MARKUS 14

Iboudo Jesus Wagiine Mana Wegai

1Wadouga etigajake petii tita ga-tou naago kodo ma, goti ejajawii beu agijo naago ma wija tota naago kodo, imam iboudo ma, kapogeije epi bagee ma Jesus kawe danite ejakimakija dimi ubai, wagiine tijake.

2Okeija ka wegaate mana, „Ibo naago kou ko beu, meido jupi tetepepe potu tidoke na kojoka,” wegai.

Baitani Makijo Odijo Jatuumita

3Baitani makijo tomo jago dani me Simonja owaapa Jesus animakijake nootigo gaa jagamo idaana mei; enauto mogo ka ebijata tapuja ibo age odijo awita dokijake tapuja kodo kebajawijake Jesusja dagi maida jatuumijawii.

4Kodeja me wija wido emoge gai, kei teete mana, „Magijo ka unu enaa odijo ki utoopa to tikumeega?

5Kii odijo ki kaa tai naako, mege muto idibi motija, daana daba bagee menii enaa kodaa.” Tijake okei ewidogai umina etai.

6Kodeja Jesusja „Ejaikei” etii. „Magijo ka ikii gaagaa etijawii? Okai enaa agijo nakei teega kouja.

7Daba bagee ikii wa enaimo to-tai kouja; tijake ikii dimi ga-toojogo okeepa enaa agijo jakei tija; kodeja ani ki keetou to ko beu.

8Kou jagamo kou okaija kei tija danija kei teega; ani oka namakai beu gaa odijo natuumeega kodo.

9Beu maa kou ani kitii, uwoje makije ajii mana kodo wegakumiitaida, kou jagamo kodo kei teega kou ko ega-tojake wegaitai,” etii.

Judas Jesus Eekegajawiine Dimi

10Tijake Judas Iskariot kidi, etope-tai wija ma gaati kede ka idaana kidi imam iboudoopa uwii, Jesus okeepa eekegajawiine tijake.

11Okei juwijake eepai, tijake mege kaniitage kojoka etii. Tijake Judas eekegajawiine tijake enaa wagi ubai.

Naineida Epeepi Timakai

12Goti ejajawii beu naagoudo ka edoga naago kodo, kou ko wadouga etigajake petii tita ga-tou naago domba joka wagija gaa kodo, etope-taido Jesuspa eteete mana, „Kaija ide naineida epeepi katijawe-uwii ko?” etii.

13Tijake okai etope-tai wija ebadikumii, eteete mana, „Ikai makiidaapa auwai. Kouda kodaa uwo nogo-taipagi me ma akado aataipiga. Okai aepei.

14Okai wadoujo kaipagiida owaa ipuwe me aetai, ’Kuduuja kateegi, Kawo kugu kouja anija etope-taido ma enaimo ibo naago kodo inii naipage? kateegi,’ aanaetai.

15Tijake wadouto ka ibo tigi atita kugu okai kidaa kimuwakaipagi. Okai kouda kodaa epeepi neetimakai,” etii.

16Etope-tai wija kede auwijake maki okogoopa wadoujo aakai; Jesusja etita kodo danite aadomakai; tijake wadouga etigajake petii tita ga-tou naago epeepi aatimakai.

Jesus Eekegajawii Mana Douja Dojawita

17Wanee kijake Jesus ma, etope-tai wija ma gaati ma mei.

18Okei animakijake nootigo gaa Jesus eteete mana, „Beu maa kou ani kitii, ikii jupi ka me idaana ani ma noote me, okai naekegajawiipagi,” etii.

19Okei gaagaa umina tijake meena meena egaado teete mana, „Ani, mee?” etii.

20Tijake Jesus eteete mana, „Kii kidi ki ikii wija ma gaati ka idaana, no-taida goti uwo duba tokami-moteete kidi ani ma enaimo.

21Kapogeije ebijamakita danite me Joka uwii, kodeja me Joka eekegajawiipagi me kidi peu kugouto dokidoke no! Kii me kidi te epamakita naako enaa.”

Goti Nai Ewaa Awii

22Okei nootigo gaa Jesus goti motijake mobu ediimai. Okai goti utijake etope-taidoopa meneete mana, „Motiwei, anija má jato ki,” etii.

