageida abuma beu, kodeja mijo goti ena to.

15Tijake Jesus etimakeete mana, „Epeepite gai, Parisi bagee ma Herodes eepe-tai bagee ma ka ejajawe-tai maida make ko ikii akaato munii,” etii.

16Okei kede akado wegene teete mana, „Inii goti beu kouja,” wegai.

17Tijake okeija dimi Jesus egamakijake eteete mana, „Magijo ka ikii akado wegene teete, goti beu mana kodo? Ikii gamakai beu, mee? Ikiija kegepa bida, mee?

18Ikii peka jago kodeja dou beu tipa? Ikii gapa jago, kodeja juwii beu tipa? Ikii gai beu, mee?

19Ani goti kemo idibi me ida muto muto to muto, daana abuma maija jauteetega gaa kodo, ikii utita abu kitaija edu tapuja magoo awimakeetega?” etii. Tijake okei eteete mana, „Wija ma gaati kodo ko,” etii.

20„Daana kigeena ma goti kemo pituwo me ida muto muto to mutoona jauteetega gaa kodo, utita abu kitaija edu tapuja magoo awimakeetega?” Etijake joko eteete mana, „Pituwo kodo ko,” etii.

21Tijake Jesus eteete mana, „Ikii ito maija gai beu, mee?” etii.

Baitsaida Makijo Peka Wanee Me Beu Jaawita

22Okei Baitsaida makijo mei. Peka wanee me idaana me ka oomejake ewinikido-tijake ediimai.

23Peka wanee me kidi Jesus gane ejakijake kou makiida make ouwii. Peka maida epoge jatuwajake okaija gane me kidi maida jamakii, egaado teete mana, „Tumaana agijo aki dooge, mee?” etii.

24Tijake doumigijake eteete mana, „Ani me edooga kodeja, okei pija uti danite uwina,” etii.

25Kigeena ma peka maida gane jamakijake okai beu kijake epeepite domakai, daana utoma agijo ewaida kai.

26Okaija owaapa uwii etijake eteete mana, „Maki okogoonaida wadoujo te kai,” etii.

Peterus Jawegata Mana

27Jesus ma etope-taido ma uwijake Kaisaria Pilipi maki dokouda ka makijoodaapa uwii. Ita uweetigo Jesus etope-taido egaado teete mana, „Me ka mana ko ani ki meime?” etii.

28Tijake okei wo eteete mana, „Me ino ka ko, baptis tei tita me Jahja kidi; daana me ino ka ko Elias; daana ino ka ko gokobaki tijawiidaiga wegai tita me idaana wegaigai,” etii.

29Tijake Jesus eteete mana, „Kodeja ikiija ka ko, ani ki meime?” etii. Tijake Peterus wo eteete mana, „Aki ki Keristus kidi ki,” etii.

30Okai umina bida peu kidi me idaana ma te ete-tijake etimakai.

Edoga Kidi Jesus Bokaitagi Mana Eti-menita

31Me Joka gaduwai umina beu kai peu mana okai etopaine go-motii. Me iboudo ma, imam iboudo ma, kapogeije epi bagee ma ka ekonijake wagimakai, tijake uno wido umijake anigou.

32Kei mana muto kei ewaa tapa wegai. Tijake Peterus kidi Jesus ouwijake akaije ootai.

33Kodeja Jesus wouga wakouga tijake etope-taido edoumigii. Okai Peterus emoge eteete mana, „Kowaa ke, Teege, ani wakouto bikimi. Aki Ugatameja dimi gai beu keege kouja, kodeja me ka mana ko,” etii.

Pija Boko Dokii Mana

34Okai meido kodo manaa-tai, etope-taido ma enaimo, tijake eteete mana, „Me idaana naapeine gapi, okai akaato dimi te gajake okaija pija boko dokijake naapei.

35Meija okai akaato muniine gapi, okai akaato igajawiitagi. Kodeja meija ani maida make ma, ajii mana maida make ma okai akaato igajawipi, okai akaato madagajawii.

36Kawo kou enaa kija, kou danite me idaana makiida ka aagijo taagijo okai ipuwe awi-toojogo kodeja, okai akaato igadoke tai kou ko?

37Daana dimi mana komoka tijawiine ko magijo menija?

38Kii mogai te-tai ma, peu ma bagee jupi meija ani ma, anija mana muto ma ego nagapi, me Joka maija ego egaitagi, Nakameja ajiipiidaiga meitagiida, jimubeu jaetigo-tai bagee ma enaimo.”

Currently Selected:

MARKUS 8: EKG

Highlight

Copy