MARKUS 7

Gane Witogai Beu Tijake Nai Mana

1Parisi bagee ma, kapogeije epi bagee ma Jerusalim make mejake Jesuspa kotuu timakai.

2Jesusja etope-taido gane utoopa goti nootigo, gane te witogijake kodaa, okei edou.

3(Parisi bagee ma, Jahudi bagee utoma, gane epi witoge tijake to nai, aijaane muumaane ka mijo makii makii mana dijo doote.

4Akaada te-taidaapa make wado mejake maija gane witogai beu ki-toojogo te nai. Daana ino ka mana muto maija jakimakijake dijo dou to; uwaawe ma, awe-tai ma, pute uwaawe ma, witoge-tai kou maija.)

5Tijake Parisi bagee ma, kapogeije epi bagee ma eteete mana, „Magijo ka akija etope-taido kede aijaane muumaane ka mijo makii makii mana dijo dou beu, kodeja gane witogai beu tijake goti no-tai?” etii.

6Tijake Jesus wo eteete mana, „Umina maakidi ikii matabe bagee maida make Jesaja douja kijadojawita, kapogeije ebijamakita danite:

Kei bagee ebe ka to ibo najaikai kodeja,

Kegepa ko aneepa make poto.

7Okeija migaakobe natai wogidaa ibo,

Me ka kuba-mote mana okei etope-tai kouja.

8Ugatameja mana ikii jaikidokii; me ka kuba-mote mana ikii jakimakaine tijake,” etii.

9Daana kigeena ma eteete mana, „Beu maa kou, ikii Ugatameja mana ekonai, ikiija mijo makii makii mana dijo doune tijake.

10Musaja nitimakita kouja: Akaitai akuukai ibo ejaikai. Daana: Meija nakame ukame ewidogipi, wagigoo jamaawija.

11Kodeja ikiija ka wegai ko, ’Me idaana ka nakame juwa, ukame juwa, eteete mana: Aneepa make motija agijo ko Korban’ (me manaida awi-toojogo ko, Ugatameepa menii) eti-toojogo ko,

12okai tumaana agijo ma nakame ukameepa te jakei tija.

13Ikiija ka mijo makii makii mana maida kouja Ugatameja mana beu puga tijawii. Kou dani manaido wedaba ikii kei teiga,” etii.

Kegepa Duba Make Akaato Peu Awii

14Jesus me wedaba kodo manaa-tijake eteete mana, „Ikii utoma najuwijake gaawe-tai!

15Tapouda make me duba amoujo kija agijo tumaana ma me peu taawija. Kodeja me duba make podome-tai agijo kouja me peu eewii.

16Meija juwe-tijake gapa jago kipi juwii to tai,” etii.

17Okai meido ejaikidokijake owaapa wadoujo kai. Etope-taido mejake ena dani awe-tai mana kodo maida make etidou.

18Tijake okai eteete mana, „Ikii maija gai beu keega, mee? Ikii gai beu, mee? tapouda make tumaana agijo me duba amoujo ki-toojogo peu taawija.

19Kegepa duba amoujo kai ko beu kouja, kodeja modo duba kijake podomijawii.” (Kii dani tijake naija agijo utoma pijo awii.)

20Tijake kigeena ma eteete mana, „Me duba make podometai agijo, kii kidaa peu eewija.

21Tugouda make, kou ko kegepa duba make no te, peu dimi ewaa kai; utoopa wo uwe, oma, me wagii,

22mogai, kibigi gaawe, peu agijo, puja mana, dimi mogai, me peu eewiine dimi, me eduwai, ibo puga, me dimi beu;

23kei peudo kei ke tugouda make ewaa kijake me peu eewii,” etii.

Siro Puniki ka Jagamo

24Jesus kouda kodaa make uwijake Sur ma Sidon ma dokoo uwii. Owaa katoopa wadoujo kijake okaija dimi me idaana ma epi te ke-tijake kodeja, te boonimake.

25Jesus topi mana egaa jagamo idaana juwii, jokame enija jago kodo. Okai mejake Jesus jumaapa mijouga kai.

26Kou jagamo kodo Gerika ka jagamo, Siro Puniki makijo ka. Jokame duba make enija jaemigimake-tijake ediimai.

27Kodeja jagamo kodoopa Jesus eteete mana, „Jokaido tiga mobu eewii enaa. Jokaido ka goti jamotijake dodi jamo menii ko peu,” etii.

28Tijake jagamo kodo wo eteete mana, „Maa kou, Tuhan, kejage mijo ka to-tai dodi kodaa jokaido ka puugeido kodo mo-no-tai kouja,” etii.

29Tijake Jesus eteete mana, „Akaa eneege mana kiija uwii. Aki joka duba make enija podomidoke no,” etii.

30Jagamo kodo okaija owaapa dakii tijake jokame kodo uno umii kejageida toojogo edomakai, enija okai duba make podomijake.

Gapa Daba ma, Mana Momo ma Me

31Jesus Sur makijo podomijake Sidon makijouga jawii. Okai Galilea pekuuda dakii tai, Dekapolis makijo wokaato kijake.

32Gapa daba ma, mana momo ma me idaana kidi me ka oomei; gane okai maida jamake-tijake okei ediimai.

33Me wedaba kodoopa make okainiinii eewijake, gapa dubaiga kipo amo jaawii. Epoge tuwajake eta jawinikidou.

34Epa maida wado dojake eeki tijawijake eteete mana, „Eppata.” Kii me manaida awi-toojogo ko, „Kadidoke tidodou.”

35Okai kou gaa kodaa maija gapa kebadoke tai, daana eta mana godadoke. Tijake epeepite mana wegai.

36Tijake Jesus bida peu kidi etimakai, okai kou mana kodo me idaanaapa ma te ete-tijake. Okai gabo etijake kodeja okai euga umina kou mana kodo wegakumii.

37Meido umina maa kou ego takuu-takuu timakijake eteete mana, „Okaija kei teigi agijoudo umina enauto. Gapa daba bagee gapa jakebajawii, daana manaawo bagee mana jagodajawii kouja,” wegai.

Currently Selected:

MARKUS 7: EKG

Highlight

Copy