23Uwaawe maija motijake nigajaweege etijake uwaawe menii. Okei utoma uwaawe kuduuga nai.

24Tijake eteete mana, „Kii ke anija kijatogijawita mana kodo emo kodo, me wedaba maida make jatuumijawita kodo.

25Beu maa kou ani kitii, ito kiija make wado ani utaadijo te naita, Ugatameja jakimakita makiida kodaa ija naitaida to,” etii.

Peterus Beu Puga Etai Mana Douja Dojawita

26Okei ebetaataa tijake podomai, tijake Zaitun Dimiidaapa uwii.

27Tijake Jesus eteete mana, „Ikii utoma duwaa-duwaa taipiga; kapogeije ebijamakita kouja: Ani ooto-tai me kidi wagiita, daana domba imo kodo kigipapa tidaa taitai.

28Kodeja ani anigojake ani tiga Galilea dokoo uwiita,” etii.

29Kodeja Peterus wo eteete mana, „Kou danite okei utoma duwaa-duwaa tipai maija, ani ki beu,” etii.

30Tijake Jesus eteete mana, „Beu maa kou ani katii, ito kii naago ki itounu ki maija ajam kigi wija mana tai beu gaa, aki kigi wido beu puga nataipage,” etii.

31Kodeja Peterus umina bida peu kidi eteete mana, „Aki ma enaimo bokapa maija, ani beu puga te kataipiga,” etijake okei utoma kou kodo etii.

Getsemani Taida

32Okei maki katouda eka Getsemani ebatitaidaapa mei. Tijake etope-taidoopa eteete mana, „Ikii jakai animaki-tou, ani ki sembahjang taine gaa,” etii.

33Peterus ma, Jakub ma, Jahja ma ouwijake okai umina weda gadoke tijake didi gaduwai.

34Tijake eteete mana, „Anija kegepa gaagaa umina bokaine dani. Ikii jakai tojake doutou,” etii.

35Tijake Jesus wo dani kijake maki maida apaipu tidoke tijake sembahjang tai, kou danite okai kou wagi kodo okaapa make pipikadoke timake, mee? tijake.

36Daana eteete mana, „Ei, Naitai, utoma agijo utoma akija bida maida. Kii uwaawe ki aneepa make napipikajawii. Kodeja anija dimi ko beu, akija dimi to,” etii.

37Okai mejake okei uno umi-toojogo edomakai. Tijake Peteruspa eteete mana, „Ei, Simon, aki uno umeege? Mijo gaa to ani ma nadoutou ko kaga keege, mee?

38Doutou ma sembahjang ma, gaado tapa te ke-tijake. Dimi ko petee kodeja má jato debee,” etii.

39Uwijake sembahjang teegi kodo danite kigeena ma sembahjang tai.

40Kigeena ma mejake okei uno umi-toojogo edomakai, uno kogi umina kouja. Daana kawe dani mana etii ko okei ewo.

41Okai widaago joko mejake eteete mana, „Ikii ito maija uno umijake uno kogi duwajawii. Tiki no! Putu kodo duwadoke keega. Dowei, peu bageepa me Joka euwadoke.

42Anigowei, mewei. Edodowei, naekegaagi me kapauto keegi,” etii.

Jesus Ejakimakita

43Okai mana wegaatigo gaa kodaa, wija ma gaati kede ka idaana Judas kidi mei. Okai ma enaimo me wedaba kataana ma, kopa ma dokii. Okei imam iboudo ma, kapogeije epi bagee ma, me iboudo ma ka ebadikumita bagee.

44Eekegajawita me kidaa tegee dou mana eti-menita, eteete mana, „Ani unu ejumidoupiga me okai kii kidi kijoka ejakimakai, daana epeepite ouwii,” etii.

45Okai mejake okai kou gaa kodo Jesuspa jawijake eteete mana, „Ei, Kuduu” etijake unu ejumidou.

46Okai maida gane mapido tijake ejakimakai.

47Kouda kodaa joonidaa tita bageido jupi ka idaana kidi kataana juwi-motijake Ibo Imam jakei te-tai me wagijake gapa jaduwajawii.

