MARKUS 13
13
Ugatameja Owaa Peu Kaita Mana
1Jesus Ugatameja owaapa make podomijake etope-tai kede idaana ka eteete mana, „Ei, Kuduu, dododou, mogo kei jegeenaka, daana migitaido kei na,” etii.
2Tijake Jesus eteete mana, „Kei ibo migitaido kei aki dooge, mee? Kiija mogo kato mogo maida te tojake bogomidaa to taitai,” etii.
Wiwitiida Gaa ka Mana
3Ugatameja owaapa wouwe Zaitun Dimiida Jesus animakitoojogo Peterus ma, Jakub ma, Jahja ma, Andereas ma, okei to tojake egaado teete mana,
4„Menoka putu duwadoke taita gaa kodo niti-niimai. Daana putu muumai tidoke taine gaa tegee dou agijo magijo ewaa kaita?” etii.
5Tijake Jesus go-motijake eteete mana, „Epeepite gai, me ka uneune ti kitijawe-tita.
6Me wedaba aneeka dubaiga meitai, wegaate mana, ’Ani okai kii kidi,’ daana okei me wedaba uneune etijawiitai.
7Daana jape makeete ma, jape mana ma ikii juwipa, gootoki te tai. Ewaa kidaa tai beu kai peu kouja; kodeja kou ko wiwitiida ko beu gaa.
8Me tumaana ka tumaana ma akaije akaate taitai, daana jakimakita makiida ka joko ka jakimakita makiida ma akaije. Kiida kouda maki pigi taita, daana naidi uwa potu taita. Okai kou ko gaagaa agijoudo edoga makidaa.
Peepu Mana Douja Dojawita
9Kodeja ikii ke akaato domakai. Okei pika-tai kotuuda keekegajawiitai. Sembahjang owaa duba godijai kitaitai. Gubernur jumaapa ma, maki jakimake-tai bagee jumaapa ma, ani maida make ikii jooniita, mana naawega-tita tijake.
10Ajii mana kodo me tuma tumaijaapa wudikumii tiga beu kai peu.
11Kodeja ikii mana pika-tai kotuuda keekegajawipai, ikii kawe dani wegaja juwa gaagaa te tai; kodeja okai kou gaa kodaa ete-tijake kinii agijo etii to, ikiija ka etii ko beu kojoka, kodeja Rohulkudus kodaa.
12Me ka kenekame boka-tijake eekegajawiitagi, daana nakame ka jokame maija; daana jokaane ka ukame nakame akaije ootijake boka-tijake eekegajawiitai.
13Daana utoma bagee aneeka maida make be kigaitai. Kodeja meija wiwitiida to bida peu tomakipi ko, ajii taitagi.
Puja Mana Wude-tai Bagee
14Kigikuwa tijawii ka nokii agijo te tojaida kodaa jooni-toojogo ikii dopa ko, (kapogeije doote me kidi epeepite gai), okai kou gaa kodo Judea dokoo ka bagee dimi katouda okii.
15Owaimouda toutagi me owaa duba agijo motiine mijouwe te kai.
16Daana taida toutagi me kidi eba wo te motigou.
17Ipa no! modaago bagee ma, jokaago bagee ma, okai kou wagi kodo.
18Oo uwa te ke-tita sembahjang ediimai.
19Okai kou naagoudo kodo tetepepe peijo potu taita kouja, Ugatameja ugajawitaida make ito to utuuja ewaa kai beu mana, daana kou wadouto maija ewaa te kaita.
20Okai kou wagi kodo Tuhanja pini taawii naako, me idaana ma petii te tija. Kodeja okaija ewitokita bagee maida make kou wagi kodo pini awii.
21Daana okai kou gaa kodo me ka kiteete mana, ’Edowei, kiija Keristus kidi’, juwa, ’Kouja topi’, juwa, kitipai ko, ikii maakodo te egai.
22Keristus puga ma, puja mana wude-tai ma ewaa kidaa tijake ibo dou beu agijo ma, ego takuu-takuu agijo ma ewaa awiitai, ewitokita bagee maija uneune etijawiipage, mee? gajake.
23Kodeja ikii ke epeepite ga-motii. Kei agijoudo utoma kei tidoke beu gaa kodo ani kiteega.
Me Joka Meitagiida
24Kodeja okai kou gaa kodo tetepepe ibo wadouto ko, meuka wanee kaita, daana agoo kodo pa te timakaita;
25ijapuudo epa maida make kigibidaa taitai, daana epa maida ka bidaido maija kigipapa tidaa taitai.
26Tijake me Joka tá kapagu maidaiga meete okei edoutai, bidaidaiga ma, ibo ajiipiidaiga ma.
27Wadoutouga jaetigo-tai bagee ebadikumiitagi, tijake maki butu uwo butu ewitokita bagee kotuu etimakaitai; kou ko maki momogiida make epa momogiida to.
Ara Uti Ena Dani Awe-tai Mana
28Ara uta uti ka ena dani awe-tai mana topii: Bona pakamidaa tijake ije muugu-muugu ti-toojogo, awi uwa kapa keega kodo ikii gai.
29Okai kou dani maija kei agijoudo ewaa kidaa teete ikii dopa ko, ikii gai, meine ijeida, damoutoopa topi kidaa.
30Beu maa kou ani kitii, kii tuma ki te igaita, kei agijoudo utoma ewaa kai beu gaa ko.
31Epa ma maki ma beu kaita, kodeja anija mana beu te kaita.
Douto-douto Tai
32Kodeja kou naago juwa, kou wagi juwa, me idaana ma epi beu, epaawado ka jaetigo-tai bagee na beu, Jokame na beu, kodeja Nakame to.
33Epeepite ga-motii. Doutou ma, sembahjang ma. Putu kodo ikii gai beu kouja.
34Okai kou mana kodo me idaana poto makijo uwija dani bukaa. Okaija owaa jaikidokijake jakei te-tai bageepa boko jaduwajawii. Me gakita kei tija agijo nana-nana jawudii. Tijake damoutoopa douto-tai me epeepite douto-tijake etimakai.
35Okai kouja ikii doutou to tai; ikii ewo kouja kawo gaa kou owaa ipuwe me kidi mei ko: uwaataa juwa, wanee juwa, bedo manaano gaa juwa, abata juwa.
36Okai egaa medoke tijake ikii uno umi-toojogo kidomakai na kojoka.
37Anija kiteega mana kou maija ani me utomaapa etimakai: Douto-douto tai mana kodo,” etii.
Currently Selected:
MARKUS 13: EKG
Highlight
Share
Copy
Want to have your highlights saved across all your devices? Sign up or sign in