48Tijake Jesus eteete mana, „Ikii moonaa te-tai me akaije ootaine jaijo kataana ma kopa ma dokijake najakimakaine meega, mee?

49Agapi gakita ani Ugatameja owaa duba keetojake kitopeiga, tijake ikii najakimakai beu. Kodeja kou dani kei tidoke, ugata kapogeije koba-tijake,” etii.

50Etope-taido utoma ejaikidokijake okiimigii.

Okita Jokaagaa

51Jokaagaa idaana Jesus nemouga eepei, pokadee kagaba makijawita. Tijake okei ejakimakai.

52Kodeja okaija kagaba jaikidokijake kagaba tagu okii.

Jesus Pika-tai Jumaapa

53Okei Jesus Ibo Imampa ouwii. Imam Iboudo ma, me iboudo ma, kapogeije epi bagee ma kotuu timakai.

54Peterus poto make eepejake, Ibo Imam ka owaapa dakii tai. Tijake okai douto-tai bagee ma enaida animakijake bodija ootogii.

55Imam iboudo ma, mana pika-tai kotuu ma, Jesus wagimakaine puja mana jakubaine tijake ubai; kodeja domakai beu.

56Me wedaba puja jakubai kodeja, kou manaido kodo ena dani beu.

57Me ida wija wido joonijake puja jakubaate mana,

58„Inii ejuweemege, kii me kiija mana kii dani wegai, ’Ani Ugatameja owaa ki bogomijawiita, kii me gane ka kei tita ki. Daana naago wido to me gane ka ko beu ani ena ma migijawiita,’ wegaategi,” etii.

59Kou dani mana okei jakubai kodeja ena dani beu.

60Tijake Ibo Imam joonidoke tijake Jesuspa eteete mana, „Aki manaana ma wo te etii, mee? Okei má mana kateegai kou ko?” etii.

61Kodeja Jesus gabo tojake mana ena ma wo etii beu. Ibo Imam kidaa egaado teete mana, „Aki ki Keristus, Ibo Ejaikita kidi Jokame, mee?” etii.

62Tijake Jesus eteete mana, „Ani ki kii kidi; daana me Joka kidi Bida Bokouto etikaato gebo animakijake epa maida ka tá kapagu maidaiga meete ikii edouta,” etii.

63Tijake Ibo Imam okai kidaa kagaba kigibajake eteete mana, „Magijo taine inii mana abuma wegai?

64Okaija eduwata mana ikii ejuweega. Ikii kawe dani dimi egai?” Etijake okei utoma „Okai bokai beu kai peu,” etii.

65Tijake okei epoge etuwai go-motii, daana ebepeka eepumijake wageete mana, „Douja nidodou,” etii. Kei te-tai bagee maija ganaadabe wagii.

Peterus Beu Puga Etita

66Peterus mijouwe juwouda toojogo gaa Ibo Imam jakei te-tai api idaana mei.

67Peterus ootogeetigo api kodo edojake epeepite edootaa timakijake eteete mana, „Aki maija Nazaret ka me Jesus kidi ma enaimo kojoka,” etii.

68Kodeja okai beu puga eteete mana, „Ani ewo. Ani gai beu akija eneege mana kou ko,” etii. Tijake okai damoutoopa podomijake ajam mana tai.

69Kei te-tai api ko kigeena ma edojake kouda tota bageepa eteete mana, „Kii me ki maija kei kede idaana,” etii.

70Kodeja okai kigeena ma beu puga etai. Tota dani gaa kidaa kouda kodaa jooni-tota bagee Peteruspa eteete mana, „Beu maa kou, aki ki okei jupi ka me idaana, aki Galilea ka me kiija,” etii.

71Tijake okai akaato peu dokijawijake baita makeete mana, „Ikiija ka eneete me kidi ani edou beu me,” etii.

72Okai kou gaa kodo maija ajam kigi wijaago mana tai. Tijake Peterus Jesusja etipi mana kodo gadoke, kou ko, „Ajam kigi wija mana tai beu gaa, aki kigi wido beu puga nataipage,” etipi mana kodo. Peterus kou kodo gajake jege tai.

Currently Selected:

MARKUS 14: EKG

Highlight

Copy